ەلوردالىق ەمدەلۋشىلەر ەندىگى ۋاقىتتا دارىگەرلەردەن رەتسەپت الۋ ءۇشىن كابينەت جاعالاپ, كەزەك كۇتپەيتىن بولادى. دەنساۋلىق ساقتاۋ جانە الەۋمەتتىك دامۋ مينيسترلىگى وسى جۇيەنى وڭتايلاندىراتىن بولدى.
اتالمىش ۆەدومستۆو باسشىسى تامارا دۇيسەنوۆانىڭ ايتۋىنشا, كەلەسى ايدان باستاپ استانادا پاتسيەنتتەرگە ارنالعان رەتسەپتتەر الۋدىڭ اۆتوماتتاندىرىلعان جۇيەسى پيلوتتىق رەجيمدە ەنگىزىلمەك.
– بىزدەگى پروبلەمالاردىڭ ءبىرى – رەتسەپت الۋ. سول بويىنشا ادام اۋەلى مەدبيكەگە بارادى, مەدبيكە ونى ۋچاسكەلىك دارىگەرگە, دارىگەر ءبولىم مەڭگەرۋشىسىنە جىبەرەدى. پاتسيەنت رەتسەپت الام دەگەنشە ءۇش ساتىدان ءوتىپ, تەك تورتىنشىسىندە عانا دارىحاناعا كەلەدى. ءبىز ويلاستىرىپ جاتقان جاڭا جوبا ازاماتتاردىڭ ۋاقىتىن ۇنەمدەپ, اۋرۋحانالارداعى كەزەك سانىن قىسقارتۋعا كومەكتەسەدى, – دەدى مينيستر.
بۇگىندە اۆتوماتتاندىرىلعان جۇيە دايىن. شىلدە ايىندا ول استانا قالاسى بويىنشا ىسكە قوسىلادى. ياعني, رەتسەپت جازىلىپ, ءدارىحاناعا اۆتوماتتى تۇردە تۇسەدى. پاتسيەنت دارىحاناعا بارىپ, كەرەكتى مەديتسينالىق پرەپاراتتارىن الادى.
تولىعىراق مەحانيزمدى مينيستر بىلايشا ءتۇسىندىردى:
– الدىمەن ناۋقاستىڭ بەلگىلى ءبىر دياگنوزى قويىلعان الەۋمەتتىك كەلىسىم-شارت جاسالادى. سوندا قانداي ءدارى تۇرلەرىن جانە قالاي قابىلداۋ كەرەكتىگى كورسەتىلەدى. بۇل تۇستا مەدبيكە الگى پرەپاراتتىڭ ءۇش ءتۇرىن جازىپ بەرەدى. دارىحاناداعىلار سونىڭ ىشىنەن وزدەرىندە بارىن تاڭداپ, پاتسيەنتكە ۇسىنادى.
