ميلليونداعان ادامنىڭ قانىمەن, كوزىنىڭ جاسىمەن, ماڭدايىنىڭ تەرىمەن كەلگەن جەڭىستىڭ باعاسى قاشان دا قىمبات.
وسى ءبىر مەرەكە مەن ءۇشىن دە وتە قاستەرلى سانالادى. ويتكەنى, اكەم ۇلى وتان سوعىسىنىڭ ارداگەرى قادىربەك ءابدىلداۇلى بار سانالى عۇمىرىن ەل يگىلىگى جولىندا ەڭبەك ەتۋگە ارناپ وتكەن ەدى. اقمولا وبلىسىنىڭ ەسىل اۋدانىنا قاراستى يگىلىك اۋىلىندا دۇنيەگە كەلگەن. ەل باسىنا كۇن تۋعان سىن ساعاتتا ءوز ەركىمەن سۇرانىپ, مايدانعا اتتانادى.1942 جىلدىڭ ناۋرىز بەن قازان ايلارى ارالىعىندا ارنايى دايىندىقتان ءوتىپ, قاراشادا ستالينگراد ءۇشىن شايقاسقا اعا سەرجانت دارەجەسىمەن كىرىسەدى. كەڭەس وداعى مەن پولشانىڭ مارشالى, ەكى مارتە كەڭەس وداعىنىڭ باتىرى كونستانتين روكوسسوۆسكي باسقارعان مايداننىڭ 24-ءشى گۆارديالىق ديۆيزياسى 72 اتقىشتار پولكىنىڭ 6-شى روتاسىندا قىزمەت اتقارادى. ال 1943 جىلى اكەمدى روستوۆ ارقىلى ءىى ۋكراينا مايدانىنا جىبەرەدى. نەمىس باسقىنشىلارمەن تالاي رەت بەتپە-بەت شايقاستا ءجۇرىپ, ءتورت رەت جارالانادى. سوعىسقا باستان-اياق قاتىسقان ول بىرنەشە وردەن-مەدالدار يەگەرى.
سوعىس اياقتالعاننان كەيىن, 1945 جىلدان 1989 جىلعا دەيىن ۇزدىكسىز مۇعالىم بولىپ ەڭبەك ەتتى. قانشاما بالالار مەن جاستاردى ءبىلىم نارىمەن سۋسىنداتىپ, ۇلكەن ومىرگە جولداما بەردى. 1982 جىلى «قازاق سسر ەڭبەك سىڭىرگەن ۇستازى» بەلگىسىمەن ماراپاتتالدى.
بويىنداعى بار ءبىلىمى مەن بىلىگىن, قاجىر-قايراتىن, سۇيىسپەنشىلىگىن شاكىرتتەرىنە ارناپ, باقىتىم – بالام دەپ ءومىر سۇرگەن اكەم «مەنىڭ بارىم – تاربيەلەگەن بىرنەشە بۋىن شاكىرتتەرىم» دەپ ايتىپ وتىراتىن ەدى. ول مەن ءۇشىن اكە عانا ەمەس, تالىمگەر ۇستازىم دا ەدى. جاسىمنان سول ابزال اكەمە ەلىكتەپ, كوركەم شىعارمالاردى قۇنىعا وقىپ, حالىق اۋىز ادەبيەتىنىڭ مول مۇراسىنا قانىقتىم. وتباسىندا تەك قانا قازاقشا سويلەپ, اكە ىقپالىمەن حالقىمىزدىڭ ادەت-عۇرپىن, سالت-ءداستۇرىن ۇيرەنىپ ءوستىم.
اكەم زەينەتكە شىققاننان كەيىن دە اركەز حالىقتىڭ اراسىنان تابىلاتىن. كەشەگى اۋىر ۋاقىتتا جەتىم-جەسىر, ءال-اۋقاتى تومەندەرگە قارايلاسىپ, قول ۇشىن بەرىپ جۇرەتىن ەدى. ءالى كۇنگە دەيىن اكەمنىڭ كومەك-جاردەمىن كورگەن تۋعان-تۋىسقاندار, كورشى-قولاڭدار ريزاشىلىقپەن ايتىپ وتىرادى.
ەندى, مىنە, سول سۇراپىل سوعىستىڭ اياقتالعانىنا دا 70 جىل ءوتىپتى. وسى ءبىر جەڭىس دەگەن شۋاقتى كۇندى جاقىنداتقان, وتتى جىلداردى باسىنان وتكەرە ءجۇرىپ, بىزگە بەيبىت عۇمىر سىيلاعان مايدانگەرلەر قاتارى كۇننەن-كۇنگە سيرەپ كەلەدى. مەن دە بۇگىن سول سۇراپىل سوعىستىڭ بەينەتىن تارتقان جان اكەمدى ەسكە الامىن. كەۋدەمدى ساعىنىش كەرنەيدى.
ال بۇگىندە ورتامىزدا جۇرگەن مايدانگەرلەردى جەڭىس مەرەكەسىمەن قۇتتىقتاپ, ەلىمىزدە بەيبىتشىلىك بەسىگى تەربەلە بەرسىن دەپ تىلەيمىن.
باقىتجامال ءابدىلدينوۆا
