قىزمەتتە «كوكەسىز» ءوسۋ مۇمكىن بە؟
ءاليحان بايمەنوۆ,
قر مەملەكەتتىك قىزمەت ىستەرى جونىندەگى اگەنتتىكتىڭ توراعاسى:
– قوعامدا قىزمەتكە تۋىسىن تارتۋ «ءداستۇرى» ءالى دە كەزدەسەدى. مۇنداي ءداستۇردىڭ تولىعىمەن جويىلاتىندىعىنا مەن سەنەمىن. ويتكەنى, قازىرگى باسشىلار ءوز قاراماعىندا ءبىلىكتى كادرلاردىڭ بولعانىن قالايدى.
مەملەكەت باسشىسى «كوماندالىق كوشۋ» دەپ اتالاتىن ءتاجىريبەنى توقتاتۋ, كونكۋرستان تىس اۋىسۋ ارقىلى كادرلار تاعايىنداۋدى قىسقارتۋ جونىندە ءبىرنەشە تاپسىرمالار بەرگەن. جاڭادان ۇسىنىلىپ وتىرعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا وسىعان بايلانىستى بىرنەشە ماسەلە كوزدەلىپ وتىر. زاڭ جوباسىنىڭ باستى ماقساتى – مەملەكەتتىك قىزمەتكە ەڭ لايىقتى ازاماتتاردى ىرىكتەۋ ارقىلى قابىلداپ, لاۋازىمى جوعارىلاعاندا ولاردىڭ ابىرويىن, بىلىكتىلىگىن, ەڭبەگىن ەسكەرەتىن جۇيەنى قالىپتاستىرۋ. سونىمەن قاتار, بۇل زاڭ جوباسى «قازاقستان-2030» ستراتەگيالىق باعدارلاماسىنداعى «مەملەكەتتىك قىزمەت ۇلتقا قىزمەت ەتۋ كەرەك» دەگەن ءسوزدىڭ سينونيمى بولۋى ءتيىس.
زاڭ جوباسىندا مەملەكەتتىك قىزمەتكە ىرىكتەۋدىڭ جاريالىلىعى مەن ادىلدىگىن ورناتۋعا باعىتتالعان شارالار قامتىلدى. ول كەزدە تەستىلەۋ مەملەكەتتىك ورگاندارداعى كونكۋرستىق ىرىكتەۋدەن تىس ءتاۋەلسىز وتكىزىلەتىن بولادى. تەستىلەۋدە العان باعاسىنا قاراي ازاماتتارعا كونكۋرسقا قاتىسۋ قۇقىن بەرەتىن سەرتيفيكات تاپسىرىلادى.
يلياس قوجابەكوۆ,
عىلىمي ساراپتاما جانە تالداۋ ينستيتۋتىنىڭ ۇيلەستىرۋشىسى, قۇقىق ماگيسترى:
– بۇگىنگى كۇنى كەز كەلگەن جاستىڭ ەشقانداي «اكە-كوكەسىنسىز» وسۋىنە مۇمكىندىگى بار. بىراق, ول ءۇشىن الدىمەن ىسكەر, ءوز سالاسىنىڭ ناعىز مامانى بولۋى شارت. بىراق, «كوكەسىز» ءوسۋدىڭ ءبىر ەسكەرەر تۇسى, ول قاجىرلى ەڭبەكتى, شىدامدىلىقتى, سوسىن ۇزاق ۋاقىتتى تالاپ ەتۋى مۇمكىن, كەي كەزدەرى.
بىراق, قانىمىزعا ءسىڭىپ قالعان ادەت بولسا كەرەك, قولايلى قىزمەتكە جايعاسۋ ءۇشىن قاشان دا «كوكە» ىزدەيتىن ادەتىمىز بار عوي ءبىزدىڭ.