كەشە استانا قالاسى تۋريزم, دەنە تاربيەسى جانە سپورت باسقارماسى 26 ءساۋىر كۇنى وتەتىن قر پرەزيدەنتتىك سايلاۋىن ناسيحاتتاۋ ماقساتىندا سپورت ارداگەرلەرى مەن قر پرەزيدەنتتىگىنە كانديدات نۇرسۇلتان نازارباەۆتىڭ سەنىمدى وكىلدەرىنىڭ كەزدەسۋىن ۇيىمداستىردى.
– ەلورداداعى سپورتشىلار قاۋىمى سايلاۋدى ناسيحاتتاۋ جانە ۇيىمداستىرۋ جۇمىستارىن قىزۋ قولعا الدى. ءبىزدىڭ باسقارماعا 7 سايلاۋ ۋچاسكەسى بەكىتىلگەن. سول ۋچاسكەلەر ورنالاسقان عيماراتتاردى جوندەۋ مەن ولارعا كەلەتىن جولداردى تازالاۋدى مىندەتىمىزگە الدىق. بۇدان باسقا ارنايى تەحنيكا مەن جيھازدى اكەلە باستادىق. داۋىس بەرۋگە ارنالعان جاشىكتەردى دايىنداپ, سايلاۋعا قاتىستى باسقا دا جۇمىستاردى اتقارۋدامىز. ماقساتىمىز – سايلاۋ كۇنىن حالىق ۇمىتپاستاي مەرەكەگە اينالدىرۋ. بۇل كۇنى سايلاۋشىلار شاتتانىپ, مەرەيلەنسە, ەلىمىزدەگى بىرلىك پەن تاتۋلىق اتموسفەراسىن سەزىنسە ەكەن» دەيدى باسقارما باسشىسى بەرىك مارجىقپاەۆ.
ونىڭ ايتۋىنشا, باسقارما داۋىسقا ءبىرىنشى بولىپ كەلەتىن ادامدارعا سىيلىقتار دايىنداپ وتىر. ولاردىڭ قاتارىندا سپورتتىق كيىممەن بىرگە سپورتتىق نىسانداردى تەگىن پايدالانۋعا مۇمكىندىك بەرەتىن ايلىق ابونەمەنتتەر بار. اتاپ ايتساق, ابونەمەنتكە يە بولعاندار «قازاقستان» سپورت سارايىنىڭ باسسەينى مەن «الاۋ» مۇز سارايىنا كىرە الادى. سايلاۋشىلاردى قۋانتاتىن باسقا دا سىيلىقتار جەتىپ ارتىلاتىن كورىنەدى.
سونىمەن قاتار سايلاۋدى ناسيحاتتاۋ ماقساتىندا باسقارما 12 ءساۋىر كۇنى قالا اكىمدىگىنىڭ الدىنداعى الاڭدا جۇگىرۋدەن جارىس ۇيىمداستىرىپ, سونىڭ بارىسىندا اسپانعا اۋە شارلارىن ۇشىرعالى وتىر. شارلار بولاشاققا دەگەن سەنىمنىڭ سيمۆولى بولماق. جۇگىرۋگە سەرىك ساپيەۆ, دينارا سادۋاقاسوۆا, مارينا ۆولنوۆا, ءىلياس سۇلەيمەنوۆ سىندى بەلگىلى سپورتشىلار قاتىسپاق. سونداي-اق, قوعام قايراتكەرلەرى مەن پارلامەنت ءماجىلىسىنىڭ دەپۋتاتتارى ءسوز سويلەمەك.
حالىق بەلگىلى سپورتشىلارمەن سايلاۋ وتەتىن كۇنى دە جۇزدەسە الادى. كەز كەلگەن ادام ولارمەن سۋرەتكە ءتۇسىپ, قولتاڭبا الۋ مۇمكىندىگىنە يە بولادى.
امانعالي شميتۇلى
