الداعى اقپان ايىندا ەلورداداعى ساكەن سەيفۋللين مۇراجايىنىڭ اشىلعانىنا 35 جىل تولادى. وسى جىلدار ىشىندە شەجىرەلى شاڭىراققا كوپتەگەن جادىگەر جيناقتالدى. اراسىندا ساكەن شىعارماشىلىعىنا قاتىستى توتە جازۋ مەن لاتىن گرافيكاسىمەن جارىق كورگەن ەڭبەكتەر دە بار. كەشە ولار ەل نازارىنا شىعارىلىپ, مۇراجايدا «لاتىن جانە توتە قارپىمەن جازىلعان ساكەن شىعارمالارى» اتتى كورمە اشىلدى.
ساكەن سەيفۋللين ءومىر سۇرگەن كەزەڭدە قازاق ءالىپبيى ۇلت ۇستازى احمەت بايتۇرسىنۇلى اراب گرافيكاسى نەگىزىندە قازاققا لايىقتاعان توتە جازۋدان لاتىن گرافيكاسىنا كوشىرىلدى. بۇل 1929 جىل ەدى. بۇدان بىلاي 1940 جىلعا دەيىن ەلىمىزدە جارىق كورگەن ەڭبەكتەر لاتىن ارىپتەرىمەن شىقتى. مۋزەيگە كەلۋشىلەر سونى 24 قاڭتارعا دەيىن تاماشالاي الادى.
ءبىر اتاپ وتەرلىگى, كورمەگە قويىلعان ەڭبەكتەردىڭ اراسىندا ساكەننىڭ ءتول تۋىندىلارى عانا ەمەس, ول قۇراستىرعان كىتاپتار دا بار. سونىڭ ءبىرى – 1935 جىلى الماتىنىڭ قازاقستان كوركەم ادەبيەت باسپاسىنان شىققان ىبىراي ءالتىنساريننىڭ ولەڭدەر جيناعى. ساكەننىڭ العىسوزىمەن جارىق كورگەن كىتاپقا ىبىرايدىڭ 25 ولەڭى ەنگىزىلدى.
1914 جىلى, جيىرما جاسىندا ساكەن سەيفۋلليننىڭ «وتكەن كۇندەر» اتتى تۇڭعىش ولەڭدەر جيناعى جارىق كوردى. ال ايگىلى «تار جول, تايعاق كەشۋ» مەمۋارلىق رومانى توتە جازۋمەن 1927 جىلى جانە لاتىن گرافيكاسىمەن 1936 جىلى شىقتى. كورمەگە قويىلعان ەڭبەكتەردىڭ اراسىندا 1932 جانە 1935 جىلدارى ساكەننىڭ شىعارمالارى ەنگەن «ادەبيەت مايدانى» جۋرنالى, 1973 جىلى شىققان «لوتوس» اتتى افرو-ازيالىق ولەڭدەر الماناحى, «سوتسياليستان», «ەكسپرەسس» كىتاپتارى جانە جارى گۇلباھرامعا جازعان حاتتارى بار.
