«سەرپەر» سەرپىلتەدى

التايدان اتىراۋعا دەيىنگى ۇلان-عايىر اۋماقتى الىپ جاتقان اتىرابىمىز جايلى كەزىندە ەتنوگراف عالىم گريگوري پوتانين «ماعان بۇكىل قازاق دالاسى ءان سالىپ تۇرعانداي بولىپ كورىنەدى» دەپ ايتقانداي, كەڭ ولكەمىزدىڭ قاي قيىرىندا دا «قۇلاقتان كىرىپ, بويدى الاتىن» مۋزىكالىق مۇرالار كەزدەسەدى. ەلىمىزدىڭ شىعىسى مەن باتىسى ارالىعىندا قالىپتاسقان ءارتۇرلى ءان-كۇي مەكتەپتەرى سوعان دالەل. كەيىنگى كەزدە ءداستۇرلى ونەردى قولداۋ جاعى كەمشىن سوعىپ تۇرسا دا, ءانشى, كۇيشىلەرىمىزدىڭ كەڭىنەن كوسىلەتىن مەزگىلدەرى بار. استانا كۇنىنە وراي جىل سايىن وتكىزىلەتىن «سەرپەر» حالىق اسپاپتار وركەسترلەرىنىڭ مۋزىكالىق فەستيۆالى, مىنە, سونداي الاڭداردىڭ ءبىرى. 

استانا قالاسى اكىمدىگىنىڭ قولداۋىمەن ۇيىمداستىرىلىپ كەلە جاتقان «سەرپەر» فەستيۆالى ەلوردادا بيىل التىنشى مارتە شىمىلدىعىن تۇرەدى. ءۇش كۇن بويى ەلوردا اسپانىنا اسەم ءان مەن ءتاتتى كۇيدى ۇشىراتىن ءداستۇرلى مۋزىكا مەرەكەسىنىڭ اشىلۋى قالالىق الاڭدا وتەدى. فەستيۆالدى ەلورداداعى ىرگەلى ونەر ۇجىمى – استانا قالاسى مەملەكەتتىك اكادەميالىق فيلارمونياسىنىڭ قازاق وركەسترى باستايدى. وركەستر­دىڭ باس ديريجەرى جانە كوركەمدىك جەتەكشىسى, قر ەڭبەك سىڭىرگەن قايراتكەرى, پروفەسسور ايتقالي جايىموۆتىڭ باستاۋىمەن ۇلتىمىزدىڭ نەبىر جاۋھار تۋىندىلارى ورىندالادى.
كەلەسى كۇنى فەستيۆال ەلوردا­داعى «ستۋدەنتتىك» جانە «اراي» ساياباقتارىندا جالعاسادى. قازاق­ستاندىق ونەر ۇجىمدارىمەن قاتار بۇل شاراعا رەسەيدەن كەلەتىن قوناقتار دا قاتىساتىنىن ايتا كەتۋ كەرەك. ولاردىڭ قاتارىنداعى باشقۇرتستان رەسپۋبليكاسىنىڭ ۇلتتىق حالىق اسپاپتار وركەسترى مەن ومبى قالاسىنىڭ «لاد» ورىس كامەرالىق وركەسترى ءوز ونەرىنە قانىقتىرادى.
جالپى, اتالمىش فەستيۆالگە جەتى وركەستر قاتىسادى. سونىڭ ىشىندە ەلىمىزدەگى ءار الۋان ءان-كۇي مەكتەپتەرىنەن حابار بەرەتىن ونەر ۇجىمدارى بار. اتاپ ايتساق, تۇرماعامبەت اتىنداعى حالىق اسپاپتار وركەسترى (قىزىلوردا قالاسى), كەنجەبەك كۇمىسبەكوۆ اتىنداعى اقمولا وبلىستىق فيلارمونياسىنىڭ قازاق حالىق اسپاپتار وركەسترى (كوكشەتاۋ), ابىل تاراقۇلى اتىنداعى قازاق حالىق اسپاپتار وركەسترى (اقتاۋ) جانە بايجىگىت اتىنداعى حالىق اسپاپتار وركەسترى (وسكەمەن).
فەستيۆالدىڭ گالا-كونتسەرتى قالالىق الاڭدا وتەدى. وندا بارلىق قاتىسۋشى ۇجىمداردان, ياعني, جەتى وركەستردەن, 300-گە جۋىق مۋزىكانتتان قۇرالعان الىپ انسامبل «سەرپەردەن» «سارىارقاعا» دەيىنگى حالقىمىزدىڭ ەڭ ۇزدىك كۇيلەرىن ورىندايدى.

امانعالي قالجانوۆ