باستى اقپارات

«سارىارقا» سازى

ەلوردامىزداعى ايتۋلى ونەر ۇجىمدارىنىن ءبىرى — استانا قالاسى مادەنيەت باسقارماسىنىڭ مەملەكەتتىك فيلارمونياسىنىڭ «سارىارقا» قازاق ۇلت اسپاپتار ءانسامبلى. انسامبل 1998 جىلى قۇرىلعان. جاس ەلوردامىزدىڭ قۇرداسى.

باس وردانىڭ بىردە-ءبىر مادەني جيىنىنان قالىسپاي, بارلىق مادەني-رۋحاني تابىستارىنا ورتاقتاسىپ, بارىنە بىركەلكى اتسالىسىپ جۇرگەن بىرەگەي توپ. اتالمىش ءانسامبلدىڭ كوركەمدىك جەتەكشىسى قر مادەنيەت قايراتكەرى نۇرلان ءحامزيننىڭ ايتۋىنشا, قۇرامىندا كونەدەن كەلە جاتقان اسپاپتار بارشىلىق ەكەن: شاڭقوبىز, اسا تاياق, قىلقوبىز, سازسىرناي, ادىرنا, جەتىگەن, شەرتەر, ودان بولەك سال-سەرىنىڭ قانجىعاسىنان تۇسپەگەن قازاقتىڭ قارا دومبىراسى جانە ۇرمالى اسپاپتار بار.

كەزىندە ≪سازگەن≫ قازاقتىڭ قانداي ماقتانىشى بولسا, قازىرگى تاڭدا «سارىارقا» استانانىڭ  ماقتانى اتانىپ ءجۇر. استانا اكىمدىگى ۇيىمداستىراتىن بارلىق مادەني ءىس-شارانىڭ بەل ورتاسىندا جۇرەتىن ءانسامبلدىڭ ونەردە ەرەكشە قولتاڭباسى بار. قازاقتىڭ حالىق اندەرى مەن كۇيلەرىنەن پوپۋرري جاسايدى.

وسكەنبايدىڭ «قازاقستان», سۇگىردىڭ «بوز ىنگەن», قۇرمانعازىنىڭ «سارىارقا», ىقىلاستىڭ «جەز كيىك» كۇيلەرىن ورىندايدى. حالىق اندەرىن, اقان سەرىنىڭ «ءلايلىم-شىراق», مەيرامبەك جانبولاتوۆتىڭ «سارىارقا», نۇرعيسا تىلەنديەۆتىڭ «ءوز ەلىم», التىنبەك قورازباەۆتىڭ «تۋعان جەر» سىندى كوپتەگەن حالىقتىڭ جانىنا جاقىن اندەردى سۇيەمەلدەيدى.

رەپەرتۋارىندا 300-دەن اسا قازاقتىڭ ءان-كۇيى بار انسامبلدە شەبەر سازسىرنايشى ءلاززات كوبەنوۆا, سىبىزعىشى شىعىس ماقان, سىم قوبىزدا وينايتىن ينديرا گابدەلوۆا-كازيەۆا سياقتى دارىندى جاستار لەگى وسىپكەلەدى. ولارمەن بىرگە بىرقاتار كاسىبي انشىلەر جۇمىس جاسايدى. قر ەڭبەگى سىڭىرگەن قايراتكەرى گۇلزيرا بوكەيحانوۆا, قازاقستان جاستار وداعى سىيلىعىنىڭ يەگەرى نۇراي تاناباەۆ, كۇنسۇلۋ تۇرلىبەكوۆا, التىناي مامىروۆا.

