بۇل ومىردە تاعدىردىڭ جازعانىنا تاڭدانۋعا بولمايدى, استە. تاياۋدا جەتپىستىڭ جەلكەنىنە شىققالى وتىرعان ورىنتاي جاقايۇلى وسىدان الپىس بەس جىل بۇرىن جازاتايىم جاراقاتتانىپ, ءبىرىنشى توپتاعى مۇگەدەك بولىپ, ارباعا تاڭىلىپ قالعان ەدى. ال بۇگىندە ەلۋ جاسقا تايانعان ءاليا جيەنعاليقىزى بولسا دارىگەردىڭ قاتەلىگىنەن مۇگەدەك بولىپ قالعان-دى.
ەندى وسى جاعدايدى شيراتاتىن بولساق ورىنتاي بەس جاسىندا اتتان قۇلاپ, بەل ومىرتقاسىنا زاقىم كەلەدى. سونى ەمدەتەمىن دەپ قاراعاندىنىڭ بەلدى اۋرۋحاناسىنا تاجىريبەلى, اتاقتى حيرۋرگ دارىگەرىنە وتا جاساتقىزادى. سودان دارىگەردىڭ قاتەلىگىنەن ەكى اياعى دا جانسىزدانىپ قالادى. وسىنداي جاعداي ءاليانىڭ دا باسىنان وتەدى. دارىگەردىڭ دۇرىس دياگنوز قويماي, قاتە ەمدەۋىنىڭ سالدارىنان بالا جاستايىنان مۇگەدەك بولىپ, ارباعا وتىرىپ قالادى. كىنالى دارىگەر جازالانىپ, ۇزاق جىلعا باس بوستاندىعىنان ايىرىلادى. ەندى ول دارىگەر جازاسىن وتەپ ورالعان شىعار, ال ءاليا بولسا ماڭگىلىككە مۇگەدەك بولىپ قالدى. ارينە, مۇنىمەن بارلىق دارىگەرلەر قاۋىمىنا توپىراق شاشۋدان اۋلاقپىن. بىزدە ءبىلىمدى, تاجىريبەلى دارىگەرلەر وتە كوپ. اسىرەسە, ەگەمەندىك العاننان بەرى ەلباسى ن.ءا.نازارباەۆ مەديتسينا سالاسىنا كوپ كوڭىل ءبولىپ جاتىر. استانادا مەديتسينالىق كلاستەر قۇرىلدى. دارىگەرلەرىمىز شەتەلدەن تاجىريبە جيناقتاپ, بۇگىنگى كۇن تالابىنا سايكەس مەديتسينالىق قۇرالدارمەن جابدىقتالعان ەمدەۋ مەكەمەلەرىندە ابىرويلى قىزمەت اتقارۋدا. سول جەتىستىكتەرىمىزدىڭ ارقاسىندا قازاقستاندىقتاردىڭ ءومىر ءسۇرۋ جاسى اجەپتاۋىر ۇزاردى. دەگەنمەن, ءالى دە بولسا ءبىلىمى تاياز, تانىستىقپەن جۇمىسقا ورنالاسىپ العان مەديتسينا قىزمەتكەرلەرى كەزدەسەدى. مەن ءوزىم دە كوردىم. رەسپۋبليكالىق اۋرۋحانادا ىستەيتىن كەيبىر مەدبيكەلەر ەگۋ جۇمىسىن دۇرىس اتقارا المايدى. ەلباسى ايتپاقشى ءبىزدىڭ باستى بايلىعىمىز – ادام. سول ادامدى ساقتاپ, عۇمىرىن ۇزارتۋ ءۇشىن ەمدەۋ سالاسىندا ءبىلىمدى, تاجىريبەلى قىزمەتكەرلەر بولعانى ءجون.
