ەلوردا كۇنى قارساڭىندا الەمدىك دەڭگەيدەگى تورت ءپىسىرۋدىڭ شەبەرى ماسكەۋلىك رەنات اعزاموۆ قالا تۇرعىندارى مەن قوناقتارىنا «ءتاتتى تارتۋ» جاسادى. تاۋەلسىزدىك سارايىندا كۇنى بويى تورت ءپىسىرۋدىڭ قۇپيا تەحنولوگياسىمەن ءبولىسىپ, بارشانىڭ كونديتەرلىك سالاعا دەگەن قىزىعۋشىلىعىن ارتتىردى.
رەنات اعزاموۆ. كوپشىلىك جۇرت ونى تورت ءپىسىرۋدىڭ ەليتالىق شەبەرى دەپ تانيدى.
جەتى جاسىندا العاش رەت پيروگ پىسىرگەن سارى بالا, كەيىننەن سوچي قالاسىنداعى كۋلينارلىق ۋچيليششەنى بىتىرگەن. بۇگىندە كونديتەرلىك ونەردەن الەم چەمپيونى اتاندى. تورت ءپىسىرۋدىڭ كۇردەلى تەحنولوگياسىن مەڭگەرگەن اسپاز ءتاتتى ءپىسىرۋدىڭ كەرەمەت تەحنولوگياسىن, مەكتەبىن قالىپتاستىردى. كۋلينارلىق ونەر تۋىندىسىن جاسايتىن شەبەر الەم بويىنشا تاپسىرىس قابىلدايدى. الەمنىڭ تۇكپىر-تۇكپىرىندەگى باي-باعلاندار مەن اتاقتى شوۋ-بيزنەس وكىلدەرى – اعزاموۆتىڭ تۇتىنۋشىلارى. ويتكەنى, ول ءار ادامعا ارناپ جاڭا تۋىندى جاساپ شىعارادى. وسى ۋاقىتقا دەيىن تاپسىرىسپەن ۇيلەنۋ تويىنا ارناپ پىسىرگەن 2700-دەن استام تورتى ءبىرىن-ءبىرى قايتالاماعان. شىعارماشىلىق ويدىڭ ناعىز جەتىستىگى دەۋگە بولادى.
«ينتەللەكتۋالدى كونديتەر»
بار بولعانى 34 جاستاعى جىگىت – ءىرى كونديتەرلىك كومپانيانىڭ يەسى. ماماندىعىن جانىنداي سۇيەدى. كەزدەسۋدە ول استانالىقتارعا ءتاتتى الەمنىڭ قۇپياسىن جايىپ سالدى. ومىرلىك جولىنداعى تىنىمسىز ەڭبەگىن, جەتىستىككە جەتۋدىڭ جولدارىن, اسپازدىق ونەردىڭ قىر-سىرىن بار ىنتاسىمەن ءبولىستى.
– الدىمەن, استانانىڭ سۇلۋلىعىن ايتقىم كەلەدى. جىل سايىن قۇلپىرىپ كەلە جاتقان قالا ساۋلەتتى عيماراتتارىمەن, تازالىعىمەن, تىنىشتىعىمەن ەرەكشەلەنەدى. وسى اسەم قالانىڭ تۋعان كۇنى قارساڭىندا شەبەرلىك ءدارىس وتكىزىپ وتىرعانىمدى مارتەبە سانايمىن, – دەيدى ول.
سەميناردىڭ تاقىرىبى – «ينتەللەكتۋالدى كونديتەر». اتاۋىن ءوزى ۇسىنعان. تورت ءپىسىرۋدىڭ ءوزى ينتەللەكتۋالدى ءبىلىمدى قاجەت ەتەدى دەيدى شەبەر.
جيىنعا قاتىسۋشىلاردىڭ قاتارىندا ەلوردالىق كافە, مەيرامحانا يەلەرى, كونديتەرلىك سالانىڭ ماماندارى جانە رەنات اعزاموۆتىڭ الەۋمەتتىك جەلىدەگى تۇراقتى وقىرماندارى بولدى.
شەبەرلىك سىنىپتا تانىمال اسپاز كونديتەرلىك سالانىڭ ەڭ باستى ونىمدەرى سانالاتىن – جۇمىرتقا, قانت جانە ۇننىڭ ءبىز بىلمەيتىن قىزىقتارىمەن ءبولىستى. ماسەلەن, ءبىر جۇمىرتقانىڭ ءوزىن پايدالاناردا ونىڭ قۇرامىنداعى اقۋىز بەن سارىۋىزدىڭ مولشەرىنە نازار اۋدارۋ كەرەك ەكەن. كەيبىر تورتتارعا بەلگىلى مولشەردە سارىۋىز قولدانىلسا, ونى ەسەپتەۋدىڭ وزىندىك جولدارى دا بار. قاراپايىم جۇمىرتقانى قانداي تەمپەراتۋرادا ساقتاۋ كەرەك, قانداي ءتۇرىن, قالاي پايدالانۋ كەرەكتىگىنە دەيىن قىزىقتى مالىمەتتەر ۇسىندى. تورت ءپىسىرۋدىڭ تەحنولوگياسى تۇنىپ تۇرعان قىزىقتى ماتەماتيكا دەرسىز! ال, وعان دەكوراتسيا جاساۋ ءۇشىن تەرەڭ ءبىلىم كەرەكتىگى ءوز الدىنا.
