ەلوردالىقتار قولجەتىمدى باعادا ازىق-تۇلىك الىپ, ارقانىڭ ۇزاق قىسىنا قامدانۋدا اۋىلشارۋاشىلىعى جارمەڭكەسى ماڭىزدى رولگە يە. وتكەن سەنبى, جەكسەنبى كۇنى سىردىڭ ديقاندارى استانالىقتارعا ونىمدەرىن ۇسىندى.
سىر ديقاندارى 50 جۇك اۆتوكولىگىمەن 500 توننادان استام ءونىم اكەلىپتى. قىزىلوردا وبلىسى دەگەندە, ويعا كۇرىش, بالىق, قاۋىن-قاربىز, اسقاباق, تۇز كەلمەي مە؟ ەلوردالىقتار دا ءونىمنىڭ وسى ءتۇرىن الۋعا قىزىعۋشىلىق تانىتاتىنى انىق. سوندىقتان نۇر-سۇلتان قالاسىنىڭ تۇرعىندارىنا بازارلىق رەتىندە قىزىلوردالىقتار ءونىمنىڭ وسى ءتۇرىن مەيلىنشە مول اكەلۋگە ءمان بەرىپتى. ياعني 100 توننا كۇرىش, 30 توننا بالىق جانە ونىڭ ونىمدەرى, 15 توننا ەت, 80 توننا كوكونىس پەن جەمىس-جيدەكتەر, 210 توننا باقشا ونىمدەرى, 50 توننا اسقاباق, 3 توننا اس تۇزى, 10 توننا ءسۇت ونىمدەرى, 5 تونناعا جۋىق كونديتەر ءونىمى جارمەڭكەنىڭ الاڭىنا شىعارىلدى.
جاڭاقورعان اۋدانى اكىمىنىڭ ورىنباسارى دارحان تۇرسىنباەۆ:
– قىزىلوردا وبلىسىنان جالپى قۇنى 200 ميلليون تەڭگەنى قۇرايتىن ءونىم كەلدى. بۇعان بارلىق اۋداننىڭ ديقاندارى اتسالىستى. ءبىزدىڭ اۋداننان كۇرىش ونىمدەرى مەن باقشا داقىلدارى جەتكىزىلدى. اسىرەسە, سىردىڭ كۇرىشىنە سۇرانىس جوعارى بولدى, – دەدى.
راسىندا سىردىڭ ونىمدەرىنە سۇرانىس جوعارى بولدى. ودان بولەك, بالىق پەن اسقاباقتى كوپتەپ الىپ جاتقانداردى بايقادىق.
ەلوردالىق ەلدوس سايدۋللاۇلى ەسىمدى ازاماتتى سوزگە تارتقانىمىزدا:
– قىزىلوردالىقپىن! جىلدا وسى جارمەڭكەدەن ءبىر قىسقا جەتەتىن اسقاباق الامىن. بيىل دا ءبىر قاپ اسقاباقتى 5600 تەڭگەگە الدىم. ءبىر كەلىسى 150 تەڭگەدەن كەلدى, – دەدى ول.
بۇرىن-سوڭدى الىپ بالىقتى كورمەگەن استانالىق تۇرعىن:
– ءما, وسىنداي ۇلكەن بالىق بولادى ەكەن-اۋ! ءبىرىنشى رەت كورۋىم! – دەپ تاڭدانىسىن جاسىرا المادى.
قىسقاسى, جارمەڭكەنىڭ جىلۋى ورتاق, قىزىعى مول!
