قالالىق ءماسليحاتتىڭ دەپۋتاتى سايفۋدين حامحوەۆقا حالىق سەنەدى. اقمولا ءوڭىرىنىڭ تۋماسى, زارەچنىي سوۆحوزىنىڭ باس ينجەنەرلىگىنەن ورلەپ, نارىق زامانىندا «بەركات» كوپ سالالى كونسورتسيۋمىن قۇرا بىلگەن ىسكەر ازاماتپەن ماسليحاتتاعى قوعامدىق جۇمىسى جونىندە اڭگىمەلەسۋدىڭ ورايى كەلدى.
– سايفۋدين سۇلتانۇلى, الدىمەن ءسىز سايلانعان وكرۋگتىڭ قازىرگى جاي-كۇيىمەن تانىستىرا كەتسەڭىز….
– سەنىمگە سەلكەۋ تۇسىرمەۋ ەلدىڭ كوز الدىندا جۇرگەن ازاماتتار ءۇشىن ۇلكەن جاۋاپكەرشىلىك جۇگىن ارتادى. قالالىق ءماسليحاتتىڭ ءتورتىنشى شاقىرىلىمىندا ابىرويمەن قىزمەت اتقاردىم, قازىر وسىناۋ قوعامدىق جۇمىسىم بەسىنشى شاقىرىلىمعا ۇلاستى. مۇددەمىز مەن تالاپ-تىلەكتەرىمىزدى قورعايدى دەگەن ءۇمىتپەن كوپشىلىك داۋىسپەن مەنى سايلاعان №20 وكرۋگتا شامامەن 25 مىڭعا جۋىق حالىق تۇرادى. ايتا كەتەرلىگى, №1 جانە 2-شاعىن اۋداندار – قالانىڭ 1970 جىلدارى سالىنعان تاريحي بولىگى. سوندىقتان, بۇل جەردە بايىرعى تۇرعىندار باسىم, سونىمەن قاتار, ەلىمىزدىڭ ءار تۇكپىرىنەن استاناعا ارمان جەتەلەپ كەلگەن جىگەرلى جاستار دا از ەمەس. ياعني, ءبىر سوزبەن ايتقاندا, وكرۋگتەگى تۇرعىنداردىڭ دەنى – ورتا تابىستى قىزمەتكەرلەر مەن جۇمىسشىلار.
– ولار ءسىزدىڭ كومەگىڭىز بەن كەڭەسىڭىزگە كوبىنەسە قانداي ماسەلەلەرمەن جۇگىنەدى؟
– مەن سايلانعان اۋماققا قاراستى ۇيلەردىڭ باسىم بولىگى توزعان, سول سەبەپتەن تۇرعىندار كوبىنەسە تۇرمىستىق, كوممۋنالدىق ماسەلەلەر بويىنشا كومەك سۇراي كەلەدى. ايىنا ەكى مارتە سايلاۋ وكرۋگىندا قابىلداۋ وتكىزەمىن جانە ءبىر مارتە پيك توراعالارى جانە تۇرعىنداردىڭ قاتىسۋىمەن جينالىس ۇيىمداستىرىلادى. ارىز-شاعىم, تالاپ-تىلەك سول جەردە ايتىلادى.
ءبىر قۋانتارلىعى, سوڭعى ءۇش جىلدا اۋلالاردى اباتتاندىرۋ, سونداي-اق, ۇيلەر مەن جىلۋ-سۋ ماگيسترالدارىن كۇردەلى ءجوندەۋدەن وتكىزۋ باعدارلاماسىنىڭ ارقاسىندا وراسان شارۋا اتقارىلدى, ونىڭ ناتيجەسىن جىل سايىن ۇيىمداستىرىلاتىن «اۋلا مەرەكەسىندە» ايتامىز.
ودان بولەك, دەنساۋلىق ساقتاۋ, ءبىلىم بەرۋ, جولاۋشىلار تاسىمالى, جۇمىسپەن قامتۋ, باسپانا الۋ, بالاباقشادان ورىن الۋ ماسەلەلەرى بويىنشا كەڭەس, جاردەم سۇراپ كەلۋشىلەر كوپ. ءتيىستى مەكەمەلەرگە سۇرانىس جولداپ, شەشىمىن تەز ارادا شىعارۋ كۇن تارتىبىنەن تۇسپەيدى.
– ءسىز ءماسليحاتتىڭ بيۋدجەت, ەكونوميكا, ونەركاسىپ جانە كاسىپكەرلىك جونىندەگى تۇراقتى كوميسسيا توراعاسىنىڭ ورىنباسارىسىز. كوميسسيا وتىرىستارىندا سوڭعى كەزدەرى حالىققا قانداي شاراپاتتى شەشىمدەر قابىلداندى؟
– الگىندە ءوزىڭىز ايتىپ وتكەندەي, كوميسسيا قارجى باسقارماسىنىڭ جۇمىسىنا قاتىستى ماسەلەلەردى كوبىرەك قارايدى, ياعني, بيۋدجەتتىڭ ورىندالۋى بويىنشا مەملەكەتتىك ساياساتتىڭ مەيلىنشە كىدىرىسسىز, كەمشىلىكسىز جۇزەگە اسۋى مەن قالانىڭ كوممۋنالدىق مەنشىگىندەگى مەكەمەلەردىڭ جۇمىسىن قاداعالايدى. ودان بولەك كاسىپكەرلىك سۋبەكتىلەرىنىڭ اتقارۋشى ورگاندارىمەن ءوزارا ىقپالداسا جۇمىس ىستەۋىن جەتىلدىرە ءتۇسۋ, استانانىڭ ازىق-ءتۇلىك قاۋىپسىزدىگىن قامتاماسىز ەتۋ – باستى نازارداعى ماسەلە. ءتىپتى, قالا قۇرىلىسى جانە ءساۋلەت باسقارماسىنىڭ ۇسىنعان جوبالارىن ەلەكتەن وتكىزىپ, ەلوردانىڭ زاماناۋي ينفراقۇرىلىمىن دامىتۋعا دا ازدى-كوپتى ۇلەسىمىزدى قوسىپ جاتامىز. وسىعان قاراپ, دەپۋتاتتاردىڭ جۇمىسى كۇن سايىن وزگەرىپ جاتقان استانانىڭ دامۋ ديناميكاسىمەن ءبىر تىزگىندە كەلە جاتىر دەسەم ارتىق ايتقاندىق ەمەس.
ءبىر جاعىنان پەرزەنتتىك پارىز دەگەن بولادى. ەس ءبىلىپ, ەڭبەككە ارالاسقاننان بەرى وسى قالانىڭ ۇشقان قۇستاي كوركەيۋى, ءوسۋى-ءونۋى كوز الدىمدا. ەلوردا رەتىندە العاشقى قالىپتاسۋ قادامدارىنا قوسقان ۇلەسىمىزدى وكىمەت جوعارى باعالادى. الداعى «EXPO-2017» حالىقارالىق كورمەسىن ابىرويمەن اتقارۋ, پرەزيدەنت ايقىنداپ بەرگەن «قازاقستان 2050» ستراتەگياسىن بارلىق سالادا ىلگەرىلەتۋ – ءبىزدىڭ دە ۇلەسىمىزگە تيگەن اسىل بورىش.
دايىنداعان: گۇلبارشىن وكەشقىزى
