استانا مەديتسيناسىنىڭ ادىمى تاعى ۇزارا تۇسۋدە.
ەلىمىزدە جۇرەككە جاسالعان تۇڭعىش ترانسپلانتاتسيا وتكەن جىلى تامىز ايىندا جۇزەگە اسىرىلعان ەدى. دونورلىق جۇرەك اۋىستىرۋ وپەراتسياسى ەكىنشى مارتە جاسالىپ, ءساتتى اياقتالدى.
راس, بيىلعى جازدا الماتى دارىگەرلەرىنىڭ جۇرەك ترانسپلانتاتسياسى ءۇمىتتى اقتاماعان ەدى… ەلورداداعى ۇلتتىق عىلىمي كارديوحيرۋرگيا ورتالىعىنداعى وتا الگى ولقىلىقتىڭ ورنىن تولتىرعانداي. تاڭ قالارلىعى سول, ناۋقاسقا دونور جۇرەگى ءبىر مىڭ ەكى ءجۇز شاقىرىم قاشىقتىقتاعى الماتى قالاسىنان ءبىرەگەي مەديتسينالىق جابدىق ارقىلى جەتكىزىلگەن.
«وسى وپەراتسيانىڭ ءساتتى وتۋىنە بارلىق قىزمەتتەردىڭ جۇيەلى جۇمىسى سەپتىگىن تيگىزدى. دونورلىق جۇرەك الماتىدان استاناعا جەتىنشى قاراشا كۇنى جەتكىزىلدى. دونوردىڭ جۇرەگى ءتورت ساعات ىشىندە ترانسپلانتاتسيالانۋى كەرەك. جۇرەك «Organ Care System» بىرەگەي مەديتسينالىق قوندىرعىسىمەن اكەلىندى. بۇل قوندىرعى ەندى ەلدىڭ كەز كەلگەن تۇكپىرىنەن دونورلىق جۇرەكتى جەتكىزۋگە مۇمكىندىك بەرەدى. «Organ Care System» دونورلىق جۇرەكتى ون ەكى ساعاتقا دەيىن ساقتاي الادى» دەدى ورتالىقتىڭ باسقارما توراعاسى يۋري پيا.
مامانداردىڭ سوزىنە سەنسەك, دونورلىق جۇرەكتى ساقتاۋعا ارنالعان قوندىرعىنىڭ باعاسى 400 مىڭ دوللاردى قۇرايدى ەكەن. ونى پايدالانۋ ءۇشىن ارنايى دايىندالعان ماماندار قاجەت. بۇل ىستە اسا تياناقتىلىق پەن ۇقىپتىلىق بولۋعا ءتيىس. سەبەبى, جۇرەكتىڭ جەتكىزىلۋىنە سانيتارلىق اۆياتسيا عانا ەمەس, توتەنشە جاعدايلار قىزمەتكەرلەرى مەن كۇش قۇرىلىمدارى دا تارتىلعان. بۇگىندە «Organ Care System» قوندىرعىسى اقش, اۆستراليا مەن گەرمانيانىڭ الەمدىك دەڭگەيدەگى ءۇش ءىرى كلينيكاسىندا عانا پايدالانىلادى ەكەن.
«دونورلىق جۇرەك اۋىستىرۋدىڭ ەكىنشى وتاسى ءساتتى اياقتالدى, قازىر ەمدەلۋشىنىڭ جاعدايى تۇراقتى. ءارى قاراي بارلىعى جوسپارعا ساي بولادى دەپ ويلايمىز» دەيدى دارىگەرلەر.
ەلىمىزدە بۇل وپەراتسياعا ءجۇز جەتپىسكە جۋىق ادام ءزارۋ كورىنەدى.
