وسىدان ەكى جارىم اي بۇرىن «قازاقستان حالقى اسسامبلەياسىنىڭ 20 جىلدىعىنا – 20 ىزگى ءىس» ەستافەتاسى اياسىندا ەلوردادان ەلىمىزدىڭ ايماقتارىنا اتتاندىرىلعان ەستافەتا سيمۆولى – تايقازان استاناعا قايتىپ ورالدى. بەيبىتشىلىك جانە كەلىسىم سارايىنىڭ الدىندا تەاترلاندىرىلعان قويىلىم تۇرىندە وتكەن ۇلتىمىزدىڭ قاسيەتتى بۇيىمىن سالتاناتتى قارسى الۋ راسىمىنە قازاقستان حالقى اسسامبلەياسىنىڭ مۇشەلەرى, پارلامەنت دەپۋتاتتارى, قالا باسشىلىعى, ونەر ۇجىمدارى, ەتنومادەني بىرلەستىكتەردىڭ وكىلدەرى جينالدى.
– ەلىمىزدىڭ بارلىق وبلىستارىن ارالاپ شىققان تايقازان استانا قالاسىنا قايتىپ ورالىپ وتىر. استانا – بەيبىتشىلىكتىڭ قالاسى, ەلدىكتىڭ شاھارى. ال تايقازان – ءبىرتۇتاس شاڭىراعىمىزدىڭ جىلۋىن جوعالتپايتىن, ەلدىڭ باسىن قوساتىن, بىرلىككە جول سالاتىن سيمۆول, – دەدى قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى ەرالى توعجانوۆ.
جينالعان قاۋىمدى بۇل تاماشا ۋاقيعامەن قۇتتىقتاعان قالا اكىمىنىڭ ورىنباسارى ەرمەك امانشاەۆ «تايقازان – مولشىلىقتىڭ, بەرەكە-بىرلىك پەن ىرىستىڭ بەلگىسى» دەپ اتاپ ءوتتى.
سالتاناتتى شارا ورتاسىنان تابىلعان اتاقتى بالۋان, سيدنەي وليمپياداسىنىڭ كۇمىس جۇلدەگەرى يسلام بايرامۋكوۆ تايقازان قازاقستان حالقى اسسامبلەياسىنىڭ ەستافەتاسىنىڭ سيمۆولى رەتىندە بەكەردەن-بەكەر تاڭدالماعانىن, ونى تاڭداعاندا ءبۇتىن حالقىمىزدىڭ اۋزىنان ءدام كەتپەسىن, ۇرتىنان ماي كەتپەسىن دەگەن ىرىم ەستە بولعانىن جەتكىزدى.
تەاترلاندىرىلعان قويىلىمدى «ناز» مەملەكەتتىك بي تەاترىنىڭ ۇجىمى اشتى. م.گوركي اتىنداعى مەملەكەتتىك اكادەميالىق ورىس دراما تەاترىنىڭ ءارتىسى بولات كەرەيباەۆ ابىز بەينەسىندە كورىندى. مەرەكەلىك كوڭىل-كۇيدى «توميريس» بيشىلەر ۇجىمى مەن قورعانىس مينيسترلىگى مەن ەتنومادەني بىرلەستىكتەردىڭ ونەرپازدارى قىزدىرا ءتۇستى.
ايتا كەتەيىك, تۇركىستانداعى قوجا احمەت ياسساۋي كەسەنەسىندە تۇرعان تايقازاننىڭ ەستافەتا بارىسىندا ەل ارالاعان شاعىن كوشىرمەسى شەبەر نوسير حومراقۇلوۆتىڭ قولىنان شىققان. ال, جالپى اكتسيا اياسىندا ەلىمىزدىڭ 35 مىڭنان استام كومەككە مۇقتاج تۇرعىنىنا جاردەم بەرىلگەن. وتكىزىلگەن 2500 شارانىڭ بارلىعى ۇلى وتان سوعىسى ارداگەرلەرى مەن مۇگەدەكتەردى, مۇمكىندىگى شەكتەۋلى جانداردى قولداۋعا باعىتتالعان. قايىرىمدىلىق اكتسيالارى بارىسىندا الەۋمەتتىك ماڭىزى بار نىساندار دا ىسكە قوسىلعان. سونداي-اق, مىڭنان ارتىق جاس كوشەتتەر ەگىلىپ, اۋلالار مەن كوشەلەر اباتتاندىرىلدى. جالپى, اكتسياعا 620 مىڭنان استام ادام قاتىسقان.
امانعالي قالجانوۆ
