جاڭالىقتار

سوتتىڭ ءادىل ءارى اشىق بولۋى – باستى تالاپ

نۇرسۇلتان نازارباەۆتىڭ بەس ينستيتۋتسيونالدىق رەفورمانى جۇزەگە اسىرۋعا بايلانىستى ۇسىنعان 100 ناقتى قادامدا سوت جۇيەسىنىڭ مەيلىنشە ءادىل ءارى اشىق بولۋ قاجەتتىگى ناقتى ايتىلعان. ەلباسىنىڭ وسى تاپسىرماسىنا سايكەس, استانا قالالىق سوتى جۋرناليستەردىڭ باسىن قوسىپ, دوڭگەلەك ۇستەل جيىنىن وتكىزدى.

ەركىن پىكىر الماسۋعا قۇرىلعان شاراعا استانا قالالىق سوتىنىڭ سۋدياسى تايسيا ميرزويان,  استانا قالالىق سوتىنىڭ كەڭسەسى باسشىسىنىڭ ورىنباسارى ايبول  يبراگيموۆ, استانا قالالىق سوتى جانە ولارعا تەڭەستىرىلگەن سوتتار توراعالارى جانە باس رەداكتورلار كلۋبىنىڭ مۇشەسى, «ادام جانە زاڭ» رەسپۋبليكالىق گازەتىنىڭ باس رەداكتورى مارات باشيموۆ قاتىستى.

جيىندا ءسوز سويلەگەن استانا قالالىق سوتىنىڭ سۋدياسى تايسيا ميرزويان قازىرگى تاڭدا سوت جۇيەسىنىڭ جۇمىسىن جەتىلدىرۋ ماقساتىندا كوپتەگەن زاماناۋي تاسىلدەر ەنگىزىلىپ جاتقانىن اتاپ ءوتتى.  بۇل تەحنولوگيالار سوت  ىستەرىن قاراۋ مەرزىمىن قىسقارتىپ, جۇمىستاعى جۇكتەمە مەن سىن-ەسكەرتپەلەردى ازايتۋعا سەپتىگىن تيگىزگەن كورىنەدى. بۇگىندە بارلىق سوت ءماجىلىسى وتەتىن زالداردىڭ بارلىعى بەينەباقىلاۋ قۇرىلعىلارىمەن قامتاماسىز ەتىلگەن. قالالىق سوتتاعى جيىن-سەمينارلاردى, ءار توقساندى, جىلدىقتى قورىتىندىلاۋعا ارنالعان باسقوسۋلاردىڭ ءبارىن اۋداندىق سوتتار ونلاين رەجيمىندە كورىپ, وي-پىكىر الماسا الادى.

–سوت ماجىلىسىنە جۋرناليستەر دە قوعامدىق باقىلاۋشى رەتىندە قاتىسۋعا بولادى.  ارينە, كەيبەر سوت ىستەرىن قاراۋ جابىق جاعدايدا وتەدى. زاڭ شەڭبەرىندەگى بۇل جاعدايعا باعىنباۋعا ءبىزدىڭ دە قۇقىمىز جوق. ءبىز  سوت تورەلدىگىن ىسكە اسىرۋ ماسەلەسىندە اقپاراتتىق-قۇقىقتىق ءتارتىپتى ساقتاپ, حالىقتىڭ مۇددەسىن قورعاۋعا ءتيىسپىز. ال وسى ماسەلەدە اۋديو, ۆيدەو قۇرىلعىلاردىڭ قولدانىلۋى حالىقتىڭ سوت جۇيەسىنە دەگەن سەنىمدىلىگىن ارتتىرا تۇسەتىنى ءسوزسىز, – دەدى ول.

«ادام جانە زاڭ» گازەتىنىڭ باس رەداكتورى مارات باشيموۆ جۋرناليستەر سوتتاردىڭ قىزمەتىنە قوعامدىق باقىلاۋ جۇرگىزۋ ارقىلى قۇقىقتىق دەموكراتيانى دامىتۋعا ىقپال ەتە الاتىنىن ايتتى. «سوت جۇيەسى بارىنشا ءادىل ءارى اشىق بولۋعا ۇمتىلۋ كەرەك. ال جۋرناليستەر سوت تالقىلاۋىنا قاتىسىپ, ولاردىڭ جۇمىستارى تۋرالى ساۋاتتى ماتەريالدار ۇدايى جاريالاپ تۇرسا دەيمىز» دەيدى مارات باشيموۆ.

جيىننىڭ سوڭىندا اقپارات قۇرالدارىنىڭ وكىلدەرى مەن سوت بيلىگى ءوزارا ىنتىماقتاسا جۇمىس ىستەۋ, ماقالالار, تەلەراديوحابارلار ازىرلەۋ تۋرالى ۇسىنىمدار ازىرلەپ, سەمينار-ترەنينگتەر ۇيىمداستىرۋعا ۋاعدالاستى.

قىمبات توقتامۇرات

 

تاعىدا

ۇقساس جاڭالىقتار

پىكىر ۇستەۋ

Back to top button