سوناۋ 1999 جىلدىڭ وزىندە-اق, حالىقارالىق فەستيۆالدەردە باس جۇلدەنى بەرمەي, شىعارماشىلىق بايگەلەردەن ەلگە تەك جەڭىس تۋىن جەلبىرەتىپ اكەلىپ ءجۇردى. 1999 جىلى فرانتسيادا, 2000-2003 جىلدارى ىستامبۇلدا, ماسكەۋدە, تۇركىستاندا, 2002 جىلى استاناداعى «شابىت» فەستيۆالىندە, 2003 جىلى نوۆوسىبىردەگى حالىقارالىق حالىق شىعارماشىلىعى فەستيۆالىندە, 2004 جىلى قىتايداعى حالىقارالىق الەم حالىقتارىنىڭ بيلەرى مەن فولكلورلىق مۋزىكا فەستيۆالىندە, 2006 جىلى يالوۆودا وتكەن حالىقارالىق فولكلور فەستيۆالىندە, 2006 جىلى ماسكەۋدەگى «سادكو» حالىقارالىق فەستيۆالىندە جۇلدەلى ورىندارعا يە بولعان. فرانتسيانىڭ ديجون قالاسىندا «التىن مەدالگە» يە بولعان. سول ساپارلارى تۋرالى كوپ قىزىقتى ماعلۇماتپەن بولىسكەن كوركەمدىك جەتەكشى:

«ۇلكەن ستاديوندا ونەر كورسەتەتىن بولدىق. «دايديداۋدى» سىبىزعىمەن العاشقى نوتالارىن ويناعاندا وتىز مىڭدىق ستاديون دۋ ەتىپ شاپالاق ۇردى. سول شاپالاقتان قۇلاق تۇنعانى سونشا, ويناپ تۇرىپ ءوزىمىزدى ءوزىمىز ەستىمەي قالدىق. سىبىزعىنىڭ ۇنىنە دەگەن قۇرمەتتىڭ قانشالىقتى زور ەكەنىن شەتەلدىكتەر ءبىر عانا ىلتيپاتپەن بىلدىرتتى≫, – دەيدى كوركەمدىك جەتەكشى نۇرلان حامزين. ەڭ ۇلكەن جەتىستىكتىڭ ءبىرى رەتىندە رەسپۋبليكالىق «عاسىرلار سازى» اتالاتىن فەستيۆالدى اتادى ول كىسى. ءداستۇرلى اۋەزدى بيىك دەڭگەيدە ورىنداۋشىلاردىڭ كوپتىگىن كورسەتكەن ەرەكشە سايىسقا قاتىسۋ «سارىارقا» ءانسامبلىنىڭ مايتالماندارى ءۇشىن دە كوڭىل سەرپىلتەر شۋاقتى مەزگىل بولعان كورىنەدى.

انسامبلگە مۇشە بولعان 16 مۋزىكانتتىڭ بارلىعى جىل سايىن بىلىكتىلىگىن انىقتايتىن اتتەستاتسيادان ءوتىپ تۇرادى. قابىلەتتى كۇندەلىكتى دايارلىق جاساۋ ارقىلى نىعايتىپ, بەكىتىپ وتىرماسا, ونەرلى جاندار تەز قارايىپ قالاتىن كورىنەدى. سوندىقتان اي سايىن ءتۇرلى تاقىرىپتاردى قامتيتىن كونتسەرتتىك باعدارلامالار ازىرلەنەدى.

قازىر انسامبلدە دارىنى شىڭدالعان, ونەردىڭ قۇزار شىڭىنا جەتكەن قىز-جىگىتتەر مۋزىكالىق كىتاپ جازۋدى قولعا الىپ جاتىر ەكەن. ءوز ونەرىنىڭ ەرتەڭگى كۇنى ۇمىت قالماي, كەلەشەك وسكەلەڭ ۇرپاق قاجەتىنە جاراتۋى ءۇشىن قولعا الىنعان ءىس قۇپتارلىق-اق. ماسەلەن, سىبىزعىشىلار ەلىمىزدە وتە از.

ولاردى بىزدە دايارلاۋ جاعى ىلعي اقساپ جاتادى. «سارىارقانىڭ» سىبىزعىشى جىگىتى قازاقستان بويىنشا وتە جوعارى دەڭگەيدەگى مامانداردىڭ ءبىرى. ءوز ونەرىنە ادال جاندار ەرتەڭگى كۇنىنە دە ەڭبەك ءسىڭىرىپ, ۇلتتىق مۋزىكا مەكتەبىن قالىپتاستىرۋدى ارمان ەتىپ ءجۇر.

شىنار ءابىلدا

تاعىدا

ۇقساس جاڭالىقتار

پىكىر ۇستەۋ

Back to top button