سەۋل مەن تبيليسيگە تىكەلەي رەيس اشىلدى
2 ماۋسىم كۇنى استانادان كورەياعا جانە گرۋزياعا تىكەلەي رەيستەر اشىلدى. سوڭعى بەس جىلدان بەرى «ەير استانا» اپتاسىنا 20 حالىقارالىق رەيستى جۇزەگە اسىرسا, بۇگىندە بۇل كورسەتكىش 67-گە جەتىپ وتىر.
اتالمىش اۋە كومپانياسىنىڭ پرەزيدەنتى پيتەر فوستەردىڭ ايتۋىنشا, «ەير استانا» ۇلتتىق كومپانياسىنىڭ باسشىلىعى الداعى اپتادا اقش-قا بارىپ, استانا – نيۋ-يورك اۋە باعىتىن اشۋ ماسەلەسىن تالقىلايدى. سونداي-اق, قازاقستان پرەزيدەنتى ن.نازارباەۆتىڭ بەس ينستيتۋتتىق رەفورماسىن جۇزەگە اسىرۋدىڭ 100 قادامى اياسىندا بيىل قىستا دۋبايعا, گونكونگقا جانە 2016 جىلدىڭ سوڭىنا قاراي توكيوعا اۋە جولى اشىلماقشى. سونىمەن بىرگە «ەير-استانا» اعىمداعى جىلى استانادان پاريجگە تىكەلەي ۇشاتىن رەيستەر اشۋدى جوسپارلاپ وتىر. ال, استانا-تبيليسي رەيسى بويىنشا اپتاسىنا ەكى رەت «Embraer-190» لاينەرى ۇشادى. وسىلايشا, الماتىدان اپتاسىنا بەس رەت اتالعان قالاعا قاتىنايتىن رەيستەردى قوسقاندا قازاقستان مەن گرۋزيا اراسىنداعى اۋە قاتىناسى كۇن سايىن جۇزەگە اسىرىلاتىن بولادى. بۇل رەتتە ەلىمىزدىڭ اۋە ارقىلى تاسىمالداۋشى ۇلتتىق كومپانياسىن ءىرى حالىقارالىق وپەراتور رەتىندە دامىتۋ تۋرالى ەلباسىنىڭ «100 ناقتى قادام» ۇلت جوسپارىنداعى تاپسىرمالار باسشىلىققا الىنعانى بەلگىلى.
استانادان «Boeing 767-300ER» ۇشاعى اپتاسىنا ءبىر رەت, الماتىدان ءۇش رەت سەۋلگە ۇشادى. شاراعا قاتىسقان كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى چو ەنگچون تامىز ايىندا سەۋلدەن استاناعا قاتىنايتىن اۋە جولى اشىلاتىنىن مالىمدەدى.
سەۋل مەن تبيليسيگە تىكەلەي قاتىنايتىن اۋە ۇشاقتارىنىڭ باعاسىنا كەلەتىن بولساق, گرۋزياعا باراتىن ۇشاق بيلەتىنىڭ قۇنى 65 مىڭ تەڭگەدەن باستالسا, كورەياعا قاتىنايتىن اۋە كولىگىنىڭ قۇنى 118 مىڭ تەڭگەدەن جوعارى. ارينە, بۇل كولىكتەردەگى سەرۆيستە ءمىن جوق. ولاردا جولاۋشىلاردىڭ جايلىلىعى ءۇشىن بارلىق مۇمكىندىكتەر قاراستىرىلعان.
كورەياعا – 6, ال گرۋزياعا جەتۋ ءۇشىن 3 ساعات كەتەدى ەكەن. «ەندەشە, اۋەدە كوبىرەك ۇشقاندى ۇناتاتىنداردى سەۋلگە جانە ازىراق ۇشقىسى كەلەتىندەردى تبيليسيگە شاقىرامىز» دەدى گرۋزيانىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى زۋراب پاتارادزە.
گۇلبارشىن وكەشقىزى