قالا تىرشىلىگى

شەت ايماقتاردا جاڭا مەكتەپ سالىنادى

جۋىردا مەملەكەت باسشىسى قاسىم-جومارت توقاەۆ ەلوردانىڭ «لەسوزاۆود» ىقشاماۋدانىندا ورنالاسقان №23 مەكتەپكە بارعان كەزىندە وقۋ عيماراتىنىڭ احۋالىمەن تانىسىپ, اتالعان اۋداندا جاڭا مەكتەپ سالۋ قاجەتتىگىن ايتقان ەدى. پرەزيدەنت تاپسىرماسى بويىنشا قازىرگى تاڭدا قانداي جۇمىس اتقارىلىپ جاتقانى جايلى ءبىز ءتيىستى مەكەمە وكىلىنەن سۇرادىق.قالالىق ورتانى رەگەنەراتسيالاۋ باسقارماسى ديزاين جانە جوبالار ساپاسى ءبولىمىنىڭ باس مامانى اياگوز ساپاقباەۆانىڭ مالىمدەۋىنشە, جاقىندا №23 مەكتەپكە ارنالعان 600 ورىندىق جاڭا عيماراتتىڭ قۇرىلىسى بوي كوتەرەدى.
– وندا وقۋ كابينەتتەرى, سپورت زالى, اسحانا, ءماجىلىس زالىمەن بىرگە مەنتالدىق كەمشىلىكتەرى بار بالالارعا ارنالعان ينكليۋزيۆتى سىنىپتار دا بولادى. ويتكەنى بۇل مەكتەپتە ەرەكشە قاجەتتىلىكتى تالاپ ەتەتىن 9 بالا ءبىلىم الۋدا, – دەيدى ول.
بۇگىندە «استاناتەحسترويەكسپەرت» جشس-مەن جوبالاۋ جۇمىستارىنا كەلىسىمشارت جاسالىپ, ەسكيزدىك جوبانى دايىنداۋ بويىنشا جۇمىس­تار جۇرگىزىلۋدە. عيمارات قۇرىلىسىنىڭ اياقتالۋ مەرزىمى 2020 جىلعى قىركۇيەككە تۇسپا-تۇس كەلەدى دەپ جوسپارلانۋدا, ياعني شاكىرتتەر كەلەسى وقۋ جىلىن جاڭا مەكتەپتە قارسى الادى.
نۇر-سۇلتان قالاسىنىڭ شەت ايماقتارىن دامىتۋدىڭ 2020-2022 جىلدارعا ارنالعان كەشەندى جوسپارى اياسىندا بۇدان بولەك ءۇش مەكتەپ قۇرىلىسى سالۋ كوزدەلگەن. ونىڭ بىرەۋى وسى اۋدانداعى تايبۋرىل كوشەسى, 23-ءۇي مەكەنجايىندا ورنالاسقان №34 مەكتەپكە جاپسارجاي بولسا, قالعان ەكەۋى – جاڭا مەكتەپتەر. ولاردىڭ ءبىرى – «ۇركەر» تۇرعىن الابىندا, ەندى ءبىرى قاراساي باتىر مەن بۇلانتى كوشەلەرىنىڭ قيىلىسىندا بوي كوتەرەتىن بولادى.
بۇعان دەيىن حابارلاعانىمىزداي, شاھارداعى 14 مەكتەپتە وقۋشى سانى نورمادان ارتىق. ونىڭ ىشىندەگى 8-ءى, ناقتىراق ايتساق, №13, 14, 27, 31, 40, 53, 59, 85 مەكتەپتەر ءۇش اۋىسىمدى رەجيمدە وقىتۋعا ءماجبۇر.
ءبىلىم باسقارماسىنىڭ ستراتەگيا, تالداۋ جانە تسيفر­لىق تەحنولوگيالار ءبولىمى باسشىسى جازيرا اسانوۆا ۇسىنعان مالىمەتكە سۇيەنسەك, ەلوردانى دامىتۋدىڭ بەسجىلدىق كەشەندى جوسپارىندا 37 جاڭا مەكتەپ پەن 10 جاناما قۇرىلىس سالۋ قاراستىرىلعان. قازىرگى تاڭدا 5 وبەكت سالىنىپ, پايدالانۋعا بەرىلدى.

تاعىدا

ۇقساس جاڭالىقتار

پىكىر ۇستەۋ

Back to top button