قازاقستاندىق كاسىپقوي بوكسشى گەننادي گولوۆكين چەمپيوندىق دارەجەسىن قورعاپ قالۋ ءۇشىن ۇلىبريتانيالىق مەتتيۋ ماكلينمەن كەزدەسۋ وتكىزدى.
«بۇعان دەيىن گەننادي تالاي مىقتىمەن جۇدىرىق ءتۇيىستىردى عوي, دەگەنمەن بۇل جولعى قارسىلاسى ولاردان وق بويى وزىق». ساراپشىلار جەكپە-جەك الدىندا وسىلاي دەگەن. ماكليندى اساۋ مىنەزدى, قىزۋ قاندى, ايلاكەر دە اككى بوكسشى رەتىندە تانىپ ۇلگەرگەن جانكۇيەرلەر گەناعا دەگەن سەنىمىنە سەلكەۋ ءتۇسىرمەگەنىمەن, «قالاي بولار ەكەن» دەگەن سۋماقاي سۇراق تالايدىڭ كوكەيىن تەسكەن.
«بولعاننان بولادىسى قىزىق» بولعان جەكپە-جەك ءوتتى اقىرى. العاشقى راۋند باستالىسىمەن قازاقستاندىق بوكسسۇيەر قاۋىمنىڭ كوڭىلىندەگى كۇمان بۇلتى سەيىلىپ سالا بەردى. سەبەبى, گەنانىڭ اڭدىسۋ ساتىنەن-اق ءالدەقايدا سەنىمدى, الدەقايدا شىمىر ەكەنى اڭعارىلدى. العاشقى 3 مينۋتتىق كەزەڭ اياقتالۋعا 10 سەكۋند قالعاندا وڭ قولىمەن تاناۋدىڭ ءۇستىن الا سىلتەگەن سوققىسى ماكليندى ءتالتىرەكتەتىپ جىبەردى. شابۋىلدى جالعاستىرا بەرەم دەگەندە گونگ «اراشا ءتۇستى». ەكىنشى راۋندتىڭ ورتا شەنىنە دەيىن تارازى باسى تولىعىمەن گەنا جاققا اۋىپ بولدى. ءتىپتى, ءبىزدىڭ بوكسشىمىزدىڭ ءار سوققىسى بريتاندىقتى سۇلاتىپ تۇسىرە جازداپ جاتتى. كەلەسى ءبىر ساتتە گولوۆكين قۇلاشتاي ۇرىپ, جاق تۇسىنا ءدال تيگىزگەندە, ماكلين رينگتىڭ «بەسىنشى بۇرىشىن» ىزدەپ كەتتى. ءۇشىنشى راۋندتىڭ ورتاسىندا گەنا سول قولىمەن قارسىلاسىنىڭ ءبۇيىر تۇسىنا اۋىر سوققى جۇمسادى. اپپەركوت ماكليننىڭ قابىرعاسىن قاۋساتىپ جىبەرگەندەي اسەر قالدىردى. مەتتيۋ ەرىكسىز ەكپەتىنەن جاتا قالدى.
وسى تۇستا كىم-كىمدى دە كەلەسى قارسىلاس قاي بوكسشى بولار ەكەن دەگەن سۇراق مازالاۋى مۇمكىن. گولوۆكيننىڭ پروموۋتەرى توم لەففلەر ءمالىمدەۋىنە سەنسەك, WBA نۇسقاسى بويىنشا الەم چەمپيونى كەلەسى قارسىلاس «شوكولاد بالا» لاقاپ اتىمەن تانىمال امەريكالىق بوكسشى پيتەر كۋيللين بولۋى مۇمكىن. امەريكالىق بوكسشى شارشى الاڭدا 28 كەزدەسۋ وتكىزىپ, بارلىعىندا دا جەڭىسكە جەتكەن, ونىڭ 20-سىن نوكاۋتپەن اياقتاعان. ال گولوۆكين وتكىزگەن 27 جەكپە-جەگىندە دە جەڭىسكە جەتىپ, 24 قارسىلاسىن نوكاۋتقا جىبەرگەن.
ەربول جانات
