ەلوردادا ات تۇياعىنىڭ ءدۇبىرى ەستىلەتىن كۇن دە الىس ەمەس. داستۇرگە اينالعان الامان بايگە بيىل ءۇشىنشى جىل قاتارىنان ۇيىمداستىرىلادى. ءار ايماقتىڭ كىل جۇيرىگىن جينايتىن جارىس تاۋەلسىزدىكتىڭ 25 جىلدىعىنا ارنالعان.
شاشاسىنا شاڭ جۇقپايتىن سايگۇلىكتەر سالتاناتىن وتكىزۋگە «نۇر وتان» پارتياسى, قر مادەنيەت جانە سپورت مينيسترلىگى, استانا قالاسى اكىمدىگى جانە قر ۇلتتىق سپورت تۇرلەرى قاۋىمداستىعى مۇرىندىق بولىپ وتىر.
«التىن تۇلپار» ءداستۇرلى رەسپۋبليكالىق تۋرنيرىندە ەلىمىزدىڭ 14 وبلىسى جانە استانا مەن الماتى قالالارىنىڭ ارقايسىسىنان 10 سايگۇلىك سىنعا تۇسە الادى. جارىسقا ءجۇيرىك تۇقىمداردىڭ بارلىعى قاتىستىرىلادى.
الامان بايگەنىڭ جارىس جولى 51 شاقىرىمدى قۇرايدى. بايگە وتكەن جىلداعىداي ۇلكەن اۋماقتى شەڭبەردى ءتورت دۇركىن اينالىپ شابۋ ارقىلى جۇرگىزىلەدى.
ءاربىر 2 شاقىرىم سايىن بارلىعى جەتى باقىلاۋ بەكەتى ورنالاسادى. بەكەتتەردە تەلەكامەرالار مەن تورەشىلەر, دارىگەرلەرمەن بىرگە مال دارىگەرلەرى, ءتارتىپ ساقشىلارى تۇرىپ, بايگە بارىسىن باقىلايدى. جارىسقا قاتىساتىن شاباندوزدارعا ءتۇسى ءارتۇرلى, ارقاسىندا ساندىق ءنومىرى بار ارنايى فۋتبولكالار كيگىزىلەدى.
بۇلارعا قوسا, تىكۇشاق جارىس جولىن ۇستىنەن اينالىپ ءجۇرىپ, بايگە اتتارىن بيىكتەن كامەراعا تۇسىرەدى. كورەرمەندەر مەن ات يەلەرى ءوز جۇيرىكتەرىنىڭ قاي تۇستا شاۋىپ بارا جاتقاندىعىن «LED» ەكراننان قاراي الادى.
دۋماندى شارادا «ات سىنشىسى» بايقاۋى ۇيىمداستىرىلادى. شىن جۇيرىكتى جازباي تانىعان سىنشىلارعا «تولىباي سىنشى», «كۇرەڭباي سىنشى», «شوقاي سىنشى» جانە «كيىكباي سىنشى» اتىنداعى ارنايى جۇلدەلەر بار. سونداي-اق, تويشىل قاۋىمعا ارنالعان قىمىزمۇرىندىق وتەدى.
الامان بايگە استانادان 35 شاقىرىم جەردە ورنالاسقان تسەلينوگراد اۋدانى, قابانباي اۋىلىندا 11 قىركۇيەك كۇنى ساعات 11.00-دە باستالادى.
