ەلىمىزدە ءماجىلىس پەن ءماسليحاتتارىن سايلاۋ ءبىر كۇندە – 19 ناۋرىزدا وتەدى. بۇل اقپاراتتى ورتالىق سايلاۋ كوميسسياسىنىڭ (وسك) توراعاسى نۇرلان ءابدىروۆ جاريا ەتتى.
«ءماجىلىس دەپۋتاتتارىنىڭ, بارلىق دەڭگەيدەگى ءماسليحاتتاردىڭ سايلاۋىن ءبىر كۇندە, ياعني, 19 ناۋرىزدا وتكىزۋ ۇسىنىلادى. ءبىز وسك مۇشەلەرىمەن وسىنى تالقىلادىق. وبلىستاردىڭ, سونداي-اق استانا, الماتى جانە شىمكەنت قالالارىنىڭ اۋماقتىق سايلاۋ كوميسسيالارىنا ءتيىستى شارالار قابىلداۋدى تاپسىرامىن» دەدى ول وسك-نىڭ وتىرىسىندا.
«سايلاۋ تۋرالى» زاڭعا ەنگىزىلگەن وزگەرىستەرگە سايكەس, ءماجىلىس دەپۋتاتتارى ارالاس سايلاۋ جۇيەسى بويىنشا سايلانادى. اتاپ ايتقاندا, ءماجىلىستىڭ 69 دەپۋتاتى – پارتيالىق تىزىممەن, 29-ى بىرمانداتتىق تەرريتوريالىق سايلاۋ وكرۋگى بويىنشا سايلانادى. وبلىس, رەسپۋبليكالىق ماڭىزى بار قالالار مەن استانا ءماسليحاتتارىنىڭ 50 پايىزى ماجوريتارلىق جۇيەمەن, 50 پايىزى پارتيالىق تىزىممەن سايلانادى. ەلىمىز بويىنشا بارلىعى 223 ماسليحاتقا 3415 دەپۋتات سايلانادى.
وسك توراعاسىنىڭ ورىنباسارى كونستانتين پەتروۆ ءماجىلىس جانە ءماسليحاتتار دەپۋتاتتىعىنا ۇمىتكەرلەرگە قويىلاتىن تالاپتار تۋرالى ايتتى. «ءماجىلىس دەپۋتاتتىعىنا ۇمىتكەرگە قويىلاتىن تالاپتار مىناداي: 25 جاسقا تولعان, ەلىمىزدە سوڭعى 10 جىلدا تۇراتىن, بۇرىن سوتتالماعان قازاقستان رەسپۋبليكاسىنىڭ ازاماتى ۇمىتكەر بولادى. ءماسليحات دەپۋتاتتىعىنا 20 جاسقا تولعان قازاقستان رەسپۋبليكاسىنىڭ ازاماتى ۇمىتكەر بولا الادى. زاڭدا بەلگىلەنگەن تارتىپپەن وتەلمەگەن نەمەسە الىنباعان سوتتىلىعى بار ادام جانە سىبايلاس جەمقورلىق قىلمىس پەن سىبايلاس جەمقورلىق قۇقىقبۇزۋشىلىق جاساۋدا كىناسى زاڭدا بەلگىلەنگەن تارتىپپەن سوتتا انىقتالعان ادام قر پارلامەنتى ءماجىلىسىنىڭ جانە ءماسليحاتىنىڭ دەپۋتاتتىعىنا كانديدات بولا المايدى. پارلامەنت ءماجىلىسى مەن ءماسليحات دەپۋتاتتىعىنا ۇمىتكەرلەر ۇسىنۋ قۇقىعى مىنا ۇيىمداردا بولادى: 1) پارتيالىق تىزىمدەر بويىنشا سايلاناتىندار – ساياسي پارتيالار; 2) ءبىرمانداتتى اۋماقتىق سايلاۋ وكرۋگتەرى بويىنشا سايلاناتىندار – ساياسي پارتيالار, قوعامدىق بىرلەستىكتەر, ولاردىڭ قۇرىلىمدىق بولىمشەلەرى (فيليالدارى مەن وكىلدىكتەرى) جانە ازاماتتار ءوزىن-ءوزى ۇسىنۋ ارقىلى سايلانادى» دەپ ءتۇسىندىردى ك.پەتروۆ.
كۇنتىزبەلىك جوسپارعا سايكەس, ۇمىتكەرلەردى ۇسىنۋ 20 قاڭتاردا باستالىپ, 8 اقپاندا اياقتالادى. تىركەۋ مەرزىمى: 20 قاڭتاردا باستالىپ, 18 اقپاندا استانا ۋاقىتىمەن 18.00-دە بىتەدى. ۇگىت-ناسيحات كەزەڭى 18 اقپاندا كەشكى ساعات 18.00-دە باستالىپ, 18 ناۋرىزدا تۇنگى ساعات 00.00-دە اياقتالادى. سايلاۋدا مەگاپوليستەردە 4 بيۋللەتەن, قالعان وڭىرلەردە 5 بيۋللەتەن بولادى. «بارىنە قارسىمىن» باعاناسى بارلىق بيۋللەتەندە كورىنىس تابادى. 18 ناۋرىز – تىنىشتىق كۇنى. 19 ناۋرىز – سايلاۋ وتەتىن كۇنى. سايلاۋ كۇنى ۋچاسكەلەردە داۋىس بەرۋ جەرگىلىكتى ۋاقىت بويىنشا ساعات 07:00-دەن 20:00-گە دەيىن جۇرگىزىلەدى. ۋچاسكەلىك سايلاۋ كوميسسيالارىنىڭ سايلاۋ ۋچاسكەسىندە داۋىستاردى ساناۋى جانە داۋىس بەرۋ ناتيجەلەرى تۋرالى حاتتاما جاساۋى, ەگەر داۋىس بەرۋدىڭ اياقتالۋىنىڭ وزگە ۋاقىتى بەلگىلەنبەسە, جەرگىلىكتى ۋاقىت بويىنشا ساعات 20:00-دە باستالادى. پارلامەنت ءماجىلىسى مەن ءماسليحاتتار دەپۋتاتتارىن كەزەكتەن تىس سايلاۋدىڭ جالپى ۇزاقتىعى تاعايىندالعان كۇننەن باستاپ داۋىس بەرۋ كۇنىنە دەيىن 59 كۇنگە سوزىلادى.
