شىعارماشىل ۇستازدىڭ ۇستانىمى نىق
استانا قالاسى ءبىلىم باسقارماسىنىڭ دەرەكتەرىنە سايكەس, 2013-2014 وقۋ جىلىندا 89553 مەكتەپ وقۋشىسىنىڭ 27286-سى بارلىق دەڭگەيدەگى وليمپيادالار, عىلىمي, ينتەللەكتۋالدىق كونكۋرستارعا قاتىسىپتى. بۇل وقۋشىلاردىڭ جالپى سانىنىڭ 25 پايىزىن قۇرايدى. بۇدان باسقا, وتكەن جىلى ەلوردالىق 269 وقۋشى امەريكا, البانيا, برازيليا, گرۋزيا, يندونەزيا, گوللانديا, رۋمىنيا, رەسەي, تۇركيا, وزبەكستان, شۆەتسيا, جاپونيا ەلدەرىندە وتكەن حالىقارالىق وليمپيادالار مەن عىلىمي جوبالارعا قاتىسىپ, 188 مەدال يەلەنگەن. ونىڭ ىشىندە 53 التىن, 60 كۇمىس, 75 قولا مەدالدەر بار.
ارينە, بۇل – تەك وقۋشىلاردىڭ عانا ەمەس, اتا-انالارى مەن ۇستازدارىنىڭ ورتاق جەتىستىگى.
– دەسە دە, ەلوردالىق وقۋشىلاردىڭ جالپى سانىنا شاققاندا اسا كوپ تە ەمەس, – دەيدى «ءبىلىم-2050» شىعارماشىل ۇستازدار وداعىنىڭ جەتەكشىسى گۇلزادا ورازوۆا, – قاراپ وتىرساڭىز, وليمپيادا جەڭىمپازدارى كوبىنەسە «زەردە», «ميراس», قازاق-تۇرىك ليتسەيى, زياتكەرلىك مەكتەپتەردەن شىعادى. ال, مەن كەرىسىنشە, ءسۇت بەتىنە قالقىپ شىققان قايماقتاي ۇزدىكتەر ەمەس, ەلوردالىق مەكتەپ وقۋشىلارىنىڭ 75 پايىزىن قۇرايتىن وقۋشىلار جايىنا الاڭدايمىن.
گۇلزادا قادىسقىزىنىڭ ماماندىعى – پەداگوگ. كوپ جىلدار قازاق تىلىنەن ساباق بەرە ءجۇرىپ, ءبىلىم بەرۋ سالاسىنىڭ ماسەلەلەرىنە قانىقتى. «ءبىلىم-2050» شىعارماشىل ۇستازدار وداعىن قۇرىپ, قازاق مەكتەپتەرىندە ءبىلىم ساپاسىن ارتتىرۋدى مىندەت ەتىپ قويدى. وداقتىڭ باستى ماقساتى – ورتا ءبىلىم بەرەتىن قازاق مەكتەپتەرىندە مۇعالىمدەرگە ادىستەمەلىك كومەك كورسەتۋ جانە ءبىلىم بەرۋ جۇيەسىن جەتىلدىرۋدەگى بارلىق مۇمكىندىكتەردى قاراستىرىپ, قىزمەتتى ۇيلەستىرۋ. ال, وعان قالاي قول جەتكىزۋگە بولادى دەگەن سۇراققا بىلىكتى ۇستازدىڭ جاۋابى دايىن. ياعني, زاماناۋي وقىتۋ ءادىس-تاسىلدەرىن قازاق مەكتەپتەرىنە كەڭىنەن ەنگىزىپ, ءبىلىم مازمۇنىن جاڭارتۋ قاجەتتىگىن العا تارتادى.
گۇلزادا قادىسقىزى ءسوزىنىڭ دالەلى رەتىندە رەيتىنگىسى تومەن دەگەن ەكى بىردەي مەكتەپتى قامقورلىعىنا الىپ, ءبىر جىلدىڭ ىشىندە وليمپيادا ۇزدىكتەرىن دايارلاپ شىعاردى.
