سەمەننىڭ ساباعى

ۇلتى – ورىس.
ماماندىعى – قازاق ءتىلى مەن ادەبيەتى ءپانىنىڭ مۇعالىمى.
قالاي دەيسىز عوي-ءا؟!

قالاداعى №23 ورتا مەكتەپتىڭ مۇعالىمى سەمەن كۋزنەتسوۆ تۋرالى ەستىگەندە تاڭدانعانىمىز راس. بۇعان دەيىن قازاقشا ەركىن كوسىلە الاتىن وزگە ۇلت وكىلدەرىنىڭ كوپتىگىنە ەتىمىز ۇيرەنگەن. «تىلگە قۇرمەتى – ەلگە قۇرمەتى». بۇل جولى ءتىپتى باسقاشا. قازاق ءتىلىن قازاقتارعا ۇيرەتىپ تۇر…
…ەسىكتى قاققان بىزگە «كىرىڭىزدەر, قازىر, وقۋشىلارعا ءۇي تاپسىرماسىن بەرىپ الايىن» دەدى. ساباقتى قالاي جۇرگىزەتىنىن كورۋگە ىنتىعىپ تۇرعان ءبىز ءدارىستىڭ جالعاسقانىن قالاپ-اق تۇرمىز.
«ال, بالالار, مىنا سويلەمدەگى ءسىزدىڭ ەسىمىڭىز دەگەن ءىىى جاقتىڭ سىپايى ءتۇرى…» دەگەن سەمەننىڭ ءسوزىن وقۋشى داۋىسى ءبولدى.
– اعاي, ۇندەستىك زاڭى بويىنشا ما؟
– البەتتە سولاي, – دەدى ۇستازى ۇمسىنىپ.
كوڭىلىڭ سەنبەيتىن نارسەگە كوزىڭنىڭ كۋاگەر بولعانى قانداي عانيبەت. 23 جاسار سەمەن مۇعالىمنىڭ بۇل تۇرىسى بارلىق قازاقستاندىقتارعا ۇلگى بولارلىقتاي كورىندى بىزگە.
حوش. سونىمەن ساباعىن اياقتاعان سەمەننەن سۇحبات الۋعا كىرىستىك.

– قايدا وقىدىڭ؟
– ەۆنەي بوكەتوۆ اتىنداعى قار مۋ-دە. فيلو­لوگيا فاكۋلتەتىن ءتامامدادىم.
– بۇل مەكتەپكە قالاي كەلدىڭ؟
– ءوزىم وسى مەكتەپتىڭ تۇلەگىمىن. ءاۋ باستان استانالىقپىن. وقۋىمدى ءبىتىرىپ, وسىندا ساباق بەرۋ مەنىڭ ارمانىم بولعان.
– بۇل ماماندىقتى تاڭداۋىن تاڭداپ الىپ, كەيىننەن قينالىپ, قامىققان كەزىڭ بولدى ما؟
ء(بىز دە ادەيى سويلەمىمىزدى قيىنداتىپ قويامىز. وعان توسىلىپ وتىرعان ول جوق)
– جوق-ءا. قايتا, كۇننەن-كۇنگە قازاقتىڭ تىلىنە, ادەبيەتىنە دەگەن ماحابباتىم ويانىپ, زەرتتەۋگە قۇلشىنىپ ءجۇرمىن.
– ادەبيەتشى رەتىندە اقىن-جازۋشىلاردان كىمدەردى كوپ وقىدىڭ؟
– مۇقاعالي مەن بەيىمبەتتى. بۇلار ءسوز ونەرىنىڭ سۋسىنىن قانىپ ىشكەن ءسوز سۇلەيلەرى عوي.
– ماقساتىڭ قانداي؟
– قازاق ءتىلىنىڭ مارتەبەسىن كوتەرۋ.
– سەنىڭشە, قازاق ءتىلىنىڭ مارتەبەسى تومەن بە سوندا؟
– ولاي دەۋدەن اۋلاقپىن. بىراق, ەلىمىزدە كەز- كەلگەن مەملەكەتتىك ءتىلدى قىزمەتكەردەن گورى, اعىلشىن ءتىلىنىڭ ماماندارىنا دەگەن سۇرانىس باسىم. سوندىقتان, قازاق ءتىلىن ەڭ ءبىرىنشى قاجەتتىلىككە قويۋ كەرەك دەپ ويلايمىن. مەن ءوزىمدى قازاق ءتىلى مەن ادەبيەتى ءپانىنىڭ مۇعالىمىمىن دەپ ارتىق سانامايمىن. بۇل مەنىڭ – قىزمەتىم. جەپ وتىرعان نانىم. ءوزىم تۇراتىن ەلگە ەتكەن ەڭبەگىم. بۇعان مەن مىندەتتىمىن.

قۋانىپ قالدىق. ەلدىڭ ءاربىر ازاماتى ءدال وسى­لاي ويلاسا عوي دەيسىڭ. بۇل – ءبىزدىڭ ارمان, ارينە…

گۇلجان راحمان