م.وتەمىسۇلى اتىنداعى وقۋشىلار سارايىندا استانا قالاسى سارىارقا اۋدانى اكىمىنىڭ جەتىم بالالار مەن الەۋمەتتىك از قامتىلعان وتباسىلاردىڭ بالالارىنا ارنالعان جاڭا جىلدىق شىرشا مەرەكەسى ءوتتى.
ايتۋلى شاراعا 230 بالا قاتىستى. بارلىق شاقىرىلعان بالالار جاڭا جىلدىق سىيلىقتارعا يە بولدى. ءوز كەزەگىندە اۋدان اكىمى ەرمەك وسپانوۆ: «سىزدەردى جاڭا جىل مەرەكەسىمەن شىن جۇرەكتەن قۇتتىقتايمىن. وسى جىل سىزدەر ءۇشىن جاقسىلىقتارعا تولى بولسىن. ەلىمىزدىڭ ەلەۋلى ازاماتتارى بولىڭدار! سىزدەرگە زور دەنساۋلىق, باقىتتى بالالىق شاق تىلەيمىن» دەپ ءوز قۇتتىقتاۋىن جەتكىزدى.
كونتسەرتتىك باعدارلاماعا «سوزۆەزديە», «بايتەرەك» بيشىلەر ءانسامبلى, «بالدىرعان» تسيركى, «زۆەزدنىي چاس» ستۋدياسىنىڭ انشىلەرى, «گۇلداۋرەن» انشىلەر توبى جانە باسقا دا ونەرپازدار قاتىستى. «قىسقى مەرەكە» انىمەن «يۋنوست استانى» ستۋدياسى كوپشىلىك كوڭىلىنەن شىقتى. «ەر توستىك» ەرتەگىسىنىڭ جەلىسىندە ۇيىمداستىرىلعان كونتسەرتتە جاعىمسىز كەيىپكەر بەكتورىمەن بي جارىسى بولدى. بەكتورى جەڭىلىس تاۋىپ, اياز اتا ءبارىن دوستىققا, بىرلىككە شاقىردى. شاتتىققا تولى شارا سوڭىندا بالالار «نۇر» قازاق تەاترى ساحنالاعان «قار حانشاسىنىڭ سارايىندا» اتتى ەرتەگىنى تاماشالادى.
ەربول جانات