– وقۋشىلارمەن جۇمىس ىستەي ءجۇرىپ, سانادا قالىپتاسقان قاساڭدىقتى بۇزۋعا تىرىستىم, – دەيدى گۇلزادا. – ءتىپتى, «وليمپيادانىڭ نە كەرەگى بار؟» دەگەن دە سۇراق قوي-
عاندار بولدى. بۇل – كوبىنە الەۋمەتتىك جاعىنان تومەن وتباسىلارىندا تاربيەلەنەتىن بالالاردىڭ كوزقاراسى. ءبىر قىزىعى, جەڭىمپازدار وسىلاردىڭ اراسىنان شىقتى.
گۇلزادا ورازوۆا شاكىرتتىڭ جۇيەلى ءبىلىم الۋىنداعى كەدەرگىلەردى انىقتاۋدا بىلىكتى ۇستازدارمەن كەزدەسىپ, ولاردىڭ تاجىريبەلەرىن زەرتتەيدى. جاس ماماندارمەن سۇحباتتاسا كەلە, ولاردىڭ الدىنان شىققان قيىندىقتاردى زەردەلەيدى. بلۋم تاكسونومياسىنا نەگىزدەلىپ جاسالعان مۇعالىمنىڭ جۇمىس داپتەرلەرى جانە مەكتەپ پەداگوگتەرىنە ارنالعان توپتاما – وسى ىزدەنىستىڭ ناتيجەسى. مەملەكەتتىك ستاندارت نەگىزىندە قازاق ءتىلى, ماتەماتيكا, قازاقستان تاريحى, حيميا, فيزيكا, اعىلشىن ءتىلى پاندەرىنەن مۇعالىم مەن وقۋشىعا ءار ساباق بويىنشا تولىق اقپارات ازىرلەدى. ءار ساباقتا وقۋشىنىڭ ءبىلۋ, ءتۇسىنۋ, قولدانۋ ارەكەتىن ۇيىمداستىرىپ, العان ءبىلىمىن سارالاپ, ويلاۋ قابىلەتىن دامىتاتىن تاپسىرمالار شاكىرتتى العا جەتەلەيدى. ءوز ءبىلىمىن ءوزى باعالاي الاتىن حالگە جەتكىزەدى.
ورتالىقتىڭ «مەكتەپ پسيحولوگياسىنىڭ جۇمىس كىتابى» توپتاماسى ءتول تىلىمىزدە جازىلعان العاشقى ەڭبەك بولعاندىقتان, مەكتەپ پسيحولوگىنىڭ جۇمىسىن ساۋاتتى ۇيىمداستىرۋعا قاجەتتى قۇرال رەتىندە جاقسى باعالاندى.
«ۇبت-عا دايىندالامىز» اتتى سەريامەن قازاق ءتىلى, قازاقستان تاريحى جانە ماتەماتيكا, فيزيكا, بيولوگيا پاندەرىنە ارنالعان وقۋ قۇرالدارىن شىعاردى. جۇيەلى تۇردە دايىندالعان وقۋ قۇرالدارى بالالاردىڭ ءبىلىمىن ۇشتاۋدا ءتيىمدى ەكەنىن دالەلدەدى.
اڭگىمە سوڭىندا «ءوز بالالارىڭىز قانداي مەكتەپكە بارادى؟» دەپ سۇرادىم.
– قازاق مەكتەبىنە, – دەپ جاۋاپ بەردى گۇلزادا. «انا تىلىمىزدە وقىتاتىن مەكتەپتەردە شاكىرتتەردىڭ تاربيەسىن, كىسى سىيلاۋىن, قازاقى ساناسىن قالىپتاستىرۋدىڭ ۇزدىك ونەگەسى, تاماشا ءداستۇرى بار. عۇلاما ءال-ءفارابيدىڭ «تاربيەسىز بەرىلگەن ءبىلىم – ادامزاتتىڭ قاس جاۋى» دەگەن ءسوزى بار عوي. ءبىلىم مەن تاربيە – بۇلاقتىڭ ەكى ارناسى. مەنىڭ بالالارىم وسى قاسيەتتى بۇلاقتا سۋسىنداۋى كەرەك. ال, بۇلاقتىڭ كوزىن اشۋ, ءسىز بەن ءبىزدىڭ – قاسيەتتى مىندەتىمىز» دەيدى ۇستاز.
ايگۇل ۋايسوۆا