Sport

قىزدار باسەكەسى قىزدى

استانا تورىندە ءوتىپ جاتقان ايەلدەر اراسىنداعى الەم چەمپيوناتىندا قازاقستاندىق بوكسشىلار ازىرگە جان­كۇيەرلەر ءۇمىتىن اقتاپ كەلەدى.

«بارىس ارەنا» سپورت سارايىندا كەرىلگەن قوس رينگ­تە كۇن سايىن بۇرىمدى بوكس­شىلاردىڭ ايقاستارى ءوتىپ جاتىر. الداعى جۇما كۇنى استانا شارشى الاڭى ون سال­ماق بويىنشا الەم چەمپيوندارىن انىقتايتىن بولادى. الەمنىڭ 64 ەلىنەن جينالعان بىلعارى قولعاپ شەبەرلەرىنىڭ جەكپە-جەكتەرىنە قاراپ, ايەل­دەر بوكسىنىڭ دا بارلىق قۇرلىقتا قارقىن الا باستا­عانىن اڭعارۋعا بولادى. ونىڭ ۇستىنە بۇل بىرىنشىلىكتە ءۇش سالماق بويىنشا الداعى تامىز ايىندا ريو-دە-جانەيرو قالاسىندا وتەتىن جازعى وليمپيادا ويىندارىنا ليتسەنزيالار بەرىلەتىن بولعاندىقتان ءار ايقاس ما­ڭىزدى بولماق. وسى ورايدا, وكىنىشكە قاراي, قازاق­ستان قۇراماسىنىڭ ۇكى­لەپ قوسقان بوكسشىسى ريمما ۆولوسەنكو (60 كەلى) ال­عاشقى جەكپە-جەگىندە-اق جارىس جولىنان شىعىپ قالدى. استانالىق ارۋدىڭ دانيا بوكسشىسى يۆونن راسمۋسسەنگە شاماسى جەتپەي قالدى. وسىلايشا, وليمپيادا ويىندارىنا بە­رىلەتىن ءبىر ليتسەنزيا قولدان سۋسىپ شىعىپ كەتتى.
ەندىگى ءۇمىت – 51 كەلىدە سىنعا ءتۇسىپ جاتقان جاينا شەكەربەكوۆا. وليمپياداعا جولداما الۋدى ماقسات ەتىپ وتىرعان جاينا ءبىرىنشى جەكپە-جەگىندە ادەمى بوكس كورسەتتى. ول ارگەن­تينالىق كلارا لاسكۋراتتى تىزە بۇكتىردى.
قازاقستاننان الەم چەمپيونى اتانعان تۇڭعىش ارۋىمىز نازىم قىزايباي دا العاشقى ايقاسىندا پولياك بوكسشىسى انجەليكا گرونسكانى, كەشە ەكىنشى قارسىلاسىن دا ۇتتى.
قازاقستان قۇراماسىنداعى ەڭ جاس بوكسشىنىڭ ءبىرى ايجان قوجابەكوۆا (57 كەلى) دا باپكەرلەر ءۇمىتىن اقتاپ شىقتى. 69 كەلىدە ەل نامىسىن قورعايتىن ۆالەنتينا حالزوۆا وسى بىرىنشىلىكتەگى العاشقى ايقاسىندا قارسى­لاسىن نو­كاۋت­پەن ۇتقان بولاتىن. ەكىنشى كەزدەسۋىندە الەمدىك رەيتينگتە ءۇشىنشى بولىپ تۇرعان وزبەكستاندىق شاحنوز نيزاموۆامەن قولعاپ ءتۇيىستىرىپ, جەڭىسكە جەتتى.


باپكەرلەر سەنىم جۇكتەگەن بوكسشىنىڭ ءبىرى دينا جولامان دا العاشقى اينالىمنان قينالماي ءوتتى.
ءبىزدىڭ قۇرامانىڭ ساپىنداعى ۆيولەتتا كنيازەۆا (75 كەلى) ءبىرىنشى جەكپە-جەگىندە وتە تەگەۋرىندى بوكسشى ەكەنىن بايقاتتى. ءبىرىنشى قارسىلاسىن بۇرىشتان بۇرىشقا قۋىپ, ۇردى. الايدا, ۆيولەتتانىڭ ەندىگى قارسىلاسى قاۋىپتى بو­لايىن دەپ تۇر. ول – امە­ريكالىق كلارەسس شيلدس. بىلە بىلسەك, وسىدان ءتورت جىل بۇرىن لوندون ويىندارىندا توپ جارعان, سونىمەن قاتار الەم چەمپيونى دەگەن اتاعى بار بوكسشى.
بايراقتى جارىستىڭ ءۇشىنشى كۇنى, وكىنىشكە قاراي, قازاق­ستان قۇراماسىنان تاعى ءبىر بوكسشى جارىس جولىنان شىعىپ قالدى. رەسەي بوكس­شىسى ليۋبوۆ پاشيناعا قارسى شىققان قازاقستاندىق يۋلدۋز مامات­كۋلوۆا (81 كەلى) جەڭىلىستىڭ اششى ءدامىن تاتۋعا ءماجبۇر بولدى.
سونىمەن, استانا تورىندە ءوتىپ جاتقان الەم چەمپيوناتى قىزا ءتۇستى. بۇگىن شيرەك فينالدىق جەكپە-جەكتەر باس­تالادى.

عالىم قوجابەكوۆ

تاعىدا

عالىم قوجابەكوۆ

«استانا اقشامى» گازەتى باس رەداكتورىنىڭ ورىنباسارى

ۇقساس جاڭالىقتار

پىكىر ۇستەۋ

Back to top button