حالىقارالىق بوكس قاۋىمداستىعىنىڭ جاڭا نۇسقاداعى جارىسى ارۆ ءتۋرنيرىنىڭ ەكىنشى اينالىمىندا استانالىق بوكسشى ءىلياس سۇلەيمەنوۆ كەزەكتى جەڭىسىنە قول جەتكىزدى.
نوۆوسيبيرسك قالاسىندا وتكەن جەكپە-جەكتە ءىلياس سۇلەيمەنوۆ الەم بىرىنشىلىگىنىڭ كۇمىس جۇلدەگەرى الجيرلىك موحامەد ءفليسسيدى جەڭدى. ايقاس باستالىسىمەن ارىنداپ العا ۇمتىلعان قازاق بوكسشىسى قارسىلاسىن العاشقى ەكى راۋندتا ابدەن قالجىراتتى. ال, ءۇشىنشى راۋندتا شارشى الاڭ ورتاسىندا سۇلاتىپ ءتۇسىردى. وسىلايشا 52 كەلى سالماقتا ەل نامىسىن قورعاپ جۇرگەن ءى.سۇلەيمەنوۆ جاڭا جارىستاعى ەكىنشى جەكپە-جەگىندە نوكاۋتپەن جەڭىسكە جەتتى. ارۆ ءتۋرنيرىنىڭ ءۇشىنشى تۋرى 20 جەلتوقساندا وتەدى.
تۋرنير جەڭىمپازى 2016 جىلى ريو-دە-جانەيرودا وتەتىن وليمپيادا ويىندارىنا جولداما الادى. بۇل جارىستا 10 سالماق بويىنشا 8 ۇزدىك بوكسشى سىنعا تۇسۋدە. دەمەك, ءار بوكسشى جەتى كەزدەسۋ وتكىزەدى. بۇل تۋرنيردە قازاقستاننان ءبىرجان جاقىپ, ءىلياس سۇلەيمەنوۆ, بەرىك ابدراحمانوۆ, ادىلبەك نيازىمبەتوۆ, انتون پينچۋك باقتارىن سىناپ ءجۇر.
عالىم قوجابەكوۆ
