سپورت شەبەرى – نازارباەۆ
سپورت – مەملەكەتتىڭ مارتەبەسىن, ۇلتتىڭ نامىسىن ايقىندايتىن كورسەتكىش. وسى ورايدا, حالىقارالىق ارەنادا قازاقستان سپورتىنىڭ بەدەلى جىل ساناپ كوتەرىلە تۇسكەنىن اڭعارا الامىز. بيىل تورتكۇل دۇنيە كوز تىككەن لوندون وليمپياداسىنداعى (7 التىن مەدال!) جارقىن جەڭىستەرىمىز, ازيادا ويىندارىن وتكىزگەنىمىز, بۇل بايراقتى جارىستا دا قۇرلىقتىڭ الدى بولعانىمىز (32 التىن مەدال!) ەلىمىزدە سپورتتى دامىتۋعا ايرىقشا ماڭىز بەرىلىپ وتىرعانىن ايعاقتايدى. سوڭعى جىلدارى بوي كوتەرگەن ءزاۋلىم سپورت عيماراتتارى, ەلىمىزدە ءىرى حالىقارالىق جارىستاردى وتكىزە باستاعانىمىز الەمدىك سپورتقا باسەكەلى بولا باستاعانىمىزدى دا اڭعارتادى. بۇل رەتتە مەملەكەت باسشىسى نۇرسۇلتان نازارباەۆتىڭ ەل سپورتىنا ەرەكشە ىقىلاسپەن قارايتىنىن ايتپاسقا بولمايدى.
شىندىعىندا, ەلباسىمىزدى ناعىز سپورتشى پرەزيدەنت دەسەك, ارتىق ايتقانىمىز بولماس. بىلە بىلسەك, نازارباەۆ – كۇرەستەن سپورت شەبەرى. وسى ورايدا, ەلباسىمىزدىڭ باپكەرى بولعان, ۋكراينا جانە قازاقستاننىڭ ەڭبەك سىڭىرگەن جاتتىقتىرۋشىسى لەۆ ەجەۆسكيدىڭ ەستەلىگىنە نازار اۋدارىپ كورەلىك. «1958 جىلى ءبىزدىڭ دنەپرودزەرجينسك قالاسىنا قازاقستاننان ءبىر توپ جاس جىگىتتەر وقۋعا كەلگەن. ولار №8 تەحۋچيليششەدە وقىدى. بىردە مەن جاتتىعۋ وتكىزەتىن زالعا شىمىر دەنەلى, تىعىرشىقتاي جاس جىگىت كەلىپ, «مەنى جاتتىعۋعا الاسىز با؟» دەپ سۇراندى. «اتى-ءجونىڭ كىم, بۇرىن كۇرەسپەن اينالىستىڭ با؟» دەپ, وزىنە سۇراق قويدىم. «اتىم – نۇرسۇلتان, فاميليام – نازارباەۆ, كۇرەسكە اكەمنىڭ ۇيرەتكەنى بار…» دەپ جاۋاپ بەردى. «ولاي بولسا شەشىن, كورەيىك» دەپ, زالدا جاتتىعىپ جۇرگەن كوليا ليتوشكونى شاقىرىپ, «مىنا جىگىتتى بايقايىقشى, ءبىراز جۇلقىلاپ كورشى» دەپ كۇرەستىرىپ جىبەردىم. سول-اق ەكەن, ءوزىم ۇلكەن ءۇمىت ارتىپ جۇرگەن ليتوشكومدى نۇرسۇلتان شالت قيمىلىمەن شالىپ ءتۇسىردى. ءبارىمىز ءۇن-ءتۇنسىز قالدىق. سودان بەرى نازارباەۆ ناعىز بالۋاندىقتى مەڭگەرە باستادى. كوليا ەكەۋى دوس بولىپ تا كەتتى. جاتتىعۋلاردا ەرىنبەيتىن, جەڭىسكە دەگەن جىگەرى كورىنىپ تۇراتىن.
نۇرسۇلتان نازارباەۆ دنەپرودزەرجينسك قالاسىندا وتكىزگەن ەكى جىلىندا ناعىز بالۋان بولىپ قالىپتاستى. كلاسسيكالىق ءجانە ەركىن كۇرەسپەن قاتار اينالىستى. اتتەڭ, كۇرەستىڭ سوڭىنا تۇبەگەيلى ءتۇسكەندە ۇلكەن جەتىستىكتەرگە جەتەتىن قابىلەتى بار ەدى. ءبىراز جارىستاردا ىسىلدى. ال, 1959 جىلى ول ۆتسسپس, ياعني, بۇكىلوداقتىق كاسىپوداقتاردىڭ ورتالىق كەڭەسى ءتۋرنيرىنىڭ چەمپيونى بولدى. ول كەزدە مۇنداي جارىستىڭ جەڭىمپازدارىنا سپورت شەبەرى اتاعى بەرىلەتىن. وسىلايشا, نازارباەۆ سپورت شەبەرى ءنورماتيۆىن ورىنداعان بولاتىن. ال مەن ءۇشىن تاعى ءبىر ەرەكشە قۋانىش, سول كەزدەردەگى شاكىرتىمنىڭ ءبىرى مەملەكەت باسشىسى, ياعني پرەزيدەنت بولعانى».
مىنە, باپكەرلىك ومىرىندە 25 سپورت شەبەرىن دايارلاعان لەۆ ەجەۆسكي ءوزىنىڭ قول استىندا جاتتىققان نۇرسۇلتان نازارباەۆ تۋرالى وسىلايشا اڭگىمەلەيدى.
ەلباسى – سپورت سالاسىن دامىتۋعا بايلانىستى تەك مەملەكەتتىك ماڭىزدى ءىس-شارالاردى جۇزەگە اسىرىپ قويماي, جەكە باسىنىڭ سالاۋاتتىلىعىن, ياعني, سپورتپەن شۇعىلداناتىنىن دا ونەگە ەتىپ كورسەتە الاتىن تۇلعا. بۇل ورايدا ءبىز پرەزيدەنتتىڭ سۋدا جاقسى جۇزەتىنىن, اتقا جاقسى مىنەتىنىن, تەننيس پەن گولفتى جاقسى وينايتىنىن, شاڭعىمەن جاقسى سىرعاناي بىلەتىنىن بىلەمىز. تۇپتەپ ايتقاندا, ەلباسىمىز
نۇرسۇلتان نازارباەۆ «ناعىز سپورتشى پرەزيدەنت» دەپ اتاۋعا تۇراتىن تۇلعا دەپ ايتا الامىز.
عالىم قوجابەكوۆ