جاڭالىقتار

رەفورمالاردى جۇزەگە اسىرۋ –ۇلكەن جاۋاپكەرشىلىك

IMG_1854

مەملەكەت باسشىسى جاريالاعان بەس ينستيتۋتسيونالدىق رەفورمانى جۇزەگە اسىرۋعا باعىتتالعان «مەملەكەتتىك قۇرىلىستىڭ الداعى 100 ناقتى قادامى» ۇلت جوسپارىن ىسكە اسىرۋ بويىنشا ەلوردادا قانداي جۇمىستار اتقارىلىپ جاتقانى جونىندە«نۇر وتان» پارتياسى استانا قالالىق فيليالى توراعاسىنىڭ ءبىرىنشى ورىنباسارى ساپار احمەتوۆپەن اڭگىمەلەسكەن ەدىك.

– ساپار قايراتۇلى, ەلدەگى قۋاتتى ساياسي كۇشكە اينالعان «نۇر وتان» پارتياسى ەلباسى جۇكتەگەن مىندەتتەردىڭ ورىندالۋىنا بەلسەندى ارالاسىپ, الەۋمەتتىك-ەكونوميكالىق ساياساتتى جۇزەگە اسىرۋ بارىسىندا ءتيىمدى پارتيالىق باقىلاۋ ورناتىپ كەلەدى.  اڭگىمەمىزدى مەملەكەت باسشىسى جاريالاعان بەس رەفورمانى جۇزەگە اسىرۋدىڭ 100 قادامى نەگىزىندەگى پارتيانىڭ قالالىق فيليالى اتقارىپ جاتقان ىستەرىنەن باستاساق…

– مەملەكەت باسشىسىنىڭ بەس ينستيتۋتسيو­نالدىق رەفورماسى – مەملەكەتتىك قۇرىلىمدى, ونىڭ ساياسي-ەكونوميكالىق الەۋەتىن سان-سالالى قىرىنان  دامىتاتىن وتە اۋقىمدى جوبا. بۇل – قازاقستان مەملەكەتتىلىگىن نىعايتىپ, جارقىن بولاشاققا جەتەلەيتىن ناقتى جوسپار. ەلىمىز ءۇشىن ماڭىزدى رەفورمالاردى جۇزەگە اسىرۋ «نۇر وتان» پارتياسىنا دا ۇلكەن جاۋاپكەرشىلىك جۇكتەپ وتىر. پارتيا بەس ينستيتۋتسيونالدىق رەفورمانى قامتيتىن «100 ناقتى قادام» ۇلت جوسپارىن جۇزەگە اسىرۋ جونىندەگى ۇسىنىمداردىڭ اۋقىمدى جيىنتىعىن ازىرلەدى. ەلوردالىق فيليال دا وسى مىندەتتەردەن تىسقارى قالماي, جەرگىلىكتى ۋاكىلەتتى ورگاندارمەن بىرلەسىپ, ءبىرشاما ءىستى قولعا الدى.  ايتالىق, پارتيا مۇشەلەرى, قالالىق ءماسليحات دەپۋتاتتارى ۇكىمەت تاراپىنان قۇرىلعان  توپتاردا جۇمىس ىستەپ,  كەلەلى ماسەلەلەردى شەشۋگە ءۇن قوسىپ, وي-ۇسىنىمدارىن بىلدىرۋدە. ماسەلەن, «نۇرلى جول – بولاشاققا باستار جول» جولداۋىندا ەلباسى مەملەكەتتى الەۋمەتتىك-ەكونوميكالىق دامىتۋ باعىتىنداعى جوبالارعا بولىنەتىن قارجىنىڭ ءتيىمدى ءارى وڭتايلى پايدالانىلۋىنا قاتاڭ پارتيالىق باقىلاۋ ورناتۋ كەرەكتىگىن ەرەكشە تاپسىرعانى بەلگىلى. وسىعان بايلانىس-تى پارتيانىڭ ەلوردالىق ماسليحاتتاعى فراكتسيا مۇشەلەرى قالانىڭ ينفراقۇرىلىمدارىن دامىتۋعا بولىنگەن قاراجاتتىڭ دۇرىس جۇمسالۋىن ايرىقشا قاداعالاپ وتىر. مىسالى, «نۇرلى جول» باعدارلاماسى اياسىندا استانا اۋەجايىنىڭ ۇشىپ-قونۋ جولاعىن كەڭەيتىپ, جاڭا تەرمينالىن سالۋ ءۇشىن ەلباسى 29 ملرد تەڭگە ءبولۋدى تاپسىردى. وسى قارجىنىڭ ءار تيىنى بوسقا شاشىلماۋى – پارتيا مۇشەلەرىنىڭ باقىلاۋىندا. بۇگىندە نىساندى جاڭعىرتۋ جۇمىستارى ويداعىداي ءجۇرىپ جاتىر. بۇيىرتسا, اەروپورتتىڭ قايتا جاڭعىرتىلعان نۇسقاسى مەجەلەنگەن مەرزىمدە اياقتالادى دەگەن  سەنىمدەمىز.

