جىل باسى ناۋرىز مەرەكەسى تاۋەلسىزدىگىمىزدىڭ ارقاسىندا بەيبىت ەلىمىزدە جىل سايىن دۇركىرەتە تويلانادى. №32 «بالداۋرەن» بالاباقشاسىندا وتكەن كىشكەنتاي بالاپاندارىمىزعا ارنالعان ەرتەڭگىلىكتەر سونىڭ ءبىر دالەلى بولعانداي.
ناۋرىزدىڭ 17-سىنەن باستالىپ كەتكەن توي ءار توپتا «ارمىسىڭ, ءاز ناۋرىز!», «قىمىزمۇرىندىق», «قوش كەلدىڭ, ناۋرىزىم!» ت.ب. تاقىرىپتارىندا بىرىنەن – ءبىرى وتەرلىكتەي ونەگە مەن تاربيەگە تولى بولدى. اتا-انالار داستارقاندى ءدامدى اسقا تولتىرسا, بالالار وزدەرىنىڭ تويعا قوسقان بازارلىقتارى رەتىندە ولەڭ وقىپ, ءان شىرقاپ, بي بيلەپ, بار ونەرلەرىن ورتاعا سالدى.
بۇل مەيرام ورىس توپتارىندا دا مەملەكەتتىك تىلىمىزدە ءوتتى. وزگە ۇلت وكىلدەرىنىڭ بالالارى تۇگىلى اتا-انالارىنا دەيىن بەلسەندى قاتىسىپ, بەسىك جىرى مەن تۇساۋكەسەر ءراسىمىنىڭ ولەڭدەرىن قازاقشا ايتقاندا كەۋدەمىزدە ۇلكەن ءبىر ماقتانىش سەزىمى وياندى.
وزگە ۇلت وكىلدەرى بالالارى ۇلتتىق كيىمىمىزدى كيىپ, ناۋرىز تويىنىڭ ءداستۇرلى ءانى – «ساۋمالىقتى» ايتىپ قازاق تىلىندە تازا سويلەپ, ناۋرىز جىرلارىن مانەرلەپ ناقىشىنا كەلتىرە جىرلاعاندا قۋانىشتان قانات بىتكەندەي بولدى.
بالا دەسە ىشكەن اسىن جەرگە قوياتىن بالاباقشامىزدىڭ تالىمگەرى باقىت قابىلداقىزىنىڭ ءوزى وسى تويدا اجەنىڭ ءرولىن ويناپ, بالالارعا ناۋرىز كوجەنىڭ جاسالۋىن كورسەتكەندە اتا-انالار دا قىزىعا تىڭداستى. الاستاۋ ءراسىمى جاسالىپ, قىزىل كىتاپقا ەنگەن ناۋرىزشەشەك گۇلىن تاعىنا وتىرعىزىپ ورتاعا اكەلگەندە, ناۋرىزكوك قۇستار مىڭ بۇرالا بيلەگەندە كورەرمەننىڭ العان اسەرى زور بولدى.
جالپى, №32 «بالداۋرەن» بالاباقشاسى تەك كىشكەنتاي ءبۇلدىرشىندەردى عانا ەمەس, مۇعالىم ماماندىعى بويىنشا وقىپ جۇرگەن ستۋدەنتتەرگە دە ءتالىم-تاربيە بەرىپ, قالاداعى باسقا وقۋ ورىندارىمەن تىعىز بايلانىس جاسايدى. ايتا كەتسەك, وسى تويداعى ۇماي انا, جيرەنشە, قاراشاش رولدەرىن ەۋرازيا گۋمانيتارلىق ينستيتۋتى كوللەدجىنىڭ ستۋدەنتتەرى ورىندادى.
اسەل ءنۇسىپوۆا,
«بالداۋرەن» بالاباقشاسىنىڭ قازاق ءتىلى ءپانىنىڭ مۇعالىمى
