مادەنيەت

تابيعاتپەن ۇندەسكەن

«Has Sanat» ونەر گالەرەياسىندا بەلگىلى قىلقالام شەبەرى, قازاقستاننىڭ ەڭبەك سىڭىرگەن قايراتكەرى, قازاقستان رەس­پۋبليكاسى كوركەم اكادەمياسىنىڭ اكادەميگى سەيسەنحان ماحانبەتتىڭ «تابيعاتپەن ۇندەسۋ» اتتى كورمەسى اشىلدى. اتالمىش كورمە ۇلتتىق بەينەلەۋ ونەرىنىڭ الىپتارى قازاقستاننىڭ حالىق سۋرەتشىسى ءابىلحان قاستەەۆتىڭ جانە كسرو حالىق سۋرەتشىسى ورال تاڭسىقباەۆتىڭ 120 جىلدىعىنا ارنالدى.

سۋرەتشىنىڭ نەگىزگى ماماندىعى – جۋرناليست. ول بىرقاتار باسىلىمداردا قىزمەت ىستەپ, كەيىنگى 15-20 جىلدا عانا بەينەلەۋ ونەرىنە تۇبەگەيلى بەت بۇردى. بەلگىلى قالامگەر, پارلامەنت سەناتىنىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى نۇرتورە ءجۇسىپ كورمە يەسىمەن ابيتۋريەنت كەزىندە تانىسقانىن, ءتىپتى جاتاقحانانىڭ ءبىر بولمەسىندە جاتقانىن ايتىپ, سەيسەنحان ماحانبەتتىڭ سۋرەتكە دەگەن تالپىنىسى سول كەزدە باستالعانىن اتاپ ءوتتى. بەينەلەۋ ونەرىندەگى, سۋرەتشىلەردىڭ تىنىس-تىرشىلىگىندەگى تۇيتكىلدەرگە توقتالىپ, قازىر پارلامەنت تاراپىنان ولاردى شەشۋ قولعا الىنىپ جاتقانىن جەتكىزدى.

پارلامەنت ءماجىلىسىنىڭ قورعانىس, حالىقارالىق ىستەر جانە قاۋىپسىزدىك كوميتەتىنىڭ ءتورايىمى ايگۇل سەيدوللاقىزى, بەلگىلى اقىن, ءماجىلىس دەپۋتاتى قازىبەك يسا, بەلگىلى قىلقالام شەبەرى ەرلان ايتۋاروۆ, جازۋشى ايگۇل كەمەلباەۆا كورمە يەسىنىڭ شىعارماشىلىعى تۋرالى ءسوز سويلەدى. تۇركسوي حالىقارالىق ۇيىمىنىڭ باس حاتشىسى سۇلتان راەۆتىڭ, مادەنيەت جانە اقپارات ءمينيسترى ايدا بالاەۆانىڭ قۇتتىقتاۋلارى وقىلدى. سوڭىندا سەيسەنحان ماحانبەتتىڭ ءوزى بەينەلەۋ ونەرىنە قالاي كەلگەنىن ايتىپ, جينالعاندارعا العىسىن جەتكىزدى.

15 ناۋرىزعا دەيىن جالعاساتىن كورمەگە پەيزاج جانرىنداعى 60-تان استام تۋىندى قويىلدى. وندا جەر ءجانناتى – جەتىسۋ, كەربەز سۇلۋ كوكشەتاۋ, قاسيەتتى قاراتاۋ, ەرەيمەنتاۋ, ەلىمىزدىڭ باسقا دا وڭىرلەرىنىڭ تابيعاتى بەينەلەنگەن.

تاعىدا

ۇقساس جاڭالىقتار

Back to top button