قازىرگى كۇنى «ەكسپو-2017» كورمە كەشەنى قۇرىلىسىن سالۋ دا – باستى مىندەتتەردىڭ ءبىرى. ونىڭ نىساندارى ۋاقىتىلى اياقتالۋىنا «نۇر وتاننىڭ» قالالىق فيليالى دا مۇددەلىلىك تانىتىپ وتىر. بۇل كورمە كەشەنى دە ۋاقىتىلى سالىنىپ بىتەدى دەگەن سەنىم بار.

جالپى, «نۇر وتاننىڭ» استانالىق فيليالى بولعاندىقتان, بىزگە دەگەن تالاپ تا جوعارى, جاۋاپكەرشىلىك تە ۇلكەن. سەبەبى, ەلدىڭ ەلورداعا دەگەن كوزقاراسى ەرەكشە. مۇندا ءاربىر ءىس ءمىنسىز اتقارىلىپ, استانالىق دەڭگەيگە ساي بولۋى كەرەك. قاداعالاۋ ماسەلەلەرى دە, ءتارتىپ تە قاتاڭ بولۋى ءتيىس.  ءبىزدىڭ پارتيا مۇشەلەرى وسى ماقسات ۇدەسىنەن شىعۋعا بارىنشا كۇش سالىپ كەلەدى.

– ەلىمىزدەگى ستراتەگيالىق باعدارلامالار مەن «نۇر وتان»پارتياسى قابىلداعان قۇجاتتار ۇندەس كەلەدى. «100 ناقتى قادام» ۇلت جوسپارىندا تۇزىلگەن ماسەلەلەردى شەشۋگە ارنالعان پارتيالىق  جوبالار توڭىرەگىندە وي بولىسسەڭىز.

– «نۇر وتاننىڭ» مەملەكەتتىك ساياساتتتى جۇزەگە اسىرۋعا باعىتتالعان جوبالارى بارشىلىق. سونىڭ ءبىرى – وتاندىق بيزنەسكە جان-جاقتى كومەك كورسەتۋگە جانە كاسىپكەرلىك باستامانى جۇزەگە اسىرۋعا باعىتتالعان «مىقتى بيزنەس – قۋاتتى مەملەكەت» جانە «ارداگەرلەردى ارداقتايىق!», «ءساتتى قادام», باسقا دا كوپتەگەن جوبالاردى اتاپ وتۋگە بولادى. بيىل جەڭىستىڭ 70  جىلدىعىنا وراي «ارداگەرلەردى ارداقتايىق!» اكتسياسى شەڭبەرىندە كوپتەگەن شارالار اتقاردىق. وسى جوبا بويىنشا, اسىرەسە, باستاۋىش پارتيا ۇيىمدارى, «جاس وتان» جاستار قاناتى وتە بەلسەندى جۇمىس ىستەدى. پارتيانىڭ ەلوردالىق فيليال مۇشەلەرىنىڭ بەلسەندى توبى جىلدىڭ باسىندا 328 ارداگەردى قامقورلىققا الدى. سونىڭ ىشىندە 100-گە تارتا ارداگەردىڭ ءۇي-جايى جوندەۋدەن وتكىزىلدى. قارتتارعا قاجەتتى زاتتاردىڭ ءبارى الىنىپ بەرىلدى.  ءبىز وتكەن جىلدىڭ اياعىندا ارداگەرلەرىمىزدىڭ نەگە مۇقتاج ەكەندىگىن ءبىلۋ ءۇشىن ارنايى ساۋالناما ۇيىمداستىرعانبىز.  سونىڭ قورىتىندىسى بويىنشا قارتتارعا قاجەتتىلىكتىڭ ءبارى تۇگەلدەندى. ەم-دومىنا جاعداي جاساسىپ, تۇراتىن ءۇيىنىڭ كىرەبەرىسىنە دەيىن جوندەلدى. مەن ءوزىم دە ءبىرتالاي ارداگەردىڭ ۇيىندە بولدىم. حال-جاعدايلارىن سۇراپ, ماسەلەسىنە قانىقتىم.بۇگىندە استانادا تۇراتىن مايدانگەرلەردىڭ ءبارى پاتەرمەن قامتاماسىز ەتىلدى. بۇل دا قولعا الىنعان جۇمىستاردىڭ ءبىر ناتيجەسى دەپ بىلەمىز.