ورىنتاي جاقايۇلى مەن ءاليا جيەنعاليقىزى «ءبىز ارباعا وتىرىپ قالدىق, ەندى ءبىزدى تاماقتاندىرىڭدار, كۇتىڭدەر» دەگەن ويعا كەلگەن جوق. ەكەۋى دە ەڭبەك ەتكىلەرى كەپ, ۇمتىلۋدا بولدى. ورىنتاي ءارتۇرلى سەبەپتەرمەن قاراعاندى, قىزىلوردا مۇگەدەكتەر ۇيىندە بولىپ, ەڭبەك ەتكىسى كەلىپ اقتوبە مۇگەدەكتەر ۇيىنە اۋىسادى. ويتكەنى, وندا مۇگەدەكتەرگە ارنالعان شەبەرحانالار بار ەكەن. سوندا ءارتۇرلى ەلەكتر قۇرالدارىن جاساۋمەن اينالىسادى. ونىمەن قاتار ساعات جوندەيتىن ماماندىقتى وقىپ الادى. بەلگىلى ءبىر سەبەپتەرمەن استاناداعى قارتتار مەن مۇگەدەكتەر ۇيىنە اۋىسادى. ءاليا دا شەشەسى قايتىس بولعان سوڭ اعالارى مەن اپاسى استانادا بولعاندىقتان, وسىندا قونىس اۋدارادى. وسىلايشا ورىنتاي مەن ءاليا ەلوردامىزدا تانىسىپ, كوڭىلدەرى جاراسىپ, وتباسىن قۇرادى. 2000 جىلى نەكەلەرىن قيىپ, ۇيلەنۋ تويىن جاسادى.
ءاليا مەكەمەنىڭ قوعامدىق جۇمىستارىنا بەلسەنە ارالاسادى. اشەكەيلى زاتتار جاسايدى. مۇگەدەكتەر اراسىنداعى سپورتتىق جارىستارعا قاتىسادى. ءۇش رەت قاتارىنان توعىزقۇمالاقتان رەسپۋبليكا چەمپيونى اتاندى. وسى سپورت تۇرىنەن سپورت شەبەرى اتاعى بار.
ورىنتاي جاقايۇلى دا شاحمات جارىستارىنا قاتىسادى. شاحماتتان سپورت شەبەرلىگىنە كانديدات. قوعامدىق نەگىزدە باپكەرلىك ەتەدى. تۇرعىنداردىڭ وتىنىشىمەن ساعاتتارىن جوندەپ بەرەدى.
وسىلايشا ۇلگىلى وتباسى بولىپ, تاعدىردىڭ جازۋىمەن ەكى مۇگەدەك ءبىر تۇتاس بولىپ تاتۋ-ءتاتتى ءومىر ءسۇرىپ جاتىر.
– وسى ومىرىمە تاۋبە دەيمىن. مىنە, جەتپىس جاسقا كەلىپ وتىرمىن. ءبىز سەكىلدى قامكوڭىل جاندارعا قامقورلىق جاساپ وتىرعان ەلباسى نۇرسۇلتان نازارباەۆقا, كۇندەلىكتى ومىرىمىزگە جاعداي جاساپ جۇرگەن مەكەمە باسشىسى ق. باپىشوۆكە جانە بارلىق قىزمەتكەرلەرگە العىسىمىز شەكسىز, – دەيدى ورىنتاي جاقايۇلى مەيىرلەنىپ.
مەرەيلى جاسقا كەلىپ وتىرعان ورىنتاي مۇحتاروۆقا زور دەنساۋلىق تىلەي وتىرىپ, ءاليا جيەنعاليقىزى ەكەۋى باقىتتى ۇزاق عۇمىر كەشە بەرۋىنە تىلەكتەستىگىمدى بىلدىرەمىن. ومىرگە دەگەن قۇشتارلىقتارىڭىز ەشقاشان سۋىماي, كوپشىلىككە ونەگە بولىپ جۇرە بەرىڭىزدەر.
ەركىن داۋەشۇلى,
قازاقستان جۋرناليستەر وداعىنىڭ مۇشەسى
