«مۋز–تۆ 2015. گراۆيتاتسيا» پرەمياسىنىڭ اياسىندا «استانا-ارەنا» ستاديونىنىڭ الدىندا وتكەن «Open Air» – pre-party» اتتى اشىق اسپان استىنداعى كونتسەرتتە قازاقستان مەن رەسەيدىڭ شوۋ-بيزنەسىنىڭ كوگىندە جارقىراپ جۇرگەن 50-دەن استام جۇلدىز ونەر كورسەتتى.
سارىارقانىڭ سايىن دالاسىن سازعا تەربەگەن كەشتە ەكى ەلدىڭ ەسترادا انشىلەرى كەزەك-كەزەك ءان شىرقاپ, اسىرەسە, جاستاردىڭ دەلەبەسىن قوزدىرىپ, قالىڭ كوپشىلىككە تاڭعاجايىپ كۇي سىيلادى. ءدال سول كۇنى ءاپ-ساتتە بۇلتتانىپ, قابارا تۇسەتىن ەلوردا اسپانى دا مامىراجاي كۇي كەشىپ, سازدى اۋەنمەن بىرگە اق بۇلتتار دا تەربەلە كوشتى. ونەردە شەكارا بولمايدى دەگەن راس. بۇگىنگىدەي عالامدانۋ ۇدەرىسى ۇدەپ بارا جاتقان شاقتا ودان بوي جاسىرىپ, تىس قالام دەۋ دە قيسىنسىز. سوندىقتان, مۇمكىندىگى كەلگەنشە ۇلتتىق بولمىس پەن بوياۋدى جوعالتىپ الماي, وزگە ەلدەردىڭ ونەگەلى ۇردىستەرىن مەڭگەرۋ دە, سوعان لايىقتى بولۋعا ۇمتىلۋ دا قاجەت. دەمەك, ول ءۇشىن بىزگە بيىك دەڭگەي كەرەك. ول دەڭگەي وسىنداي اۋقىمدى شارالار بارىسىندا دا ايقىن ءبىلىنىپ تۇرادى. ماسەلەن, ساحناعا شىققان كەز كەلگەن رەسەي ءانشىسى بىردەن ىرعاقتى مۋزىكامەن كورەرمەندى وزىنە تارتىپ, ولاردىڭ بارلىعىن بيلەتىپ, جان-جاعىن جاندىرىپ جىبەرەدى. ءبىرتۇرلى, ءوزىڭ دە ەرىكسىز بيلەپ, ەلىگىپ-جەلىگىپ كەتەسىڭ… مىنە, زاماناۋي مۋزىكانىڭ قىر-سىرىن ءجىتى مەڭگەرگەن كاسىبيلىكتىڭ ءبىر قىرى وسىلاي بولۋ كەرەك سەكىلدى… وسى جەردە ايتۋلى شارانى, اتامەكەندە وتكىزسەم دەپ, جارعاق قۇلاعى جاستىققا تيمەي, بار تاۋقىمەتتى تارتىپ جۇرگەن قانداسىمىز ارمان داۋلەتياروۆتىڭ ەڭبەگى ولشەۋسىز ەكەنىن ايتىپ وتكەن ءجون. ءبىر مەزەتتە كورشى ەلدىڭ الاقاندارىنا سالىپ, ايالاپ وتىرعان اتىشۋلى ونەرپازدارىن توپ-توبىمەن اكەلىپ, وتانداستارىنا سىي جاساپ وتىرعانى ازاماتتىق قانا ەمەس, تۋعان حالقى الدىنداعى پەرزەنتتىك پارىزىن ابىرويمەن اتقارۋ دەپ تە ۇعىنعان ءجون.
ارينە, ءبىزدىڭ وتاندىق ەسترادا انشىلەرى دە ولاردان ءبىر دە قالىسپاي, شاما-شارقىنشا شىرقادى. جينالعاندار, اسىرەسە, روزا رىمباەۆا, مارجان اراپباەۆا, قايرات نۇرتاس, ماقپال يسابەكوۆا, ايقىن تولەپبەرگەن سەكىلدى انشىلەردىڭ, «كەشYou», «رينگو» توپتارىنىڭ ونەرلەرىنە ءتانتى بولدى. جاس ءانشى ءمولدىر اۋەلبەكوۆا مەن ساتي كازانوۆانىڭ ەكى تىلدە بىرلەسىپ شىرقاعان اندەرى وتە اسەرلى شىقتى. ءارى ەكەۋىنىڭ ءتۇر تۇلعاسى دا ءبىر-بىرىنە ۇقساس ەكەن. سازدى كەشتىڭ تاعى ءبىر ەرەكشەلىگى, ساحناعا شىققان ونەر مايتالماندارىنىڭ بارلىعى ءوز اندەرىن جاندى داۋىستا ورىنداپ, تىڭدارماندارىن ءتانتى ەتتى.
بۇل رەتتە رەسەيدەن ايتۋلى شاراعا ادەيى ات ارىتىپ كەلگەن ديما بيلان, گليۋكوZا, دجيگان, يۋليا ساۆيچەۆا, «M-BAND», بيانكا, «ديسكوتەكا اۆاريا», يرينا دۋبتسوۆا, ميتيا فومين, «گرادۋسى», «باند’ەروس», «پيتستسا», «فابريكا», ۆيكتوريا داينەكو, اننا سەمەنوۆيچ, ساتي كازانوۆا, توماس Nevergreen, ستاس كوستيۋشكين, الەكساندر رەۆۆا سەكىلدى ءوز ەلى تۇگىل, الەم جۇرتشىلىعىنا تانىلىپ قالعان ەسترادا جۇلدىزدارىنىڭ ونەرلەرىنە ريزا بولماعان جان جوق شىعار. ولاردىڭ اۋەندەرىنە بارلىق جۇرت جابىلا بيلەپ, جامىراسىپ جاتتى. نەگە دەسەڭىز, رەسەيلىك انشىلەردىڭ كاسىبيلىگى مە, الدە ءان ايتۋ مانەرلەرىنىڭ وزگەشەلىگى مە, ايتەۋىر, بىزگە قاراعاندا وزگەشەلىكتەرى باسىم. جانە كونتسەرت بارىسىندا كوپشىلىكتىڭ قاتىسۋىمەن سەلفي جاسالدى. رەسەيلىك «پيتستسا» توبىنىڭ ءسوليسى سەرگەي پريكازچيكوۆتىڭ باستاماسىن جەرلەسىمىز ايقىن تولەپبەرگەن قوستاپ اكەتتى.
مادەني شارانى جۇرگىزگەن ەكى ەلدىڭ تىزگىنشىلەرى دە سازدى كەشتى ادەمى ازىلمەن ادىپتەپ, كورەرمەندەرگە كوركەم كۇلكى سىيلاي ءبىلدى. ءبىر سوزبەن ايتقاندا, ايتۋلى كەشتىڭ كەرەمەت ساتتەرى ەلوردا جۇرتشلىعىنىڭ ەسىندە ۇزاق ساقتالارى داۋسىز.
ازامات ەسەنجول
