ەلوردادا №2 كوپبەيىندى قالالىق بالالار اۋرۋحاناسىندا تراۆماتولوگيا جانە انەستەزيولوگيا سالاسىندا تاجىريبە الماسۋ بويىنشا شەبەرلىك ساباعى ءوتتى.
ەمحانا بازاسىندا وتكەن شەبەرلىك ساباعىنا بەلگىلى دارىگەر, تراۆماتولوگ-ورتوپەد, قىزىل كرەست اتىنداعى قورعان وبلىستىق بالالار كلينيكالىق اۋرۋحاناسىنىڭ ءبولىم مەڭگەرۋشىسى اناتولي كوروبەينيكوۆ, انەستەزيولوگ-رەانيماتولوگ, قورعان قالاسىنداعى اكادەميك يليزاروۆ اتىنداعى تراۆماتولوگيا جانە ورتوپەديا ۇلتتىق مەديتسينالىق زەرتتەۋ ورتالىعىنىڭ انەستەزيولوگ-رەانيماتولوگ دارىگەرى ۆاديم ەۆرەينوۆ ارنايى شاقىرىلدى. وتا جاساۋ بارىسىندا ولار بالالارعا جالپى انەستەزيانىڭ «اۋىر» تۇرلەرىن قولدانباي-اق, زاماناۋي-وتكىزگىش, ايماقتىق جانسىزداندىرۋ, ەپيدۋرالدى انەستەزيا قولدانادى. بۇل – كوپتەگەن شەت مەملەكەتتەردە قولدانىلاتىن انەستەزيانىڭ زاماناۋي ءتۇرى.
– اتا-انالار وتا جاساۋ بارىسىندا جالپى ناركوز سالدىرعاننان قورقادى, دارىگەرلەر وتادان كەيىنگى اسقىنۋدىڭ بولماعانىن ويلايدى. وسى تۇرعىدا, بۇل ءادىس وتە ءتيىمدى جانە ول ەۋروپادا كەڭىنەن تارالعان. ال بىزگە ەندى كەلىپ جاتىر. بۇل ءادىستىڭ ءمانى – وتا جاسالاتىن دەنە بولىگىن عانا جانسىزداندىرۋ, بالا بۇل كەزدە ۇيىقتاپ جاتادى, بىراق ءوزى تابيعي دەمالادى, وعان جاساندى وكپەمەن دەمالدىرۋ اپپاراتىن قوسۋدىڭ قاجەت جوق. سونىمەن قاتار بۇل ءادىستىڭ ارتىقشىلىعى, وتادان كەيىن بالا ويانعاندا ونىڭ ەش جەرى اۋىرمايدى, سوندىقتان بۇل رەتتە بالاعا وتادان كەيىنگى باستاپقى كەزەڭدە سالىناتىن انەلگەتيكتەر قولدانبايمىز. وسى باعىتتا جيناعان تاجىريبەمىزدى بولىسۋگە كەلدىك, – دەيدى اناتولي كوروبەينيكوۆ.
شەبەرلىك ساباعىندا ەلوردالىق دارىگەرلەر بىلىكتىلىگىن ارتتىردى. سولاردىڭ ءبىرى – دارىگەر-تراۆماتولوگ-ورتوپەد ولجاس باينازاروۆ.
– بۇگىن بىزگە قورعان قالاسىنان ەكى دارىگەر كەلىپ جاتىر. ولار بالالاردىڭ اياق, قول سىنىعىنا وتانى اعزاسىنا كوپ زيان كەلتىرمەي وتىرىپ جاساۋدى ۇيرەتۋگە كەلدى. وتادان كەيىن بالالار گيپسپەن ۇزاق جۇرگەنشە قوزعالعانى ماڭىزدى, ياعني مۇنداي وتادان كەيىن ولار گيپسپەن 1-2 اي جاتپايدى, ءبىر اپتادان كەيىن جۇرە باستايدى. كوپتەن بەرى مۇنداي شەبەرلىك ساباقتارى ءبىرىنشى رەت ءوتىپ وتىر, – دەيدى ول.
