مەملەكەتتىك-جەكەمەنشىك سەرىكتەستىك اياسىندا استانادا اۋقىمدى جوبالار قولعا الىنعانى بەلگىلى. توعىز كونتسەسسيالىق جوبانىڭ ىشىندە ءۇش پاركينگ سالۋ, ەكى اۆتوۆوكزال, ءتورت ەمحانا, بەس بالاباقشا سالۋ كوزدەلگەن بولاتىن.
–بۇدان بۇرىن استانا اكىمدىگىندە بۇل جوبالار جەرگىلىكتى كاسىپكەرلەردىڭ نازارىنا ۇسىنىلىپ, جان-جاقتى تانىستىرىلدى. قازىرگى ۋاقىتتا كەيبىر تاراپتارمەن ناقتى كەلىسسوزدەر جۇرگىزىلۋدە. نەگىزىندە بۇل جوبالاردى ىسكە اسىرۋ بارىسىندا, ياعني ناقتى كىرىسەر كەزدە تاعى ءبىر جۇيەلى جوبالانادى. بىرقاتار بولىگىنە وزگەرىستەر ەنگىزىلۋى مۇمكىن. بۇگىندە وسى باعىتتا جۇمىستار ءجۇرىپ جاتىر, – دەيدى «استانا Innovations» اق مەملەكەتتىك-جەكەمەنشىك سەرىكتەستىكتى دامىتۋ باسقارماسىنىڭ باسشىسى ءاليا بيكەەۆا.
ونىڭ ايتۋىنشا, ورىنبور كوشەسىندەگى جوعارى سوتتىڭ جانىندا جانە ينۆەستيتسيالار جانە دامۋ مينيسترلىگى عيماراتى ماڭىنداعى پاركينگ جوباسىنا بىرقاتار بيزنەسمەندەر قىزىعۋشىلىق تانىتقان. ەگەر ەكى تاراپ تا جوبالار بويىنشا ناقتى كەلىسىمگە كەلسە, قالانىڭ وسى اۋماقتارىنان ەكى پاركينگ بوي كوتەرەدى. ەكەۋى دە جەر استى بولماق. جوسپار بويىنشا ولاردىڭ قۇرىلىسى 2017-2018 جىلدارى باستالۋى ءتيىس. بۇدان بولەك, «ماسكەۋ» بيزنەس ورتالىعى جانىنان ءۇش قاباتتى پاركينگ سالىنادى. ونىڭ قۇرىلىسى دا الداعى جىلدارعا جوسپارلانعان. ءار پاركينگتىڭ سىيمدىلىعى ورتاشا ەسەپپەن العاندا 500 اۆتوكولىكتەن جوعارى بولماق. ال قالعان جوبالار بويىنشا ءتيىستى باسقارمالار الەۋەتتى قۇرىلىسشى كومپانيالاردى انىقتاۋ ماقساتىندا ارنايى بايقاۋ جاريالاپ قويعان.
مەڭدوللا نۇرىمۇلى
