استانا كۇنىنە وراي, 5-7 شىلدە ارالىعىندا «قازاق ەلى» مونۋمەنتى الدىنداعى الاڭدا «شۋاقتى قالا» وتباسىلىق فەستيۆالى وتەدى. اشىق اسپان اياسىنداعى شارا وسى كۇندەرى 10.30-دان 22.30-عا دەيىن جالعاسادى.
«قازاق ەلى» مونۋمەنتى الدىنداعى الاڭ بۇقارالىق ءارى اسەرلى شارا وتەتىن ءبىرتۇتاس ساحنا رەتىندە جاسالادى. ەرتەگى اۋانىنا ۇقساس ستيل مەن لاندشافتتى ديزايننىڭ ارقاسىندا مونۋمەنتتىڭ اينالاسى مەرەكەلىك كۇيگە ەنەدى. اۋماق 16 الاڭعا بولىنگەن. ونىڭ ارقايسى – ءوز الدىنا بولەك بەزەندىرىلگەن جەكە كەڭىستىك. ويىن-ساۋىق الاڭدارى ءار ءتۇرلى جاس شاماسىنداعى بالالارعا ارنالعان. بالدىرعاندار تەك ويىن باعدارلاماسىنا قانىعىپ قانا قويماي, پايدالى تانىمدىق ءبىلىم الادى. كۇلكى شاقىراتىن ويىن-ساۋىق تۇرلەرى ءار ادامنىڭ بالالىق شاعىن ءبىر ءسات ەسكە ءتۇسىرىپ, تاماشا اسەرگە بولەمەك.
«شەبەرلەر قالاسى» – قولونەر شەبەرلەرىنىڭ جۇمىستارى قويىلعان الاڭ. مۇندا كەز كەلگەن ادام قالاعان كادەسىيىن ساتىپ الۋمەن قاتار, ونى جاساۋدىڭ شەبەرلىك ساباقتارىنا قاتىسا الادى.
«مەن استانادا تۇرامىن!» الاڭىنداعى سۋرەتشىلەر قاتىسۋشىلاردىڭ پورترەتتەرى مەن دوستىق شارجدار سالادى. سونىمەن قاتار, مۇندا «مەنىڭ استانام» كارتيناسىنىڭ نوبايى سالىنعان ۇلكەن ستەند قويىلادى. وندا كەز كەلگەن قوناق كارتينانىڭ كەي بولىكتەرىن بوياي الادى.
فەستيۆال قوناقتارى باستى توسىن سىيدى مەرەكە كۇندەرىنەن كۇتەدى.
