ادامزات بالاسى دۇنيەگە كەلگەندە اللا تاعالا ونىڭ بويىنا ەرەكشە ءبىر قاسيەت, دارىن بەرەدى. الايدا, سول دارىنىن حالىققا تانىتا الاتىنى دا, اشا الماي ارماندا كەتەتىنى دە بار. ەلىمىزدە سونداي تالانتتاردىڭ دەر شاعىندا تانىلۋىنا مۇمكىندىك جاسايتىن ونەر ءۇيى اشىلدى. استاناداعى «تالانت» حالىقارالىق ونەر ورتالىعىندا ءان-كۇيگە تالاسى بار جانداردىڭ جاسى مەن مۇمكىندىگىنە ەشقانداي شەكتەۋ جوق. مۇندا ەڭبەكتەگەن بالادان ەڭكەيگەن قارياعا دەيىن كەلىپ, قابىلەتىن ۇشتاي الادى. ورتالىقتىڭ اشىلۋىنا قر ەڭبەك سىڭىرگەن ءارتىسى, ءانشى-سازگەر مارات وماروۆ مۇرىندىق بولدى.
بالالىق شاقتىڭ ارمانى
مۇنداي ورتالىقتى اشۋ مارات اعامىزدىڭ كوكەيىندە جاس كەزىندە-اق پايدا بولىپ ەدى.
كەزىندە قازاقتىڭ ءبىرتۋار ازاماتى ءشامشى قالداياقوۆپەن شولاققورعانداعى ءبىر جيىن-تويدا كەزىگىپ قالىپ, ونىڭ «انا تۋرالى جىر» اتتى ءانىن ورىنداعانى بار. سوندا ۇلى كومپوزيتور بالا-ماراتتىڭ دارىنىن جازباي تانىپ: «تالانتتى بالالار اۋىلدان شىعادى. وسىلارعا ارناپ مەكتەپ اشسا عوي, شىركىن!», – دەگەن-ءدى. سول ساتتەن باستاپ دارىندى بالالارعا مۇمكىندىك جاسايتىن مەكتەپ نەمەسە ورتالىق اشۋ ماراتتىڭ دا ەسىنەن ءبىر شىققان ەمەس.
تالاي جىلدار زىرعىپ وتە شىقتى.بالا مارات تالانتىمەن تانىلىپ, قر ەڭبەك سىڭىرگەن ءارتىسى, ءانشى-سازگەرگە اينالدى. الماتىدا بالالاردى دامىتۋ قورىن اشىپ, رەسەي, گەرمانيا, يتاليا, يسپانيا ەلدەرىنە ۇلتتىق ونەرىمىزدى دارىپتەپ ۇلگەردى. سودان كەيىن, ەلباسىنىڭ شاقىرۋىمەن استاناعا كەلگەن ونەر جاناشىرى مۇندا دا اۋەلدەگى باعىتىنان اينىمادى. بالالىق شاقتاعى ارمانىن ىسكە اسىرۋعا مۇمكىندىگى مولايدى.
العاشىندا مەكتەپ جەرتولەسىندە كىشىگىرىم ستۋديا اشىپ, ءبىراز جۇمىس جاسادى. كەيىننەن قالا اكىمدىگىنىڭ كومەگىمەن جاڭا عيماراتقا كوشتى. تالانتتاردىڭ اشىلۋىنا مۇمكىندىك جاسايتىن حالىقارالىق ورتالىققا «تالانت» دەگەن اتتى لايىق كوردى.
ورتالىق 2012 جىلدىڭ 22 ناۋرىزىندا سالتاناتتى تۇردە اشىلدى. جيىنعا گولليۆۋد جۇلدىزدارى مارك داكاسكوس پەن كەري-حيرويۋكي تاگاۆا قاتىستى. الەمدىك دەڭگەيدەگى جۇلدىزدار شىقسىن دەگەن ىرىممەن ورتالىقتىڭ اشىلۋ لەنتاسىن مارك داكاسكوسقا كەستىردى.
ىنتىماقتاستىق ارتىپ كەلەدى
«تالانت» حالىقارالىق ونەر ورتالىعى بولعاندىقتان شەتەلدىك ونەر ورتالىقتارىمەن تىعىز قارىم-قاتىناستا بولۋى زاڭدى. قازىرگى تاڭدا ول مالايزيا, ءۇندiستان سەكىلدى بىرقاتار ەلدەرمەن بايلانىستا. بۇكىلالەمدىك «FIDOF» كومپوزيتورلار قاۋىمداستىعىمەن دە ارىپتەستىك ورناتىپ ۇلگەردى. وسى كەلىسىمنىڭ نەگىزىندە قازاقستان – اقش بىرلەسكەن فيلمدەرى تۇسىرىلمەك. ۇزدىك جوبالار شەت مەملەكەتتەردەگى فەستيۆالدەر مەن بايقاۋلارعا قاتىستىرىلادى. سونىمەن قاتار, ءاربىر توقسان سايىن جاس دارىن يەلەرى اقش-قا شىعارماشىلىق ساپارلار جاسايدى. بولاشاقتا تەلەارنالارمەن بىرلەسىپ وتباسىلىق بايقاۋلار وتكىزۋ دە جوسپارلانىپ وتىر. جۋىردا عانا استانادا حالىقارالىق ونەر ورتالىعى اشىلعانىن انگلياداعى قانداستارىمىز ينتەرنەت ارقىلى ءبىلىپ, «تالانت» باسشىلىعىنا حابارلاسىپتى. ولار ليۆەرپۋلداعى پول ماككارتنيدىڭ ورتالىعىمەن بايلانىس ورناتۋ جونىندە ۇسىنىس ايتتى. سونداي-اق, رەسەيلىكتەر «مينۋتا سلاۆى» باعدارلاماسىنا وسى جەردە ىرىكتەۋ جاساۋعا ۇسىنىس بىلدىرگەن.
