قازاقستان رەسپۋبليكاسىنىڭ سپورت جانە دەنە شىنىقتىرۋ ىستەرى جونىندەگى اگەنتتىگى 8-9 مامىر كۇندەرى «استانا ارەنا» ستاديونىندا شاعىن فۋتبولدان باق اراسىندا كورنەكتى قالامگەر ءارى قوعام قايراتكەرى سەيداحمەت بەردىقۇلوۆتى ەسكە تۇسىرۋگە ارنالعان ءداستۇرلى رەسپۋبليكالىق تۋرنير وتكىزەدى. ايتۋلى جارىسقا قازاقستانداعى بارلىق ورتالىق جانە ايماقتىق باق كوماندالارى شاقىرىلىپ وتىر.
سەيداحمەت بەردىقۇلوۆتىڭ (1933-1994) شىعارماشىلىققا تولى ءومىرى بەيبىتشىلىك ەلشىسىنە بالانعان ىزگىلىكتى سالا – سپورتقا اربالىپ ءوتتى. قازاقستان سپورت جۋرناليستيكاسىنىڭ نەگىزىن قالاعان ۇلى مەتردىڭ شىعارمالارى وتاندىق پۋبليتسيستيكانىڭ ۇزدىك تۋىندىلارىنا اينالدى.
سەيداحمەت اعا ءوزىنىڭ «سپورتتىق جازبالارىن» وتكەن عاسىردىڭ 50-60-ىنشى جىلدارى «لەنينشىل جاس» گازەتىندە باستادى. قاتارداعى سپورت شولۋشىسى بولعان تالانتتى قالامگەر كەيىننەن ۇزاق جىلدار وسى باسىلىمنىڭ باس رەداكتورى بولىپ جەمىستى ەڭبەك ەتتى. سونداي-اق, «جالىن» باسپاسى مەن «قازاقستان پيونەرى» گازەتىندە باسشى بولىپ, جاستار مەن بالالار ادەبيەتىنىڭ وركەندەۋىنە وزىندىك ۇلەسىن قوستى.
سەيداحمەت بەردىقۇلوۆ سپورت سيقىرىنا ەرەكشە اربالعان قالامگەر بولعانى – اقيقات. اسىرەسە, قازاق سپورتشىلارىنىڭ جەتىستىكتەرىن ەرەكشە ەكپىنمەن جازاتىن ەدى. سول ارقىلى سان مىڭداعان وقىرماننىڭ جۇرەگىندە نامىس وتىن مازداتىپ, سان مىڭداعان بالانىڭ كوكەيىندە ارمان الاۋىن جاقتى.
سان قىرلى سپورتتىڭ سىرىن ۇققان سايىپقىران قالامگەر ءۇشىن فۋتبولدىڭ ورنى بولەك ەدى. ول فۋتبولدىڭ ناعىز جانكۇيەرى بولدى. سول سپورتقا دەگەن ادالدىعى مەن فۋتبولعا دەگەن سۇيىسپەنشىلىگى ارقاسىندا كسرو سپورت جۋرناليستەرى دەلەگاتسياسى ساپىندا ەكى بىردەي الەم چەمپيوناتىنا قاتىستى. 1966 جىلى انگليادا جانە 1970 جىلى مەكسيكادا وتكەن الەم بىرىنشىلىكتەرى تۋرالى جازعان كوپتەگەن ماقالالارى, وچەركتەرى جانە كىتاپتارى قالىڭ وقىرماننىڭ ولجاسىنا اينالدى.
1994 جىلدان بەرى ەلىمىزدە ۇزدىك سپورت جۋرناليستەرىنە سەيداحمەت بەردىقۇل اتىنداعى سىيلىق بەرىلىپ كەلەدى. كورنەكتى سپورت قالامگەرى اتىنداعى سىيلىقتى ءار جىلداردا بۇگىندە ەسىمى ەلگە تانىمال جۋرناليستەر – نەسىپ ءجۇنىسباي, قىدىربەك رىسبەكۇلى, عالىم سۇلەيمەن, يۋري ليفينتسەۆ, دياس احمەتشارىپ, رابات جانىبەك, تەلجان كۇدەروۆ, گالينا پولەۆايا, ۆالەري يلين, داستان كەنجالين, پاۆەل تسىبۋلين, ءمادي ماناتبەك, تولەۋبەك قادىرمولدا جانە باسقالارى يە بولدى.
سونىمەن 8-9 مامىر كۇندەرى ەلىمىزدىڭ ەڭ باستى فۋتبول الاڭى – «استانا ارەنا» ستاديونىندا جۋرناليستەر قاۋىمى سايىسقا تۇسەدى. ويىندار ساعات 10.00-دە باستالادى.
عالىم قوجابەكوۆ,
س. بەردىقۇلوۆ اتىنداعى سىيلىقتىڭ لاۋرەاتى
