نۇر-سۇلتانداعى شاڭعى روللەر تراسساسىنىڭ اۋماعىندا قازاقستان رەسپۋبليكاسى تاۋەلسىزدىگىنىڭ 30 جىلدىعىنا, سونداي-اق قر تۇڭعىش پرەزيدەنتى كۇنىنە ارنالعان قىسقى سپورت ماۋسىمىنىڭ تۋى سالتاناتتى تۇردە كوتەرىلدى.
ماۋسىمنىڭ اشىلۋ سالتاناتىنا قازاقستان رەسپۋبليكاسىنىڭ مادەنيەت جانە سپورت ءمينيسترى اقتوتى رايىمقۇلوۆا, نۇر-سۇلتان قالاسى اكىمىنىڭ ورىنباسارى اسحات ورالوۆ, سپورت جانە دەنە شىنىقتىرۋ ىستەرى كوميتەتىنىڭ توراعاسى سامات ەرعاليەۆ قاتىستى.
اۋەسقوي شاڭعى جارىسىن سامات ەرعاليەۆ اشتى, ول قاتىسۋشىلارمەن بىرگە ءبىر كيلومەتردى ءجۇرىپ ءوتتى. سونىمەن قاتار شارا اياسىندا ەلىمىزدىڭ 17 قالاسىمەن تەلەكوپىر ۇيىمداستىرىلدى.
«ەلىمىزدە قىسقى ماۋسىمنىڭ اشىلۋى ەلىمىزدىڭ تۇڭعىش پرەزيدەنتى مەرەكەسىمەن تۇسپا-تۇس كەلدى. بارشاڭىزدى وسى ايتۋلى كۇنمەن جانە تاۋەلسىزدىكتىڭ 30 جىلدىعىمەن قۇتتىقتايمىن! ەلىمىزدە بۇقارالىق سپورت قارقىندى دامىپ كەلەدى. بۇل ءبىزدى قۋانتادى. مەملەكەت باسشىسى قاسىم-جومارت كەمەلۇلى توقاەۆ قازاقستان حالقىنا جولداۋىندا بۇقارالىق سپورتتى دامىتۋعا ەرەكشە نازار اۋداردى. پاندەميا كەزىندە دەنساۋلىقتى نىعايتۋ ءۇشىن ءدال وسى باعىتتى دامىتۋ ماڭىزدى» دەپ اتاپ ءوتتى ءىس-شارانى اشقان اقتوتى رايىمقۇلوۆا.
سونداي-اق ءىس-شارا اياسىندا شاڭعى جارىسى, گىر كوتەرۋ, ارمرەستلينگ, ارقان تارتۋ جانە بەلبەۋ كۇرەسى سياقتى سپورت تۇرلەرى بويىنشا جارىس ۇيىمداستىرىلدى. اۋا رايىنا قاراماستان, جارىسقا 600-گە جۋىق ادام جينالدى. ال ءتۇرلى ساناتتاعى جەڭىمپازدار مەن جۇلدەگەرلەر ديپلومدارمەن, مەدالدارمەن جانە باعالى سىيلىقتارمەن ماراپاتتالدى.
«ءبىز وتباسىمىزبەن قىسقى ماۋسىمنىڭ اشىلۋىن كورۋگە كەلدىك. جارىس جوعارى دەڭگەيدە وتكىزىلدى. بۇل جارىسقا مەنىڭ نەمەرەم قاتىسادى. بارلىق قاتىسۋشىلارعا, سونىڭ ىشىندە شاڭعى جارىسىنا قاتىسقان نەمەرەمە ساتتىلىك تىلەيمىن! بارشاڭىزدى تۇڭعىش پرەزيدەنت كۇنىمەن شىن جۇرەكتەن قۇتتىقتايمىن» دەدى ەلوردا تۇرعىنى جانعابىل كۇپتەنوۆ.
نۇر-سۇلتان قالاسىنىڭ اكىمدىگى مەن قر مادەنيەت جانە سپورت مينيسترلىگى ۇيىمداستىرعان شارا سانيتارلىق نورمالاردى ساقتاي وتىرىپ ءوتتى.