قىركۇيەك ايىندا «تالانتتىڭ» ون بەس شاقتى شاكىرتى اقش-قا اتتانعالى وتىر. قۇرىلعانىنا ءالى ءبىر جىل تولماعان «تالانت» پەن الەمگە ايگىلى نيۋ يورك فيلم اكادەمياسىنىڭ اراسىنداعى بايلانىستىڭ ارقاسىندا شەتەلدە وقۋدى ارماندايتىن قازاقستاندىق ونەرلى جاستاردىڭ مۇمكىندىگى مولايا ءتۇستى. ەستەرىڭىزگە سالا كەتەيىك, ۇستىمىزدەگى جىلدىڭ مامىر ايىندا گولليۆۋدتاعى «باقىتتى بالالىق شاق» اتتى فەستيۆالدە التى جاسار ءبيبىماريام وماروۆا قازاق, يسپان, اعىلشىن تىلدەرىندە ءان ايتىپ, اكتەرلىك شەبەرلىگىمەن قالىڭ كورەرمەندى باۋراپ العان ەدى. وسى بايقاۋ بارىسىندا نيۋ يورك فيلم اكادەمياسىنىڭ ديرەكتورى دەن ماكلەر ءبيبىماريامنىڭ ونەرىنە ءسۇيسىنىپ, ۋولت ديسنەيگە شاقىرتۋ جاساعان. اعىلشىن ءتىلىن ەندى عانا مەڭگەرىپ جۇرگەندىكتەن شاقىرتۋدى كەيىنگە قالدىرىپ, ەكى جاق ءبىر جىلدىق كەلىسىم شارتقا قول قويعان بولاتىن.
ورتالىقتىڭ ىشكى جاعدايى
مۇندا 25 باعىت بويىنشا 526 بالا ءتالىم الۋدا. «تالانتتىڭ» العاشقى قارلىعاشى اقتوبە قالاسىنىڭ تۋماسى, ماسكەۋدەگى «مينۋتا سلاۆى» باعدارلاماسىنىڭ 12 جاسار جەڭىمپازى – ەركەش حاسەن. بۇدان باسقا «بوبەك» قورى, «پرەزيدەنت شىرشاسى», «ءانشى بالاپان», «اينالايىن» بالالار كونكۋرسى, سونداي-اق, اقش-تاعى «Walt Disney’s World» پاركىندەگى بالالار باعدارلاماسى ساحناسىندا دا تالاي «تالانت» ونەرپازى ونەر كورسەتىپ ءجۇر. تابيعي تالانتتى دۇرىس دامىتۋ بارىسىندا ءوزىن-ءوزى «جۇلدىز» اۋرۋىنا ۇشىراتپاي تاربيەلەي ءبىلۋ ۇلكەن ەڭبەكتى قاجەت ەتەتىنىن جەتكىزدى ۇلتتىق ونەر جاناشىرى.
ارنايى بولمەلەرى, ءدامحاناسى, 300 ورىندىق كونتسەرت زالى بار ورتالىقتىڭ حالىقارالىق دەڭگەيدە جۇمىس ىستەۋگە مۇمكىندىگى مول. ازىرگە مۇندا شەشىمىن تاپپاعان ءبىر عانا ماسەلە بار. ول – ورتالىق جانىنان ينتەرنات اشۋ. ويتكەنى, الىس اۋىلدان كەلەتىن دارىندى بالالارعا ءتالىم-تاربيە بەرۋمەن قاتار, تۇرعىن-جايمەن قامتاماسىز ەتە السا, نۇر ۇستىنە نۇر بولارى حاق. سونىمەن قاتار, شەبەرلىك كلاستارىن وتكىزۋگە كەلەتىن شەتەلدىك ماماندارعا دا ورنالاساتىن ورىن قاجەت-اق.
جۋىردا عانا بىرىككەن ۇلتتار ۇيىمىنان «ەرەن ەڭبەگى ءۇشىن» مەدالىمەن ماراپاتتالعان مارات وماروۆ اعامىزدىڭ ەڭبەگى جەمىستى بولىپ, ۇلتتىق ونەرىمىزدى بۇكىل الەمگە تانىتاتىن شاكىرتتەرى كوبەيە بەرسىن دەگەن تىلەگىمىزدى بىلدىرەمىز.
ناسيحات سپانديارقىزى
