بۇگىن استانا قالاسى مادەنيەت, مۇراعاتتار جانە قۇجاتتاما باسقارماسىنىڭ ۇيىتقىسىمەن ەلوردامىزدىڭ اۋرۋحانالارىندا ەمدەلىپ جاتقان بۇلدىرشىندەر دە دۋ-دۋماننان قالىس قالمادى. دەنساۋلىعىنا بايلانىستى مەرەكەلىك شارالاردى تاماشالاي الماعان بالالاردى اننا سەدوكوۆا, ستاس كوستيۋشكين, ءمادينا سادۋاقاسوۆا, ءانشى بۇركىت, پوتاپ پەن ناستيا سىندى رەسەي مەن قازاقستاننىڭ بىرقاتار ەسترادا جۇلدىزدارى ارنايى قۇتتىقتاپ قايتتى.
مەرەكە اياسىندا انشىلەر №1 جانە № 2 قالالىق بالالار اۋرۋحاناسى, «الەۋمەتتىك قىزمەت كورسەتۋ ورتالىعى», «بالام-اي» دامىتۋ ورتالىعى سونداي-اق, «انا مەن بالا ۇلتتىق عىلىمي ورتالىعىنىڭ» ونكولوگيا ءبولىمىن ارالاپ, بالدىرعاندارعا اننەن شاشۋ شاشتى. بۇدان كەيىن بالالار بەلگىلى ونەرپازدارمەن ەستەلىك سۋرەتتەرگە ءتۇستى.
«كىشكەنتايلارعا جىلۋلىق سىيلاۋ – ۇلكەندەردىڭ باستى مىندەتىنىڭ ءبىرى. كۇلكىگە بولەنگەن بالا ەكىنشى بىرەۋدىڭ كوڭىلىن كوتەرەدى. بۇل بايلانىس ۇزىلمەسە, الەم دە باقىتتى بولماق» دەيدى اننا سەدوكوۆا. ال, وتاندىق ءارتىس بۇركىت: «بۇل شاقىرتۋدان باس تارتا المادىم. ءوزىم دە اكەمىن. بالالاردى قۋانتىپ, كىشىگىرىم بولسا دا كونتسەرت قويىپ جاتىرمىز. ءان تىڭداپ, بي بيلەپ, تەزىرەك جازىلىپ كەتسە دەگەن تىلەك بىزدىكى. سابيلەرىمىز اۋىرماسىن!» دەگەن اقجارما نيەتىن جەتكىزدى.
بۇركىت نۇراسىل
ءمادينا جاقىپ
