سالاماتتى تۇرمىس – ساۋلىقتىڭ تۇعىرى

سەنبىدە قالالىق «جەرۇيىق» ساياباعىندا «جۇزجىلدىقتى بەلسەندى ۇزاق ءومىر سۇرۋمەن تويلايمىز» اتتى ۇرانمەن وتكىزىلگەن رەسپۋبليكالىق كەڭ اۋقىمداعى «دەنساۋلىق فەستيۆالى – 2014» شاراسىنا كۋا بولدىق. «قازاقستان – 2050» ستراتەگياسىنىڭ ماڭىزدى باعىتتارىنىڭ ءبىرى – قازاقستان حالقىنىڭ دەنساۋلىعىن ساقتاپ, ماتەريالدىق جانە رۋحاني كەمەلدىككە جەتكىزۋ ەكەنى بەلگىلى. ونى جۇزەگە اسىرۋدىڭ نەگىزى – باسىم حالىقتىڭ سالاماتتى ءومىر سالتىن ۇستانۋ مادەنيەتىن قالىپتاستىرۋ.

ەلوردامىزداعى دەنساۋلىق ساقتاۋ باسقارماسى مەن سالاماتتى ءومىر سالتىن قالىپتاستىرۋ ورتالىعىنىڭ باس­تاماسىمەن وتكىزىلەتىن جىل سايىنعى اتالمىش اكتسيا جاپپاي جۇگىرۋدەن باستاۋ الدى. قاجىمۇقان مۇڭايتپاسوۆ پەن ماعجان جۇماباەۆ كوشەلەرىنىڭ قيىلىسىنداعى اۋعان سوعىسى ارداگەرلەرىنىڭ ەسكەرتكىشىنەن باس­تالىپ, «جەرۇيىق» ساياباعىندا سايابىر تاپقان جاپپاي جۇگىرۋگە 4000-عا تارتا قالا تۇرعىندارى بەلسەنە قاتىستى. سونداي-اق, ساياباق ىشىنەن اشىلعان قالاشىقتاردا مەديتسينالىق ماسەلەلەرگە قاتىستى سۇراقتارىنا ماردىمدى جاۋاپتارىن الدى.

دەنساۋلىق فەستيۆالىنە قاتىسۋشى تۇرعىندار مەن قوناقتار ديابەت پەن باسقا دا اۋرۋلارعا جەدەل تەستەردەن ءوتىپ, قان قىسىمدارىن ولشەتىپ, اقپاراتتىق ءبىلىم بەرۋ ماتەريالدارىمەن تانىسىپ, ادام ساۋلىعىنا ارنالعان اقىل-كەڭەستەرگە قۇلاق ءتۇردى. بۇل جەردە تەك قانا مەديتسينالىق نەمەسە دەنە شىنىقتىرۋ جاتتىعۋلارىمەن شەكتەلىپ قالماي, 200 ادام فلەشموبقا قاتىستى. سونداي-اق, ەسترادا ارتىستەرىنىڭ, كوركەمونەرپازدىق ۇجىمدار مەن مادەني ورتالىق وكىلدەرىنىڭ ونەرىن تاماشالادى.

سالاماتتى ءومىر سالتىن ۇستانۋعا قوعامنىڭ, جاستار مەن ەگدە تارتقان ادامداردىڭ نازارىن اۋدارۋ ءۇشىن رەسپۋبليكا كولەمىندە ۇيىمداستىرىلاتىن وسى اكتسياعا وتكەن جىلى 1,5 ميلليون ادام قاتىسقان. ال بۇل كورسەتكىش بيىل ودان دا اسىپ ءتۇسۋى ىقتيمال.

«الەۋمەتتىك باعدارلاما بويىنشا ۇيىمداستىرىلاتىن مۇنداي شارا تەرىس ادەتتەردەن, رەتسىز تاماقتانۋدان ساقتاندىرۋ, سەمىزدىك اۋرۋىنىڭ الدىن الۋ, ءوز دەنساۋلىعىڭدى ساقتاۋ, «اۋىرىپ ەم ىزدەگەنشە, اۋىرمايتىن جول ىزدەۋ» امالى» دەيدى استانا قالالىق دەنساۋلىق ساقتاۋ باسقارماسىنىڭ ورىنباسارى ءسابيت ءابدىرايىموۆ.

1999 جىلدان باستاپ رەسپۋبليكانىڭ بارلىق اۋداندارىندا جاستار مەن ەگدە جاستاعىلار ءۇشىن جىل سايىن اتالىپ وتەتىن شىنايى مەرەكەگە اينالعان «دەنساۋلىق فەستيۆالى» سالاماتتى ءومىر سالتىن, تاڭەرتەڭگىلىك جانە وندىرىستىك جاتتىعۋدى ناسيحاتتاپ, دەنساۋلىقتى ساقتاۋ ماسەلەلەرىنەن حاباردار قىلۋ جانە سپورتتىڭ ءار تۇرىنە قىزىقتىرۋ ماقساتىندا الداعى جىلى دا جالعاسىن تابا بەرمەك.

قۋات قيىقباي