– جاڭا ءوزىڭىز ايتىپ وتكەن «ءساتتى قادام» جوباسى بويىنشا استانادا قانداي ىستەر اتقارىلىپ جاتىر؟

– «ءساتتى قادام»  – جوعارى وقۋ ورىندارىن ءبىتىرۋشى جاستارعا ارنالعان جوبا. وسى ارقىلى «نۇر وتان» تۇلەكتەردىڭ بەلگىلى ءبىر مەكەمەلەردە تاعىلىمدامادان ءوتىپ, قىزمەت ساتىسىمەن ورلەۋىنە مۇمكىندىك جاسايدى. جاستار العان بىلىمدەرىن ناقتى تاجىريبەدە سىناي الادى. بۇل جوبا 2013 جىلدىڭ شىلدە ايىندا جولعا قويىلسا, سول جىلى وقۋ ورىندارىن بىتىرگەن جاستاردان 394 ءوتىنىش قابىلدادىق.  ولاردىڭ ىشىندە 149-ى اڭگىمەلەسۋدەن ءوتىپ, 79-ى ءارتۇرلى مەكەمەلەر مەن ۇلتتىق كومپانيالاردا تاعىلىمدامادان ءوتتى. سونىڭ 19-ى ءۇش ايلىق تاعىلىمدامادان كەيىن سول جەرگە تۇراقتى جۇمىسقا قابىلداندى. ال بىلتىر  جۇمىسقا ورنالاسۋ ءۇشىن تاعىلىمدامادان وتۋگە  909 ءوتىنىش ءتۇستى. ونىڭ 154-ءى اڭگىمەلەسۋدەن ءوتىپ, سىناق مەرزىمىمەن جۇمىسقا جىبەرىلدى.  ءوزىن-ءوزى كورسەتىپ, قارىم-قابىلەتىن كورسەتكەن 56 جاس جۇمىسقا قابىلداندى. بۇل – ءبىز ءۇشىن ۇلكەن جەتىستىك. وسى باعىتتاعى جۇمىستار بيىل تامىز ايىندا تاعى دا جالعاسىن تابادى. بۇگىندە كەيبىر كاسىپورىندار شىعىستارىن قىسقارتىپ, ۇنەمشىلدىككە كوشىپ جاتقانى بەلگىلى. سوعان قاراماستان تۇلەكتەردى جۇمىسقا ورنالاستىرۋ كورسەتكىشىمىز بىلتىرعىدان كەم تۇسپەۋ كەرەك دەگەن ماقسات قويىپ وتىرمىز.

جاستاردى, سونىڭ ىشىندە كاسىبي تۇرعىدان جەتىلۋگە ۇمتىلعاندارعا قولداۋ كورسەتىپ, ولاردان زامان تالابىنا ساي باسقارۋشىلار دايارلاپ شىعارۋعا ارنالعان «جاستار كادرلىق رەزەرۆى» جوباسى بويىنشا دا اۋقىمدى شارالاردى ىسكە اسىرۋدامىز. بىلتىر كاسىبي جاعىنان شىڭدالعىسى كەلگەن  17 ادامدى بىلىكتىلىكتى جەتىلدىرۋ كۋرسىنان وتكىزىپ, لاۋازىمىن جوعارىلاتتىق.

اتالمىش جوبالاردان جوعارى ارنايى ءبىلىمى جوق جاستار دا شەت قالمايدى. «نۇر وتان» پارتياسى  بەلگىلى ءبىر كاسىبى جوق جاستارعا دا قول ۇشىن بەرەدى. اسىرەسە, بازارلاردا قارا جۇمىس ىستەپ جۇرگەن قىز-جىگىتتەردىڭ بەلگىلى ءبىر كاسىپتىڭ يەسى اتانۋى ءۇشىن قالالىق جۇمىسپەن قامتۋ جانە الەۋمەتتىك باعدارلامالار باسقارماسىمەن بىرلەسىپ, بىرقاتار شارالاردى قولعا الدىق. ولارعا اقىل-كەڭەس بەرىپ, قايتا دايارلاۋدان وتۋگە, سىرتتاي جانە كەشكى وقۋعا تۇسۋگە جاردەمدەستىك. ەڭبەك نارىعىندا قات ماماندىقتارعا ءبىراز جاستاردى باۋلىدىق.

– ەندى  «نۇر وتان» پارتياسى استانا قالالىق فيليالى جونىندە ايتا كەتسەڭىز.

– «نۇر وتاننىڭ» استانا قالالىق فيليالىندا  325 باستاۋىش پارتيا ۇيىمى , 6 اۋماقتىق بولىمشە بار. بۇگىندە قالاداعى پارتيا مۇشەلەرىنىڭ سانى 35 مىڭعا جەتتى. «نۇر وتانعا» ەل ۇلكەن سەنىم ارتىپ وتىر. سوندىقتان سول سەنىم ۇدەسىنەن شىعىپ,  اۋقىمدى مىندەتتەردى شەشۋگە ساقاداي-ساي بولۋ – ءبىزدىڭ باستى ماقساتىمىز.

قىمبات نۇرعالي

 

تاعىدا

ۇقساس جاڭالىقتار

پىكىر ۇستەۋ

Back to top button