تۇڭعىش پرەزيدەنت كۇنى قارساڭىندا قازاقستان حالقى اسسامبلەياسىنىڭ ەتنوجۋرناليستيكا سالاسىنداعى رەسپۋبليكالىق «شاڭىراق» شىعارماشىلىق بايقاۋى قورىتىندىلاندى.
بۇل شارا قازاقستان حالقىنىڭ بىرلىگىن نىعايتۋ جانە ەتنوسارالىق قاتىناستار مەن مادەنيەتارالىق ۇندەستىك سالاسىنداعى مەملەكەتتىك ساياساتتىڭ جەتىستىكتەرىن ناسيحاتتاۋ ماقساتىندا ۇيىمداستىرىلعان. رەسپۋبليكالىق بايقاۋعا جۋرناليستەرمەن بىرگە مادەنيەتتانۋشى عالىمدار, ساراپشىلار دا قاتىستى.
– ەتنوجۋرناليستيكا سالاسىندا وتاندىق بۇقارالىق اقپارات قۇرالدارىنىڭ ءرولى مەن جاۋاپكەرشىلىگىن ارتتىرۋدى نەگىزگە العان كونكۋرسقا جەتپىستەن استام جۇمىس كەلىپ ءتۇستى. قازاقستاندىق پاتريوتيزمدى نىعايتۋعا, ەتنومادەني ورتالىقتاردىڭ قىزمەتىن تۇسىندىرۋگە جانە مەملەكەتتىك ءتىلدىڭ ءرولىن كوتەرۋگە باعىتتالعان ماقالالار, تەلە-راديوباعدارلامالار اراسىنان اتالىمى بويىنشا ۇزدىكتەرىن تاڭداۋعا تىرىستىق, – دەدى قازىلار القاسىنىڭ مۇشەسى ل.گۋميلەۆ اتىنداعى ەۇۋ جۋرناليستيكا جانە ساياساتتانۋ فاكۋلتەتىنىڭ دەكانى قايرات ساق.
بيىلعى جارىستىڭ جەڭىمپازدارى قاتارىندا تاتيانا جانديلدينوۆا, ناعاشىباي قابىلبەك, ياروسلاۆ كراسيەنكو, ميحايل پاريپسا, نۇربەك ءاميشا, جانار سايلاۋبەكقىزى, داريا بيدانوۆا ەسىمدەرى اتالىپ, باعالى سىيلىقتار تابىس ەتىلدى.
ايگۇل ۋايسوۆا
