27 – ناۋرىز حالىقارالىق تەاتر كۇنى. بۇل كۇندە دۇنيە ءجۇزىنىڭ بارشا تەاتر ۇجىمى, ونەر قايراتكەرلەرى كاسىبي مەرەكەسىن اتاپ وتەدى. 24-25 ناۋرىز كۇندەرى قر مەملەكەتتىك سىيلىعىنىڭ لاۋرەاتى, قازاقستاننىڭ ەڭبەك سىڭىرگەن قايراتكەرى نۇرلان ءورازاليننىڭ
«شىراق» ليريكالىق دراماسىنىڭ پرەمەراسى ءوتتى. بۇل – تەاتر اكتەرى شىڭعىس جاقىپبايدىڭ العاشقى لابوراتوريالىق جۇمىسى. «جاستار» تەاترى جاس رەجيسسەردىڭ قولىنان شىققان تىڭ دۇنيەمەن تەاتر شىمىلدىعىن ءتۇردى.
جاس وتباسىنىڭ باسىنان كۇتپەگەن وقيعا ءوتتى. باس كەيىپكەر ساعىن جۇمىسىندا جەتكەن جەتىستىگىن تويلاپ جۇرگەندە, قاربالاستا جارى نۇرگۇلدىڭ تۋعان كۇنى ەسىنەن شىعىپ كەتەدى. ونىمەن قوسا, ونىڭ ادالدىعىنا كۇمان كەلتىرىپ, كوڭىلىنە كىربىڭ تۇسىرەدى. جۇبايىنا رەنجىگەن جاس كەلىنشەك ويدا جوقتا تاڭات ەسىمدى بوزبالامەن كەزدەسىپ, ارتى ەرتەگىدەي ءبىر اسەم كەشكە ۇلاسادى. تازالىق پەن سۇلۋلىقتى ومىرلىك سەرىك ەتكەن تاڭاتتىڭ ءمولدىر ويى ارقىلى وقيعا ءوربىپ, سوڭىندا ماحاببات دەيتىن كيەلى ۇعىم ءوز بيىگىندە سالتانات كۇرادى.
ءومىرىمىزدىڭ ماڭىزدى بولشەگى – وتباسىلىق سىيلاستىقتى قالاي ساقتاپ قالماق كەرەك؟ سەنىم مەن كۇدىك تايتالاسقا تۇسكەندە, تۋرا جولدى قالاي تاپپاق كەرەك؟ قويىلىم كۇلدىرە وتىرىپ, كورەرمەندى ماڭگىلىك قۇندىلىقتاردىڭ قادىرىن ءتۇسىنىپ, باعالاۋعا شاقىرادى. قويىلىم بارىسىندا كەيىپكەرلەردىڭ ءوزارا ديالوگ قۇرىپ, تارتىستى ساتتەرى شىراق جاعىپ, وشىرۋمەن سيپاتتالاتىن شىعارما جاس رەجيسسەردىڭ دراماتۋرگياداعى ەرەكشە ىزدەنىسىن كورسەتەدى. ەكى كۇندە دە زال تولى حالىق, انشلاگ بولدى. پەسا اۆتورى – قر مەملەكەتتىك سىيلىعىنىڭ لاۋرەاتى, قازاقستاننىڭ ەڭبەك سىڭىرگەن قايراتكەرى نۇرلان ءورازاليننىڭ قىزى ەلميرا, بالالارىمەن پرەمەراعا قاتىستى.
«شىراق» ليريكالىق دراماسىنىڭ كەيىپكەرلەرىن: نۇرگۇلدى جامال نۇرجاۋبەكوۆا ويناسا, تاڭاتتى اسىلبەك ءايتىش سومدادى, ساعىن بولىپ اسلان جانۇزاقوۆ كورىنسە, قر ەڭبەك سىڭىرگەن قايراتكەرى عاني قۇلجانوۆ كورشى كەيپىندە كورىندى, ال قالا تازالاۋشى ايەلدى سومداعان ديانا سماعۇلوۆا بولسا, كەيىپكەر قىز وبرازىن ناۋرىز ساباعاتوۆا ورىندادى.
بۇل پرەمەرانىڭ باستى ەرەكشەلىگى مۋزىكالىق سۇيەمەلدەۋىندە دەۋگە بولادى. مۋزىكالىق جەتەكشى انەل سيرگەباەۆا باستاعان مۋزىكامەن سۇيەمەلدەۋشىلەر – ايسۇلتان جاليەۆ, ءلاززات قۋانىشوۆا, اسپاپپەن سۇيەمەلدەۋشىلەر – راسۋل ەرنازار, سايدا ماكسۋموۆا, الەكساندر سەروۆ سپەكتاكلدە مارحابا ءسابيدىڭ «ۇنسىزدىك», «جاقسى ادام», «و نەمەنە؟», «مارسقا», «تاسپاي قايتەمىز؟» اندەرى كورەرمەننىڭ جۇرەگىنە جول تاپتى, كەرەمەت ورىنداۋىمەن ەستە قالدى.
باستى يدەياسى – ماحابباتقا ادالدىق, تازالىق, وتباسى قۇندىلىقتارىن دارىپتەۋ, نەنى قادىر تۇتىپ, نەدەن جيرەنۋ كەرەك دەگەنگە سايادى جانە ول وي ۇدەسىنەن شىعارماشىلىق توپ تولىعىمەن شىقتى دەپ ەسەپتەيمىز.
ليريكالىق دراما جانرىنداعى ادامنىڭ جانجالدى ارەكەتى مەن جاعدايىن بەينەلەگەن قويىلىم كەيىپكەرلەردىڭ ومىرىندەگى كەيبىر ەپيزودتاردى, قاقتىعىستاردى بەينەلەيدى جانە ساحنالايدى. كەيىپكەرلەر اراسىنداعى ديالوگ ارقىلى قوعامدا ءجيى كەزدەسەتىن ساتتەر, سەلت ەتكىزەر تۇستاردى شىنايى بەينەلەيدى.
