كەشە ەلوردادا ورتالىق كوممۋنيكاتسيالار قىزمەتىندە وتكەن بريفينگتە قازاقستاننىڭ باس مەملەكەتتىك سانيتارلىق دارىگەرى جانداربەك بەكشين تۇرعىنداردى تاماقتان ۋلانۋدىڭ الدىن الۋعا شاقىردى.
تۇتىنۋشىلاردى ساپاسىز ونىمدەردەن قورعاۋ ماقساتىندا مەملەكەتتىك سانيتاريالىق-ەپيدەميولوگيالىق قاداعالاۋ ورگاندارى ماۋسىم-شىلدە ايلارىندا بازارلاردا, ءىرى ساۋدا ورىنداردا, جارمەڭكەلەردە «قۇنارلى ءونىم – حالىقتىڭ دەنساۋلىعى», «قاۋىپسىز ءونىم كۇنى» اكتسيالارىن وتكىزگەن. ناتيجەسىندە تاماق ونىمدەرىنىڭ قاۋىپسىزدىگىنە زەرتحانالىق زەرتتەۋ جۇرگىزىلدى. كوبىنەسە قاربىز بەن قاۋىن قاۋىپ تۋدىرادى ەكەن. وسىعان بايلانىستى ج.بەكشين مىرزا رۇقسات ەتىلمەگەن ورىنداردان باقشا ونىمدەرىن ساتىپ الماۋدى, ءونىمنىڭ قاۋىپسىزدىگىن كۋالاندىراتىن قۇجاتتىڭ بولۋىن تالاپ ەتۋ كەرەكتىگىن ەسكەرتتى.
جيىندا بەلگىلى بولعانداي, بۇگىندە بازارداعى «حالال» دەپ اتالاتىن ءونىمدەردىڭ بارلىعى بىردەي سانيتارلىق نورماعا سايكەس كەلە بەرمەيدى ەكەن. كەيبىر مەيرامحانالار مەن اسحانالاردا تاماق دايىنداۋدىڭ تەحنولوگياسى دۇرىس جولعا قويىلماعان. سوندىقتان, تويحانا يەلەرىنە تەك سەرتيفيكاتتالعان ونىمدەر ساتىپ الىپ, تاماق دايىنداۋدىڭ تەحنولوگياسىنا نازار اۋدارۋ قاجەتتىگى دە ايتىلدى.
«ءبىز قىتاي, كورەيا, گەرمانيا, فرانتسيا, اقش سياقتى ەلدەردىڭ الدىڭعى قاتارلى تاجىريبەلەرىن زەرتتەپ جاتىرمىز. سوڭعى ەكى جىلدا گەندىك موديفيكاتسيالانعان ونىمدەردى انىقتايتىن اپپاراتۋرالار ساتىپ الۋ كوزدەلۋدە. بۇل ءوز كەزەگىندە احۋالدى تۇراقتى ۇستاپ تۇرۋعا ىقپال ەتەدى» دەيدى ج.بەكشين.
بريفينگتە باس سانيتار سارقىت ماسەلەسىنە دە نازار اۋداردى. جاز مەزگىلىندە بالالار مەن ەرەسەكتەر اراسىندا تاعامنان ۋلانۋ وقيعالارى ءجيى كەزدەسەدى. ول تويدا سارقىت رەتىندە بەرىلەتىن ەت, سالات, جەمىس-جيدەك سىندى تەز بۇزىلاتىن تاعامداردىڭ ورنىنا كامپيت, پەچەنە, شىعىس تاتتىلەرى سەكىلدى قۇرعاق ءارى جەڭىل تاماقتار سالىنسا دەگەن ۇسىنىسىن جەتكىزدى.
گۇلميرا شارحانقىزى
