كەشە استانا قالاسىنىڭ اكىمى ادىلبەك جاقسىبەكوۆ پەن فرانتسيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى فرانسيس ەتەننىڭ قاتىسۋىمەن شارل دە گوللدىڭ ەسكەرتكىشى اشىلدى.
بەسىنشى رەسپۋبليكانىڭ نەگىزىن قالاعان ايگىلى فرانتسۋز گەنەرالىنىڭ ەلوردا تورىنە ورىن تابۋى – ەكى ەل اراسىنداعى دوستىق قارىم-قاتىناستىڭ نىشانى.
ادىلبەك جاقسىبەكوۆ تۇلعانىڭ قازىرگى فرانتسيا مەملەكەتىنىڭ قالىپتاسۋىنا قوسقان ۇلەسىنىڭ زور ەكەنىن ايتا كەلە: «ءبىز تاۋەلسىزدىك العالى بەرى ەكى مەملەكەتتىڭ اراسىنا سەنىمگە نەگىزدەلگەن ۇلكەن دوستىق پەن ارىپتەستىك كوپىرى ورنادى. وسىنىڭ ءبارى – ەلباسى نۇرسۇلتان نازارباەۆتىڭ فرانتسۋز رەسپۋبليكاسىنىڭ بارلىق پرەزيدەنتتەرىمەن جاقسى مامىلەدە بولۋىنىڭ ارقاسى.
قازىر ءبىز تۇرعان كوشە دە شارل دە گوللدىڭ اتىمەن اتالادى. ياعني, بۇل جەردى فرانتسيانىڭ ءبىر بولىگى دەۋگە بولادى. ەسكەرتكىش باس قالامىزدىڭ كوركىن ودان ءارى ارلەي تۇسەدى دەگەن نىق سەنىمدەمىز» دەپ, استانا مەن پاريج اراسىنداعى ەكىجاقتى ىنتىماقتاستىقتىڭ جالعاسا بەرۋىنە ءمان بەرەتىنىن جەتكىزدى.
ال فرانتسۋز ەلشىسى: «فرانتسۋز رەسپۋبليكاسى پرەزيدەنتىنىڭ اتىنان, فرانتسۋز حالقىنىڭ اتىنان قازاقستانداعى بيلىك وكىلدەرىنە شەكسىز العىسىمدى ايتامىن. فرانتسياعا عانا ەمەس, الەمگە ۇلگى بولعان ازاماتىمىزدى قۇرمەتتەگەنى ءۇشىن استانا اكىمى ادىلبەك جاقسىبەكوۆ پەن قالانىڭ بارلىق تۇرعىندارىنا ەرەكشە ءىلتيپاتىمدى بىلدىرەمىن» دەپ اعىنان جارىلدى.
اتى اڭىزعا اينالعان فرانتسۋز قايراتكەرىنىڭ 3,1 مەترلىك ەسكەرتكىشى ۆالەري پيروجكوۆ اتتى شەبەردىڭ قولىنان شىققان. سونداي-اق, قوس استانانىڭ ساياسي-ەكونوميكالىق بايلانىسىنىڭ دالەلى رەتىندە 2008 جىلى ەلوردادا ايگىلى تۇلعانىڭ اتىنا كوشە بەرىلىپ, «فرانتسۋز كۆارتالى» جانە «پاريج كۆارتالى» تۇرعىن-ءۇي كەشەندەرىنىڭ قۇرىلىسى قولعا الىنعان ەدى.
نۇريسلام قۇسپانعالي