دارىستەرى ترەندكە اينالعان…
اعزاموۆ ءوزىنىڭ كۇندەلىكتى جۇمىس جوسپارىمەن دە تانىستىردى. تاڭعى ساعات التىدان باستاپ كەشكە دەيىن جۇمىستا بولسا, تۇنىمەن نوۋتبۋك قاراپ, جاڭا دۇنيەلەر ويلاپ تابۋعا تىرىسادى. جاڭالىققا جانى قۇمار ول ءتاتتى ءپىسىرۋدىڭ تەحنولوگياسىنا ءۇڭىلىپ, تىڭ دۇنيەلەر ويلاپ تاپقاندى ۇناتادى.
بۇگىندە ونىڭ «پرەميۋم-كلاستاعى» دارىستەرى ترەندكە اينالعان. كونديتەرلىك سالانىڭ ماماندارى اعزاموۆتىڭ جولىن قۋعىسى كەلەدى, تاعىلىمداماسىن الىپ, شاكىرت بولۋدى ارماندايتىنى جاسىرىن ەمەس. ال ونىڭ «فيلي بەيكەر» كومپانياسىندا دايىندالعان تورتتارى – ناعىز ونەر تۋىندىسى. مۇندا ءتاتتى تورتتىڭ قاراپايىم تۇرىنەن باستاپ, كۇردەلىسىنە دەيىن وندىرەدى. اعزاموۆتىڭ ايتۋىنشا, ءتاتتى پىسىرۋگە 100-دەن استام ادام جۇمىلدىرىلادى.
– ءتۇرلى تاپسىرىستار كەلىپ تۇسەدى. اراسىندا جاسالۋى قاراپايىم بولىپ كەلەتىنى, كۇردەلى تەحنولوگيانى قاجەت ەتەتىنى دە بار. ءبىز ءاربىر بولشەگىنە دەيىن تۇنىپ تۇرعان كرەاتيۆ بولعانىن قالايمىز. ءبىز ەشقاشان تۇتىنشۋىلارعا جالعان سويلەمەيمىز. ياعني, سالماعى اۋىر, بيىكتىگى بىرنەشە مەتر بولاتىن تورتتىڭ قۇرامىندا مىندەتتى تۇردە قانت, جۇمىرتقا, ۇن ونىمدەرىنىڭ كولەمى كوبىرەك قولدانىلادى. كالورياسى از ءتاتتى بولمايدى. سوندىقتان, وزگەلەر سەكىلدى كەيبىر ونىمدەرىمىزدى ديەتالىق دەپ ايتا المايمىز. بىراق ەشقانداي حيميا قولدانىلمايدى, – دەيدى اعزاموۆ.
ايتۋىنشا, ونىڭ كومپانياسىندا دايىندالاتىن عاجايىپ تورتتار شوكولادپەن بەزەندىرىلەدى. جۇقا جانە قالىڭ ءتۇرلى-ءتۇستى قاباتتار تورتتىڭ بارىنشا اجارىن اشادى. كەيىپكەرلەردى جاساۋدا كوپ ىزدەنۋ قاجەت. تۇلعاسىن اينىتپاي تانىتۋ ءۇشىن الدىمەن پىشىندەر جاسالىنادى. ونىڭ ءوزى بىرنەشە كۇن ۋاقىتتى الادى. ماسەلەن, اعزاموۆ اتقىلاپ جاتقان ناعىز فونتان دايىنداۋ ءۇشىن 1,5 جىل ىزدەنگەن.
سونىمەن, 300-دەن استام ادام قاتىسقان اعزاموۆتىڭ سەمينارى جوعارى دەڭگەيدە ءوتتى. ونىڭ ايتقان اسپازدىق قۇپيالارىن استانالىقتار ۇيىپ تىڭدادى. قىزىقتى باعدارلاما ۇسىنا بىلگەن وعان كوپتەگەن ساۋالدار دا قويىلدى. شارا سوڭىندا تاتتىدەن اۋىز تيگەن جۇرت, تانىمال شەبەرمەن ەستەلىككە فوتوعا ءتۇسۋدى ۇمىتپادى.
گۇلميرا ايماعانبەت
