دەمالىس كۇندەرى قار جاۋىپ, استانا اق ۇلپاعا قايتا وراندى. الايدا قالانىڭ كوممۋنالدىق قىزمەتتەرى مەرەكەلىك دەمالىس كۇندەرىندە دە دامىل تاپپاي, ەلوردا اۋماعىن قاردان تازالادى. «استانا تازالىق» جشس ماماندارى تاراتقان مالىمەت بويىنشا, قىس ايلارىندا قالا سىرتىنا شىعارىلعان قاردىڭ مولشەرى شامامەن 3 ملن تەكشە مەتردى قۇراعان.
ال 25 ناۋرىز كۇنى ءبىر تاۋلىكتىڭ ىشىندە «استانا تازالىق» جشس ەلوردا اۋماعىنان 30 مىڭعا تارتا تەكشە مەتر قاردى سىرتقا شىعارىپتى.
«قالانى قاردان تازارتۋ جۇمىستارىنا 312 جۇمىسشى مەن 589 تەحنيكا بىرلىگى جۇمىلدىرىلدى. ءبىر تاۋلىك ىشىندە استانا اۋماعىنان شىعارىلعان قاردىڭ مولشەرى 29 862 تەكشە مەتردى قۇرادى. قىس باسىنان ەلوردادان پوليگونعا قاردىڭ 2 996 170 تەكشە مەترى شىعارىلدى» دەلىنگەن كاسىپورىننىڭ حابارلاماسىندا.
سونداي-اق اتالمىش كومپانيانىڭ ءمالىمەتىنە سۇيەنسەك, 25 ناۋرىزدا ءبىر تاۋلىكتىڭ ىشىندە جولدارعا تۇز ارالاستىرىلعان قۇم قوسپاسىنىڭ 193 تونناسى, كوكتايعاققا قارسى رەاگەنتتىڭ 21,6 تونناسى سەبىلگەن ەكەن.
استانا اكىمدىگى تۇرعىن ءۇي كوممۋنالدىق شارۋاشىلىعىنا قاتىستى بارلىق ماسەلەلەر بويىنشا تاۋلىك بويى 109 ءنومىرى نەمەسە «Smart Astana» ءموبيلدى قوسىمشاسى مەن Facebook الەۋمەتتىك جەلىسىندەگى چات-بوتتار ارقىلى ەلوردا اكىمدىگىنىڭ بىرىڭعاي بايلانىس ورتالىعىنا (iKomek) حابارلاسۋعا بولاتىنىن, سونىمەن قاتار ءۇي الدىنداعى قاردان ۋاقىتىندا تازالاماۋ ماسەلەسىنە قاتىستى پيك-تەر مەن باسقارۋ كومپانيالارىنا حابارلاسۋ كەرەكتىگىن ەسكەرتەدى.
قازىرگى ۋاقىتتا اۋا رايىنىڭ قولايسىزدىعىنا بايلانىستى قالانىڭ كوممۋنالدىق قىزمەتتەرىنىڭ بارلىعى جۇمىستىڭ كۇشەيتىلگەن رەجيمىنە كوشتى. استانا قالاسىنىڭ ءار اۋدانىندا قۇم شاشىراتقىشتار, اۆتوگرەيدەرلەر, جۇك تيەگىشتەر سىندى ارنايى تەحنيكالار جۇمىس ىستەپ جاتىر.
ەلوردا بيلىگى قالا تۇرعىندارى مەن قوناقتارىن قاۋىپسىزدىك ەرەجەلەرىن بارىنشا ساقتاۋعا شاقىرادى. كولىكتى باسقارۋ كەزىندە جىلدامدىق رەجيمى مەن ءتيىستى ارا قاشىقتىقتى ساقتاي وتىرىپ, جىلدام قوزعالىس, وقىس ارەكەت جاساماۋعا تىرىسىڭىز. جاياۋ جۇرگىنشىلەر دە بارىنشا اباي بولعانى ءجون. ولار جولدىڭ ەكىنشى جاعىنا تەك جاياۋ جۇرگىنشىلەر وتپەسى ارقىلى عانا ءوتۋى كەرەك. قالا جولدارىندا ارنايى تەحنيكا جۇمىس ىستەپ جاتقاندىقتان, كولىكتەردى وتكىزۋ دەڭگەيى ءبىرشاما تومەندەۋى مۇمكىن. وسىعان وراي, ءوز كولىگىڭىزدىڭ قوزعالىس باعىتىن الدىن الا جوسپارلاپ العانىڭىز ابزال.
