بالالاردى قورعاۋ كۇنى اياسىندا بۇگىن ەلوردالىق بۇلدىرشىندەرگە ارنالعان «شۋاقتى استانا» مەرەكەلىك باعدارلاماسى وتۋدە. قر قارجى مينيسترلىگىنىڭ الدىنداعى الاڭعا كەلۋشىلەر شىعارماشىلىق ونەر ۇجىمدارىنىڭ كونتسەرتىن تاماشالاي الادى. سونىمەن بىرگە, بالالاردىڭ اسفالت ۇستىندە سۋرەت سالۋدان جارىسىپ, كوڭىلاشار ويىندارعا قاتىسۋعا مۇمكىندىگى بار.
ۇيىمداستىرۋشىلار سونداي-اق, فونتان اينالاسىندا ءسان سالونىن قۇرعان. وندا قالالىق كوللەدجدەردىڭ ستۋدەنتتەرى كىشكەنتاي قىزداردىڭ شاشىن تەگىن ساندەپ, بەتىن بودي-ارت ستيلىندە ادەمىلەپ ورنەكتەيدى. بالالارعا بۇل مەرەكە اياسىندا ماكياج بەن مانيكيۋر جاساتۋعا دا بولادى. ال, «دانالىق» كوللەدجىنىڭ ستۋدەنتتەرى بولسا ۇل-قىزداردىڭ بويى مەن سالماعىن ولشەپ, العاشقى كومەك كورسەتۋدىڭ تاسىلدەرىن كورسەتۋدە. بالالاردى بۇدان باسقا دا ءتۇرلى قىزىقتار كۇتۋدە. مەرەكەلىك شارا ساعات 14:00-گە دەيىن جالعاسادى.
ءمادينا جاقىپ
