سەنبى كۇنى قازاقستاننىڭ ورتالىق كوممۋنيكاتسيالار قىزمەتىنىڭ ۇيىمداستىرۋىمەن بريفينگ ءوتتى. وندا اۋداندىق ماڭىزداعى قالالاردىڭ, اۋىلدىق وكرۋگتەردىڭ, اۋىلدىق وكرۋگەتەر قۇرامىنا كىرمەيتىن كەنتتەر مەن سەلولاردىڭ اكىمدەرىن سايلاۋدىڭ باستاپقى قورىتىندىلارى جاريالاندى.
5-9 تامىز ارالىعىندا وتكەن سايلاۋ كەزىندە بارلىعى 2454 اكىم تاڭدالدى. ۇسىنىلعان 7173 ۇمىتكەردىڭ 6738-ءى تىركەلدى, ياعني, ءبىر اكىم لاۋازىمىنا ەكىدەن كوپ كانديدات قاتىسقان. اكىمدەردىڭ ورتاشا جاسى – 47, ال سايلانعان ايەلدەردىڭ ۇلەسى – 11,4 پايىز. سايلانعان اكىمدەردىڭ باسىم بولىگى پەداگوگتار مەن اۋىل شارۋاشىلىعى سالاسىنىڭ ماماندارى ەكەن, سونىمەن قاتار, 357 ەكونوميست, 417 ينجەنەر جانە 281 زاڭگەر مامانداعىنىڭ يەلەرى بار.
«ءىس باسىنداعى اكىمدەردىڭ ىشىنەن سايلاۋعا 1811 كانديدات قاتىستى, ولاردىڭ 1747-ءسى ءوزىنىڭ لاۋازىمىندا قالدى. وسىلايشا قۇرام 28,8 پايىزعا جاڭاردى. جالپى سايلاۋ ناۋقانى قولدانىستاعى زاڭناما مەن دەموكراتيالىق سايلاۋ پروتسەسىنىڭ نورمالارىنا ساي, ۇيىمداسقان تۇردە ءوتتى» دەدى ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ.
ءبىر قىزىعى, 37 اكىمشىلىك-اۋماقتىقتا اكىمدىككە كانديداتتاردىڭ ءبىر عانا داۋىس ايىرماشىلىعىمەن جەڭۋ فاكتىسى سايلاۋدىڭ شىنايى بالامالىلىعىن ايعاقتاسا, ال اۋداندىق جانە قالالىق سايلاۋ كوميسسيالارى ۇسىنعان باستاپقى مالىمەتتەرگە سايكەس, رەسپۋبليكا بويىنشا تاڭداۋشىلاردىڭ كەلۋى 98,3 پايىزدى قۇراعان.
ەلىمىزدە العاش رەت وتكەن اۋىل اكىمدەرىن سايلاۋ بارىسىن قاداعالاۋعا حالىقارالىق باقىلاۋشىلار قاتىسپادى. الايدا, ەلىمىزدەگى ساياسي پارتيالاردىڭ وڭىرلەردەگى سەنىمدى وكىلدەرى مەن باق جانە قوعام بەلسەندىلەرىنەن قۇرالعان ەكى مىڭعا جۋىق باقىلاۋشى مۇقيات قاداعالادى. وسى جونىندە اڭگىمەلەگەن ورتالىق سايلاۋ كوميسسياسىنىڭ مۇشەسi مارات سارسەمباەۆ «ەگەر وسى كەزگە دەيىن وزگە ەلدەردىڭ تاجىريبەسىنە سۇيەنسەك, حالىقارالىق بايقاۋشىلاردىڭ اكىم سايلاۋى پروتسەسىن باقىلاۋعا قىزىعۋشىلىق تانىتپاۋى – جازىلماعان زاڭدىلىق دەسەك تە بولادى. دەگەنمەن, ولار كەلەمىز دەسە, ءبىز قالىپتى جۇمىس ىستەۋىن قامتاماسىز ەتكەن بولار ەدىك» دەدى.
ەركەجان ساتىمبەك
