قادىرلى وتانداستار!
سىزدەردى ءيسى مۇسىلمان بالاسى اسىعا كۇتەتىن, ون ەكى ايدىڭ سۇلتانى بولعان قاسيەتتى رامازان ايىنىڭ كەلۋىمەن شىن جۇرەكتەن قۇتتىقتايمىن! ءار شاڭىراققا بىرلىك پەن بەرەكە, باقىت پەن شاتتىق تىلەيمىن! رامازان ايى قۇتتى بولسىن!
اللا تاعالا قاسيەتتى قۇراندا: «ۋا, يمان كەلتىرگەندەر! وزدەرىڭە دەيىنگى قاۋىمدارعا پارىز ەتىلگەندەي تاقۋالىققا جەتۋلەرىڭ ءۇشىن سەندەرگە دە ورازا ۇستاۋ پارىز ەتىلدى» («باقارا» سۇرەسى, 183-ايات) دەپ باياندايدى. شاريعاتىمىز بويىنشا باليعاتقا تولعان, اقىل-ەسى دۇرىس ءاربىر مۇسىلمانعا رامازان ايىندا ورازا ۇستاۋ – پارىز. الايدا جولاۋشىلار, ناۋقاس جاندار مەن سىرقاتى اسقىنىپ كەتۋىنەن قاۋىپتەنگەن ادامدار, سونداي-اق جۇكتى نەمەسە ەمىزۋلى بالاسى بار ايەلدەر ورازا ۇستاۋدى كەيىنگە قالدىرۋىنا بولادى. بۇعان شاريعاتىمىز رۇقسات بەرەدى.
رامازان ايىنىڭ قادىرى مەن قاسيەتىن تەرەڭ تۇسىنگەن ىزگىلەر ورازاعا التى اي قالعان ساتتەن باستاپ: «راببىمىز, ءبىزدى رامازان ايىنا امان-ەسەن جەتكىزە گور!» دەپ دۇعا جاساعان. سان عاسىردان بەرى يسلام ءدىنىن رۋحاني تىرەگى ەتكەن حالقىمىز بەرەكەلى رامازان ايىن ەرەكشە دايىندىقپەن كۇتەدى. ساۋاپتار ەسەلەنىپ جازىلاتىن ايدا اۋىزاشار بەرىپ, كومەككە مۇقتاج جاندارعا ءپىتىر ساداقاسىن ۇلەستىرىپ, ۇلكەندەردىڭ العىسى مەن باتاسىن الۋعا تىرىسادى. ورازادا يگى نيەتپەن ورىندالاتىن ىزگى امالدار بۇگىندە سالت-داستۇرىمىزگە اينالىپ, ۇرپاقتان-ۇرپاققا جالعاسىپ كەلەدى.
رامازان – اللا تاعالانىڭ مۇسىلماندارعا بەرگەن ۇلى سىيى, نىعمەتى. قاسيەتى مەن شاراپاتى مول ايدا كۇنالارىمىزدان ارىلىپ, ساۋاپ جيناۋعا, جان-دۇنيەمىزدى تازارتۋعا تىرىسقان ابزال. ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن) ءوز ۇمبەتىن: «بۇل ايدا ءجاننات ەسىكتەرى اشىلادى. ورازا تۇتقان ادامنىڭ الدىڭعى جانە كەيىنگى كۇنالارى كەشىرىلەدى» دەپ سۇيىنشىلەگەن.
رامازاندا اۋىز بەكىتكەن ءيسى مۇسىلمان بالاسى ءوزىن ءىشىپ-جەۋدەن عانا شەكتەمەي, جانى مەن ءتانىن جاماندىقتان ساقتاپ, ىزگىلىككە ۇمتىلادى. ءىس-ارەكەتىن مۇسىلمانعا ءتان ادەپ اياسىندا ورىنداۋعا تىرىسادى. ويتكەنى رامازان – كەز كەلگەن ىزگى امالدى رياسىز نيەتپەن جاساۋعا تاربيەلەيتىن, ادامدى تاقۋالىققا ۇيرەتەتىن اي.
رۋحاني كەمەلدەنۋ ايى – رامازاندا بارىنشا ادەپسىز ارەكەت پەن قاتە-كەمشىلىكتەن ارىلۋدى كوزدەگەن ادام ادەپ بىلمەس جانداردىڭ دورەكى ارەكەتتەرىن كەشىرىپ, سىپايى تۇردە «مەن ورازامىن» دەپ كەشىرىم جولىن ۇستانادى. كىسىنىڭ كەمشىلىگىنە سابىر ەتۋ دە – ۇلكەن ساۋاپ. اللا تاعالا «شۋرا» سۇرەسىنىڭ 43-اياتىندا: «ارينە, كىم سابىر ەتىپ, كەشىرىمدى بولسا, داۋ جوق, ىستەردىڭ ەڭ ماڭىزدىسى وسى» دەگەن.
اشتىق پەن شولگە ءتوزىپ, اللا رازىلىعىن الۋدى شىنايى نيەت ەتكەن ادامعا بەرىلەتىن سىي مەن قۇرمەت ەرەكشە بولماق. اللا تاعالا قۇدسي حاديستە: «اۋزى بەرىك ادام ءىشىپ-جەۋىن مەن ءۇشىن دوعاردى. ورازا – مەن جانە قۇلىمنىڭ اراسىنداعى عيبادات. وعان بەرىلەتىن سىيدى مەن عانا ولشەپ, مەن بەرەمىن. اۋزى بەرىك قۇلىمنىڭ اشتىق پەن شولدەۋ سەبەبىنەن شىققان اۋىز ءيىسى مەن ءۇشىن ميسك اتىرىنەن دە قايىرلى» دەگەن.
رامازان – راببىمىزدىڭ مەيىرىم-ماحابباتىنا بولەنەتىن اي. بەرەكەلى, ساۋابى مول ايدا اللانىڭ مەيىرىمىنە بولەنىپ, ءاربىر ىزگى امالىمىزدىڭ جاقسىلىعى ەسەلەنىپ جازىلعاي! ەلىمىز امان, جەرىمىز تىنىش, تاۋەلسىزدىگىمىز باياندى بولعاي! جاراتۋشى جاببار يەمىز كەلەر جىلعى ورازا ايىنا امان-ەسەن جەتۋىمىزدى ءناسىپ ەتكەي! ءامين!
ناۋرىزباي قاجى تاعانۇلى, قمدب
توراعاسى, باس ءمۇفتي
