استانادا قازاقستاننىڭ ەڭبەك ەرى, مەملەكەتتىك سىيلىقتىڭ لاۋرەاتى, اسا كورنەكتى كومپازيتور ەركەعالي راحماديەۆ اتىنداعى ءى حالىقارالىق بايقاۋدىڭ شىمىلدىعى ءتۇرىلدى.
بۇل شارانى قر مادەنيەت جانە سپورت مينيسترلىگى مەن قازاق ۇلتتىق ونەر ۋنيۆەرسيتەتى ۇيىمداستىرىپ وتىر. بايقاۋعا رەسەي, قىرعىز جانە باسقا دا ەلدەردەن ۇمىتتەرىن ۇكىلەپ كەلگەن 100-دەن اسا دارىندى جاستار قاتىسىپ, ۆوكالدىق ونەر جانە حوردى ديريجەرلەۋ دەگەن ەكى اتالىم بويىنشا ءتورت كۇن باق سىنايدى.
ۇلتتىق ونەردە وزگەشە ءىز قالدىرعان ەركەعالي اعامىز تۋرالى تولعانىپ تا, تولعاپ تا جازۋعا بولادى. قازاق مۋزىكاسىن تەرەڭ زەرتتەپ, زەردەلەپ كەتكەن احمەت جۇبانوۆ پەن كورنەكتى كومپازيتور مۇقان تولەباەۆتان كەيىن ساز ونەرىندە العاش اۋىزعا ىلىگەتىن دە – وسى كىسى. ونىڭ كومپوزيتورلىق قارىمى, ءارى-بەرىدەن سوڭ قايراتكەرلىك قىرى تۋرالى دا پاراساتتى ءسوز كوپ ايتىلادى. وتىز جىلعا جۋىق قازاقستان كومپوزيتورلار وداعىنىڭ توراعاسى بولا ءجۇرىپ, تالاي تالانتتى جاستىڭ تۇساۋىن كەستى. الماتىداعى قۇرمانعازى اتىنداعى مەملەكەتتىك كونسەرۆاتورياعا جەتەكشىلىك ەتتى. ەلىمىز تاۋەلسىزدىك العان ەلەڭ-الاڭ شاقتا مادەنيەت ءمينيسترى بولدى. حالىق قالاۋلىسى بولىپ, ەلدىڭ ءسوزىن سويلەدى.
ورىستىڭ ءراحمانينوۆى سەكىلدى راحماديەۆ تە – ۇلتتىق ونەردىڭ ءورىسىن ورىستەتكەن تۇلعا. ول وتاندىق سيمفونيالىق, وپەرالىق, ۆوكالدى-اسپاپتىق, كامەرالىق شىعارمالاردىڭ جانرلىق سالالارىن بايىتتى. سيمفونيالىق شىعارمالاردا قازاق كۇيلەرىنىڭ ىشىك يىرىمدەرىن اشا وتىرىپ, توگىلتىپ جەتكىزدى. مىسالى, وسى باعىتتا جاڭاشا ورىلگەن «دايراباي كۇيى» الەمدەگى «مەن» دەگەن تۋىندىلارمەن يىقتاسادى. ونىڭ «قامار سۇلۋ», «الپامىس», «تىڭ تىنىسى» وپەرالارىن, «امانگەلدى», «تولعاۋ», «مەيرام كۇيى», «قۇداشا دۋمان» اتتى سيمفونيالىق پوەمالارى مەن «سالەم ساعان, ايااستان», «مەرەكەلىك كانتاتا» جانە «كونستيتۋتسيا تۋرالى پوەما» كانتاتالارىن كلاسسيكالىق مۋزىكانىڭ ءبىر بيىگى دەسەك بولادى.
وسىنداي الىپ تۇلعا اتىنداعى حالىقارالىق بايقاۋدىڭ ەلورداداعى قازاق ۇلتتىق ونەر ۋنيۆەرسيتەتىندە ءوتۋى تەگىن ەمەس. اعامىز ءومىرىنىڭ سوڭعى جىلدارىندا وسى ونەر ورداسىنىڭ دامۋىنا ەرەن ۇلەس قوسىپ, جەلكىلدەپ ءوسىپ كەلە جاتقان تالانتتى جاستارعا ۇلاعاتتى ۇستاز بولا ءبىلدى. يگىلىكتى شارانىڭ اشىلۋىندا اتالعان ۋنيۆەرسيتەتتىڭ رەكتورى ايمان مۇساقوجاەۆا ارداقتى ازاماتتىڭ ءومىرى مەن ونەرىنە ايرىقشا توقتالىپ, مازمۇندى وي ءوربىتتى. كومپوزيتوردىڭ ومىرلىك جارى بولعان كلارا اپاي راحماديەۆا دا ونەر تارلانى جايىنداعى ادەمى ەستەلىكتەرىمەن ءبولىستى.
سوندىقتان, ءبىز بايقاۋعا قاتىسۋشىلارعا اق جول تىلەي وتىرىپ, ونىڭ قورىتىندىسى جايىندا گازەتىمىزدىڭ الداعى ساندارىندا كەڭىرەك جازاتىنىمىزدى ايتپاقپىز.
ازامات ەسەنجول
