كەشە قالالىق ءماسليحاتتا قوعامدىق كەڭەستىڭ وتىرىسى بولىپ ءوتتى. جيىندى اشقان كەڭەس توراعاسى سانسىزباي ەسىلوۆ جينالعانداردى كۇن تارتىبىندە قارالاتىن اكىمدىكتىڭ نورماتيۆتىك-قۇقىقتىق اكتىلەرىنىڭ جوبالارىمەن تانىستىردى.
ەڭ الدىمەن دەنساۋلىق ساقتاۋ باسقارماسى باسشىسىنىڭ ورىنباسارى ساۋلە نۇراشەۆا «قوسىمشا ءدارى-دارمەكپەن قامتاماسىز ەتۋ تۋرالى» استانا قالاسى ءماسليحاتىنىڭ 2011 جىلعى 7 جەلتوقسانداعى شەشىمىنە تولىقتىرۋلار ەنگىزۋ تۋرالى» نورماتيۆتىك-قۇقىقتىق اكتى جوباسىن تانىستىردى. نۇراشەۆانىڭ ايتۋىنشا, استانا قالاسىندا بەحتەرەۆ اۋرۋى وزەكتى بولىپ وتىر. ادەتتە 35-40 جاستاعى ادامدارعا ءتان بۇل اۋرۋ ءتۇرى كەيىنگى كەزدەرى 15-30 جاس ارالىعىنداعى ادمداردا پايدا بولا باستاعان. «استانا قالاسىندا بەحتەرەۆ اۋرۋى دياگنوزىمەن 18 جاستان باستاپ 149 ادام ەسەپكە الىنعان, ونىڭ 20 پايىزى ينفليكسيماب, اداليمۋماب پرەپاراتتارى سەكىلدى گەندىك-ينجەنەرلىك بيولوگيالىق تەراپياعا مۇقتاج. بۇل پرەپاراتتار تەگىن بەرىلەتىن دارىلىك زاتتار مەن مەديتسينالىق ماقساتتاعى تىزىمىندە جوق. سونداي-اق, استانادا جىل باسىنان بەرى 9 بالاعا «مۋكوۆيستسيدوز» دياگنوزى قويىلدى. ولاردىڭ تورتەۋىنە 300 مگ/5 مل امپۋلاداعى توبراميتسين پرەپاراتىمەن قامتۋ تۋرالى ۇسىنىس ەنگىزىلگەن. بۇل ءدارى دە تەگىن ءدارى تىزىمىندە جوق» دەيدى ساۋلە قۋانىشقاليقىزى. قوعامدىق كەڭەس مۇشەلەرى «قوسىمشا ءدارى-دارمەكپەن قامتاماسىز ەتۋ» تۋرالى استانا قالاسى ءماسليحاتىنىڭ 2011 جىلعى 7 جەلتوقسانداعى شەشىمىنە (ينفليكسيماب جانە توبراميتسين پرەپاراتىن قوسۋ تۋرالى) تولىقتىرۋ ەنگىزۋ تۋرالى ەرەجەسىن ءبىراۋىزدان ماقۇلدادى.
وسىدان كەيىن كوممۋنالدىق شارۋاشىلىق باسقارماسى باسشىسىنىڭ ورىنباسارى نۇرمان سولتامبەكوۆ استانا قالاسىنىڭ اۋماعىنداعى جاسىل ەكپەلەردى كۇتىپ-ۇستاۋ جانە قورعاۋ, اباتتاندىرۋ قاعيداسى تۋرالى ەرەجەسىمەن تانىستىردى.
«قاعيدات ەرەجەسى بويىنشا جەكە تۇلعالار ىستەن شىققان, قۇرامىندا سىنابى بار شامدار مەن قۇرىلعىلاردى ارنايى كونتەينەرلەرگە اپارىپ تاستاۋى ءتيىس. تۇرعىنداردى مىندەتتەۋ ءۇشىن ونداي كونتەينەرلەردى تولىق ورناتۋ كەرەك. بىراق ونداي كونتەينەرلەر قالا بويىنشا ءالى قويىلىپ بىتكەن جوق. ماسەلەن, ءوز ءۇيىمنىڭ اينالاسىنان ونداي ارنايى ورىن كورگەن جوقپىن. الدىمەن ادامدارعا جاعداي جاساپ الىپ بارىپ, سودان كەيىن تالاپ قويعان دۇرىس شىعار. سونىمەن قاتار, ويىن الاڭدارىنداعى قۇمسالعىشتارعا قاتىستى كەمشىلىك بار. زاڭ بويىنشا ايىنا ءبىر رەت اۋىستىرىلