سۆەتقالي نۇرجاننىڭ اقىندىق بولمىسىنا وزىنەن بۇرىنعى اقىن-جىراۋلار, بي-شەشەندەردەن جەتكەن ءدامدى ءسوز, ۋىتتى ولەڭدەر مەن جالىندى جىرلار قاتتى اسەر ەتكەن. وسكەن, قالىپتاسقان ورتاسى تازالىقتى, مىڭجىلدىقتار بويى قالىپتاسقان ءورشىل رۋحتى قاستەرلەيدى. قازاق رۋحانياتىنا وزىندىك قولتاڭباسىمەن كەلىپ, قازاق پوەزياسىن جاڭا دەڭگەيگە كوتەرگەن, ەلىمىزدىڭ ەڭ مارتەبەلى ماراپاتى – «وتان» وردەنىنىڭ يەگەرى اقىن سۆەتقالي نۇرجانمەن ەلورداعا كەلگەن ساپارىندا جولىعىپ, سۇحباتتاسقان ەدىك.
– «قازاقيا قاعاناتىنىڭ ىرگەتاسى سوزدەن قۇيىلعان! جاي ءسوز ەمەس, قۇسني ءسوز! بۇل – پافوس ەمەس, كوزىم ابدەن جەتكەن شىندىق» دەپ ەدىڭىز بۇدان بۇرىن بەرىلگەن سۇحباتتارىڭىزدا. ءسوزدى تىڭدايتىن حالىق, حالىقتى تىڭدايتىن بيلىك بار دەپ سانايسىز با؟
– ساناتكەرلەر: «ەڭ اۋەلى ءسوز بولعان!..» دەگەن ءىنجىلدىڭ ىلكى اياتىن ءجيى مىسالداپ جاتادى. شىنىندا ءبىزدىڭ بولمىس رەتىندە قابىلداپ جۇرگەن بەس سەزىم مۇشەسى ارقىلى سەزىلەتىن, كورىلەتىن قۇبىلىستارىمىز, ياكي «ءومىر» دەپ ءسۇرىپ جاتقان الەمىمىز – شىن بولمىستىڭ كولەڭكەسى عانا. ءبىز ءاۋ باستاعى قاسيەتتى قالاممەن تۇسكەن وسيەتتى كالامنان (سوزدەن) اجىراي باستاعاننان كەيىن عالام-ساعيردى تانىماي قالدىق. عالام ۇشكە بولىنەدى: اكبار-عالام (ۇلىق, ياعني قۇدايلىق عالام), كابير-عالام ء(بىزدى قورشاعان الەم), ساعير-عالام, كىشى عالام, ياكي جەكە ءوزىمىز. ەگەر ءوزىمىزدى تانىساق, قالعان قوس عالامنىڭ بارلىق قۇپياسى مەن سىرى قولىمىزعا كەلىپ, دۇنيە سۋداي تۇنىق قالپىن تانىتار ەدى. وكىنىشكە قاراي, وزالداعى الميساقي ۋادەدەن الىستاعان سايىن سوزدەن كيە قاشا باستادى. ءسويتىپ قاعاناتتارىمىزدىڭ ىرگەسى ءىرىپ, كەرەگەسى ءشىرىپ تىندى. ال ەندى ءبىز اباي زامانىنىڭ وزىنەن الىستاپ كەتكەلى قاشان؟ ونىڭ ءوزى «تۇگەل ءسوزدى تۇسىنە المايتىن» قازاعىنا وكپەلەپ كەتتى ەمەس پە؟ دەمەك «حالىق» دەگەن شىن سيپاتىنان ايرىلىپ قالعان كوپشىلىكتى «ءسوز تىڭدا» دەپ قيناۋدىڭ ءوزى زورلىقتاي. ال كوپشىلىك پەن بيلىك ءبىر-بىرىنەن اداسىپ كەتكەلى قاي زامان؟!.
– باياعى, قازاقى, ۇلى جىراۋلاردىڭ سوڭى سۇگىر جىراۋ بەگەندىكۇلى, ۇزاقباي جىراۋ قازجانۇلى, مۇرات وسكەنباەۆ, ولاردىڭ ءىزىن باسقان القۋات قوجابەرگەنۇلى سياقتى بەلگىلى جىرشى-جىراۋلاردىڭ, كۇيشىلەردىڭ القاسىندا بايگە بالا بولىپ, جىرلارىن تىڭداپ ءوستىڭىز. اقىن-جىراۋلار ورتاسىندا, قازاقى اۋىلدا وسپەسەڭىز وسىنداي شايىر بولار ما ەدىڭىز؟
– بولماس ەدىم. ەگەر مەنىڭ تالانىما ءناسىپ بولعان تاڭعاجايىپ ورتادا بولماسام, شامالاپ ايتقاندا, ورتاڭقول پوستمودەرنيست اقىن بولىپ ازعانتاي عانا ەساناۋلاۋ وقىرماننىڭ باسىن قاتىرىپ جۇرەتىن شىعارمىن؟.. مەنىڭ ساناما ولار, ياكي الگى ءوزىڭ ايتقان ەسىمدەر سىڭىرگەن كيەلى اقپاراتتار مەن تىلسىم سەزىمدەردى ءھام قاستەرلى ۇعىمدار مەن تىلدىك قۇناردى الەمنىڭ ەشبىر جوعارى وقۋ ورىندارىنان نەمەسە ەليتارلىق مادەني ورتالارىنان الا الماس ەدىم. قايتكەن كۇندە دە قۇدايدان كۇشتى ەمەسپىز, قازاق قىلىپ جاراتقان, ونىڭ ىشىندە دە جۇتقا ۇشىراعان ولكەنىڭ ورتاسىنداعى عايىپتان تايىپ ساۋ قالعان شۇرات-وازيستەي قونىستا عۇمىر كەشتىرگەن پەشەنەمدەگى تاۋان-تاعدىرىما شۇكىر دەيمىن.
مەن ءوزىم 40 جاسىمنىڭ جوباسىندا ىشتەي قيالداپ: «ۇلتىمنىڭ 1000 جىلدىق تاريحىنا اقىندىق «شابۋىل» جاساپ, تۇرەن سالسام, پوەتيكالىق پانوراماسىن جاساسام» دەگەم. تاعى دا شۇكىر دەيمىن, دىتتەگەن ماقساتتارىما ءبىرشاما جەتتىم دەپ قاناعاتپەن ايتا الام. 50 شاقتى ءار كولەمدەگى تاريحي داستان-پوەمالار, حيكايا-داستان, ءافسانا-داستاندار جازىپپىن. وسى بۇگىن عانا «باللادالار» اتتى 125 تۋىندىمنىڭ باسىن قۇراعان كولەمدى كىتابىم قولىما ءتيدى. الايدا شىعارماشىلىققا قاناعات جۇرمەيدى. سەن ءوزىڭنىڭ ەڭبەگىڭە قاناعاتتانا باستاعان كۇنىڭ – اقىندىق اجالىڭنان حابار كەلگەن كۇن
– اقيقاتتىڭ سىڭارىنداي
شەجىرەسىن تۇمارىنداي ساقتاعان.
ابىل-جىردى ۇرانىنداي,
قۇلشار-كۇيدى قۇرانىنداي جاتتاعان, – دەپ جىرلاعانىڭىزداي, سۆەتقالي اعا, وزىڭىزگە دەيىنگى وتكەن جىراۋلاردىڭ جىر-داستاندارىن تۇگەل جاتتاپ العان قۇيما قۇلاق ونەر يەسىسىز, ونىڭ ۇستىنە سول تاريحي وقيعالار وتكەن, تۇلعالار ءومىر سۇرگەن كيەلى جەرلەرگە بارىپ, جيhانكەز قالام يەسى رەتىندە وتە تانىمالسىز. وڭىرلەردى ارالاپ ءجۇرىپ, ولكەلەرگە ساپار شەگۋ ارقىلى نە نارسەگە كوز جەتكىزدىڭىز, قاستەرلەيتىن دۇنيەڭىز قايسى؟
– وزىمە دەيىنگى جىراۋلار مۇرالارىندا ماعان عانا ەمەس, كۇللى ادامزاتقا اۋاداي قاجەت رۋحاني كود ساقتالعان. ول كود اشىلماعاسىن دا ادامزات قوعامى بۇلىڭعىر تۇمانعا ەنىپ, بۋالدىر كۇمانعا جەم بولۋدا. وكىنىشكە قاراي, ونى جاپان دالاداعى قاڭعىعان جالقى ءپارۋانا بولماسا, «جاپون-قالاداعى» باڭگىگەن جالپى قايمانا ۇعىنبايدى. ولار تۇگىلى, سول مۇرالاردى زەرتتەپ نان تاۋىپ جۇرگەندەردىڭ ءوزى تۇبەيلەپ تانىپ, تۇبىجىكتەپ ءتۇسىنىپ العان دەپ ايتا المايمىن.
ال وڭىرلەردى ارالاۋعا كەلسەم, مەن ءار ولكەگە قادام باسقان سايىن جاڭا كىتاپ وقىعانداي سەزىمدە بولام. جاڭا ءارى كونە كىتاپ… ەڭ باستى كوز جەتكىزگەن شىندىعىم – اۋليە بابالاردىڭ قۇدايدىڭ پارمەنىمەن جاساپ كەتكەن ۇشان-مۇحيتتاي ماڭگىلىك ەڭبەگى! توبەڭنەن قانشا ءوڭى جامان جات داۋىلدار وتسە دە توپىراعىنان تامىرى اجىراماي قالعان ۇلى بىرلىك, ۇلى رۋحانيات, ۇلى مادەنيەت, ۇلى تاريحتى كورەم. سول ەسكى دە جاڭا كىتاپتاردى وقىپ الام دا جاڭا ساپارلارعا اتتانام. ال الگى كىتاپتاردىڭ تىلسىم اسەرلەرى مەنىڭ جۇرەگىمدە بۇرشىك جارىپ, ۇزاماي جەمىستەرىن بەرە باستايدى. ول جەمىستەر مەنىڭ داستاندارىم مەن باللادالارىمدا, جىرلارىم مەن ەسسەلەرىمدە, باسقا دا ەڭبەكتەرىمدە تاپ سالعان. پەيىلى جەتكەن الادى, زەيىنى جەتكەن ۇعادى…
– «قازاعىم!» دەپ تۋدى العاشقى عازالىم,
سول حالىققا بارداي ءالى جازارىم.
تىلەك ايتام ءمىناجاتتى تۇندەردە:
«قازاعىمنىڭ الدىندا ال, – دەپ اجالىم!..» دەپ, نە بولسا دا شىندىقتى, اقيقاتتى جازاتىنىڭىز, ەلىڭىزدىڭ وتكەنى مەن بۇگىنىن زور سۇيىسپەنشىلىكپەن جىرلايتىنىڭىز جىرسۇيەر قاۋىم ءۇشىن قادىرلى. نەنى جازىپ, نەنى جازا المادىڭىز, وكىنىشىڭىز بار ما؟
– قۇدايعا شۇكىر, تىلدەن كىسەن, دىلدەن شىدەر الىنعالى تالاي بولدى. ءتىپتى, ەركىندىكتىڭ پايداسىمەن بىرگە زالالىن دا كورە باستاعاندايمىز. ويتكەنى يمانى تۇتاسپاعان ۇلتتىڭ قازانىنان قاقپاق كەتىپ ەدى, يتتەرىنەن ۇيات تا بەزدى. نەبىر جالعان كىتاپتار جاريالانىپ, تىنباي ناسيحاتتالىپ, ولار ءتىپتى, وقۋلىقتارعا ەنىپ كەتىپ ۇرپاق ساناسىن اتالا قىلۋدا. تاۋەلسىزدىك العاندا بىزدە رۋحاني توعان بولمادى. سونىڭ كەسىرىنەن نە ءتۇرلى كىرلى توپان ۇلت ساناسىن بىلعاپ ءوتتى. وسىناۋ «ادىلەتتى قازاقستانىڭىزدىڭ» ءوزى بۇل اسا شەتىن ماسەلەگە نازار اۋدارار تۇرلەرى بايقالمايدى. وسىنىڭ بارىنە مىناۋ «الەم-جالەم» الەم دە, اقپاراتتىق قۇرالدار دا, اقىسىن بەرسە, بوقىسىن, بالكىم, قوقىسىن شىعاراتىن باسپالار دا قوسامەتكەي بولعان ءتۇرى بار. ارينە, ادامزات ومىرىنە ەنگەن ءاربىر وزگەرىس پەن جاڭالىق ءوزىنىڭ يگىلىگىمەن بىرگە كەساپاتىن دا قوسا اكەلەتىنى زاڭدىلىقتاي…
مەن ءوزىم 40 جاسىمنىڭ جوباسىندا ىشتەي قيالداپ: «ۇلتىمنىڭ 1000 جىلدىق تاريحىنا اقىندىق «شابۋىل» جاساپ, تۇرەن سالسام, پوەتيكالىق پانوراماسىن جاساسام» دەگەم. تاعى دا شۇكىر دەيمىن, دىتتەگەن ماقساتتارىما ءبىرشاما جەتتىم دەپ قاناعاتپەن ايتا الام. 50 شاقتى ءار كولەمدەگى تاريحي داستان-پوەمالار, حيكايا-داستان, ءافسانا-داستاندار جازىپپىن. وسى بۇگىن عانا «باللادالار» اتتى 125 تۋىندىمنىڭ باسىن قۇراعان كولەمدى كىتابىم قولىما ءتيدى. الايدا شىعارماشىلىققا قاناعات جۇرمەيدى. سەن ءوزىڭنىڭ ەڭبەگىڭە قاناعاتتانا باستاعان كۇنىڭ – اقىندىق اجالىڭنان حابار كەلگەن كۇن.
– «ادەبيەت – اردىڭ ءىسى» دەۋدەن جالىقپاي كەلەمىز. ادەبيەتكە ادالدىق, وتكەندەردى قادىرلەۋ كەمشىن تۇستا جاس قالامگەرلەردىڭ قادامى تۋرالى نە ايتار ەدىڭىز؟
– جاقىندا عانا سىيلاس قارىنداستارىمنىڭ ءبىرى گۇلبيعاش ومار ماعان «داۋىس» اتتى جاس پروزاشىلاردىڭ كىتابىن بەردى. جازوداقتىڭ قاتىسىنسىز, بەلگىلى مەتسەنات يسلامبەك سالجانوۆتىڭ دەمەۋشىلىگىمەن جارىققا شىققان «اڭگىمەلەر انتولوگياسى» ەكەن. العىسوزىن م.ماعاۋين جازعانىنان ۇمىتتەنسەم دە كوڭىلىمدە قوبالجۋ بولعانى راس. بىراق كىتاپ ىلكى بەتىنەن-اق مەنى يىرىمىنە تارتا جونەلدى. مۇنداعى ب.قادىر, د.جىلقىباي, ا.ادىلبەك, ە.نۇراحمەت, ءا.راحات, ت.قىلىشبەك, س.اقتاي, ج.نارتاي, س.بەكجانوۆ, ب.باتان سىندى جاس قالامگەرلەردىڭ قادامدارى كوڭىلىمدى سەرگىتتى. نىساناسى ايقىن, ادەبيەتكە دايىندىقپەن جانە جاۋاپكەرشىلىكپەن كەلگەندەرى بايقالادى. تىلدىك قۇنار بار. بايقاۋىمشا, دەنى ارعى بەتتەن كەلگەن بالالار كورىنەدى. شەبەرلىكتەرى مەن تاجىريبەلەرى جەتپەي قالعان جەرلەرىنىڭ وزىنەن ىزدەنىس ىزدەرى بايقالىپ تۇرادى. دەمەك, بۇل ون جاستىڭ اياق الىسىنىڭ ءوزى-اق پروزا جانرى بويىنشا قازاق ادەبيەتىندە ىلگەرىلەۋ بارىن زايىر بايقاتادى.
ال پوەزياداعى, باسقا جانرلارداعى ىزدەنىستەر دە مىگىرسىز جىلجۋدا. تەك ول «جىلجۋلاردىڭ» ىشىندە ۇلىق قازاقتىڭ ساناسىنا ەرگىزدە سىڭبەس ادەبي ىبىلىستەردىڭ اعىمدارى بار ەكەنىن دە ايتقىم كەلەدى.
جاڭا «ارعى بەتتەن» دەپ قالدىم عوي, قىتايدان 90-جىلداردان كەيىن كەلگەن رۋحاني لەكتىڭ ءبىزدىڭ كوكجيەگىمىزدى وراسان كەڭىتكەنىن ايتا كەتكەندى ءجون سانادىم وسى رەتتە. رۋحى تازا ەلدىڭ عانا ۇلاندارىنىڭ سۇيەگىندە قۇسني ءسوزدىڭ ءمورى بولادى. ال قازىر ول جاقتاعى ساياسي سويقانداردىڭ تالقىسىنا ءتۇسىپ جاتقان قانداستارىمىزدىڭ تاعدىرىنا جۇرەگىمىز قان جىلايدى. ەندىگى كەلگەندەر كىم بولىپ كەلەر ەكەن دەگەن دە ۇرەيلى ساۋال ويانادى ساناڭدا…
– ەل رۋحانياتىن تورگە وزدىرۋ ءۇشىن بىلىمگە ۇمىتىلۋى قاجەت پە, ىلىمگە باس قويعانى دۇرىس پا, قالاي ويلايسىز؟
– شىركىن, جۇرەكتى ءتول رۋحانياتىڭا (ىلىمگە) بايلاپ, ادامزات قول جەتكىزگەن بىلىمگە قول سوزساڭ, كانى؟!.
– ولەڭدەرىڭىزدە ساياساتتى باعامداي ءبىلۋ, ەلدىكتىڭ بولاشاعىن باياندى ەتۋ ءۇشىن, قازاقتىڭ قازاقتان وزگە دوسى جوق ەكەندىگىن ايتا تۇسەسىز. تاۋەلسىزدىكتى باياندى ەتۋ جولىندا قانداي ءىس-شارالاردى قولعا العان ءجون, ادەبيەت – حالىقتىڭ رۋحىن كوتەرە الاتىن الىپ كۇشكە اينالا الا ما؟
– ايگىلى ماكياۆەللي ءوزىنىڭ الەمگە ءماشھۇر «گوسۋدار» ەڭبەگىندە: «پەشەنەسىنە ماڭگى قوزعالىس ەنشى ەتىلگەن ادامزات تىرشىلىگى نە شىعاندايدى, نە قۇردىمعا قۇلايدى» دەگەن. ول ودان ارى مەملەكەت ازعىنداسا, زاڭ تەزگە سالا المايتىن ازعىنداردى پاتشانىڭ قاھارىمەن تىزگىندەۋدى ۇسىنادى. ءبىزدىڭ دە «ادامزات ساپارىنىڭ مەيمانى» (قاسىم) ەكەنىمىز راس بولسا, وسىناۋ عاسىرلار تەزىنەن وتكەن قورىتىندىلارعا ءبىر كەزەك قۇلاق قويساق كەرەك ەدى. ەل بيلەۋ نەگىزدەرىن تۇبىجىكتەپ تۇسىندىرەتىن سوناۋ سەلجۇق سۇلتاندارى الىپ ارسىلان مەن مالىك شاحتىڭ دانا ءۋازىرى نيزام ءال-مۇلىكتىڭ «سياسات-نامە» ەڭبەگىن وقىعان پاتشا پەشەنەمىز بەن كوسەگەمىزگە بۇيىرعان ەمەس. ال ءبىزدىڭ قوعام قازىرگى كۇللى ادامزاتقا ءتان ازعىنداۋدىڭ سوڭعى ساتىلارىنا كوتەرىلىپ بولدى. بۇگىنگى تاڭدا بارشا ادامزاتقا ءوتىمدى فيلوسوف ف.فۋكۋياما «ادامداردىڭ ءوزارا جانە مەملەكەتكە سەنىمى – قوعام دامۋىنىڭ باستى كىلتى» دەگەن وي ايتادى. ال ءوزىڭ ايتقان «ادەبيەت ۇلت رۋحىن كوتەرەر الىپ كۇشكە اينالار-اق» ەدى, ەگەر ول ءوزىنىڭ باستاپقى ماقساتىن تاۋىپ, ۇلى مۇراتىنا جەگىلسە. بىراق ول جاقسى نىشان نەكەن-نۇقان بولماسا, ارنا تارتىپ كەتەر ءتۇرى بايقالمايدى.
– قازىر جەر بەتىندە كۇللى ادامي قۇندىلىقتار اياقاستى بولىپ, ينسانياتتى ىزگىلىك ەمەس, وبىرلانۋ مەن توبىرلانۋ ۇدەرىسى قۇردىمعا سۇيرەۋدە. تابيعي تەپە-تەڭدىكتىڭ تالقانى شىقتى. وتباسى قۇندىلىقتارى كۇيرەدى, ءبىر جىنىستىلار قۇقىن داۋلاي باستادى… قازاق ءتىلىنىڭ جاعدايى دا اسا جاقسارا قويمادى. نە ىستەۋ كەرەك؟
– كۇنى كەشە امەريكا پرەزيدەنتى بايدەن شال «ءبىرجىنىستى نەكەگە رۇقسات بەرەتىن» «زاڭعا» قول قويدى! مەنىڭ ەسىمە وسىنداي ازعىندىققا سالىنعان لۋت قاۋىمى تۋرالى ءدىني حيكايا ءتۇستى. ال «ەرسەكىلىك» اتتى بۇل قۇبىجىق ىندەت كەشەگى «عۇسىلسىز قادام باسپاعان, دارەتسىز كالام اشپاعان» ءبىزدىڭ قاستەرلى توپىراققا دا كەلىپ جەتتى. مەن وسى ماسەلەدە قازاقتىڭ كلاسسيك جازۋشىسىمەن سوزگە كەلىپ تە قالعان جەرىم بار. «ءبىز ولاردىڭ قۇقىن قورعاۋىمىز كەرەك, ويتكەنى تابيعات 10 پايىز قاتەلەسەدى» دەپ ءوزىن «دالەلدەمەك» بولدى الگى 80-گە كەلگەن «اقساقال»… كەزىندە ءمينيستردىڭ قولىمەن قازاقستان زاڭدارىنا «جىنىس اۋىستىرۋ ەركىندىگىن» كىرگىزۋدىڭ ءوزى بۇل قۇبىجىقتىڭ ءبىزدىڭ دە قولقامىزعا قول سالعانىنىڭ ايقىن دالەلى! مىنە, بۇرىنعىلار ايتىپ كەتكەن تاجال ء(دادجال-جالعانشى) تاققا مىنگەن زاماننىڭ قازىرگى كەسپىرى وسىنداي. دەمەك جاراتۋشى يەنىڭ ءيا ادامزاتتى قاھار سيپاتىمەن جازالايتىن نەمەسە قۇدىرەت سيپاتىمەن تازالايتىن كەزەڭىنە تىرەلدىك… ال وسىنداي كەسىرەڭكى كەزەڭنىڭ اسىرەڭكى ساياساتكەرلەرىنە سەنىڭ ءتىلىڭنىڭ قاراباقىر قۇنى جوق! وزدەرى جات دىلمەن تاربيەلەنگەن, بەزىنەن جارالعان شادىرقايلارىن جات تىلدە وسىرگەن ساياساتكەرسىماقتاردا وتان, تۋعان جەر, قاسيەت, كيە, ءتىل, ءدىل, ءدىن دەگەن ەلدى ەل قىلاتىن نەگىزگى ۇستىن-ۇعىمدار قاراستىرىلماعان.
– «دۇنيە وزگەرەردە بۇعىپ جاتقان جانارتاۋلار بۇلقىنادى. ال رۋحتىڭ جانارتاۋى اتىلماسىن, ول اتىلسا, جولىنا ەشتەڭە بوگەت بولا المايدى» دەدىڭىز. جۇتۋعا اۋا, ىشۋگە سۋسىن قالاي كەرەك بولسا, رۋحانياتقا قىزمەت ەتەتىن كەمەل دۇنيەلەر قاشاندا كەرەك. قازاقتىڭ رۋحىن كوتەرەتىن قانداي ارەكەتتەر جاساعان دۇرىس؟
– اڭگىمەنىڭ اشىعى, ەسى دۇرىس ازاماتتىڭ ءبارى سول «رۋح جانارتاۋى اتىلاتىن» ءساتتى كۇتىپ وتىر. اۋليەلەردەن قالعان كونە كىتاپتاردا باياندالاتىن ول كادەلى كۇنگە, مەنىڭ شامالاۋىمشا, اسا كوپ قالعان جوق. سوندىقتان مەن دۇنيەدە جاسالىپ جاتقان بارشا جاماندىق اتاۋلى بەلەڭ العان سايىن سول كۇننىڭ حابارى شىعار دەپ قابىلدايمىن. قۇدايدىڭ جاقسىلىعىنان ءۇمىت ەتكەندىكتەن دە ەرتەڭگە دەگەن سەنىمىم نىعايا تۇسەدى. ال «قازاقتىڭ رۋحىن كوتەرەتىن ارەكەتتەرگە» سول كەزدە كوشەتىن شىعارمىز. وعان دەيىن ءبىز وزىمىزدە بار مۇمكىنشىلىكتى پايدالانا المايتىنىمىز ايان بولدى…
– الدا ءماجىلىس پەن ءماسليحات دەپۋتاتتارىنىڭ سايلاۋى كەلە جاتىر. ەلىمىز جاڭا ساياسي-ەكونوميكالىق وزگەرىستەر الدىندا تۇر. جاڭا الەمدەگى جاڭا قازاقستاندى وزىق بىلىممەن قارۋلانعان, باسەكەگە قابىلەتتى جاستار, بىلىكتى ماماندار, زيالى ورتا عانا قۇرا الادى. ۇسىنىس تۇسسە ماڭعىستاۋ جۇرتى اتىنان پارلامەنتكە دەپۋتات بولۋعا قالاي قارايسىز؟
– جاڭا دا ايتتىم, جاقسىلىقتان, ىزگىلىكتەن ءۇمىت ەتكەنگە نە جەتسىن, بىراق كۇللى ينسانياتقا ءنار, تىنىس, قۋات بەرەتىن تامىرلاردىڭ ءبارىن جەمقورلىقتىڭ, جەڭ ۇشىنان جالعاسۋدىڭ, جىمداسقان قىلمىسكەرلەردىڭ, ارام دىندەردىڭ, ەرسەكىلىكتىڭ, ارسىزدىقتىڭ ىرىڭدەرى جايلاپ العان. سوندىقتان اسا زور قارجىلىق رەسۋرستارعا, سىرتقى-ىشكى ايلاپات قولداۋلارعا يە ول جويداسىز كۇش سەن ايتىپ وتىرعان ساياسي-ەكونوميكالىق, الەۋمەتتىك-رۋحاني وزگەرىستەردى وڭايلىقپەن جاساتپايدى. ول كۇشتىڭ الدىندا ءوزىڭ ايتقان «وزىق بىلىممەن قارۋلانعان, باسەكەگە قابىلەتتى جاستار, بىلىكتى ماماندار, زيالى ورتانىڭ» ءوزى دارمەنسىز.
قاتتى ايتتى دەپ رەنجىمە, مەنىڭ ءوزىم ەندىگى قالعان عۇمىرىمدا ساياساتتىڭ سويىل سوعارىنا اينالىپ جۇرە المايمىن. بۇرىنعى ءومىرىمدى دە قۇدايدان باسقا ەشكىمگە تاۋەلدى بولماي وتكىزگەنمىن. مەن ماڭعىستاۋداي مۇڭقيانىمنىڭ قيان تۇكپىرلەرىندەگى تاۋاستى مەشىتتەرىندە مايشامنىڭ تۇبىندە نەمەسە اي-شامنىڭ استىندا اللادان «التىن زاماننىڭ» تاڭىنىڭ اتۋىن تىلەپ وتىرعان جانمىن. دەمەك پارلامەنت مەنى كۇتپەي-اق قويسىن…
– سۇحباتىڭىزعا راحمەت!
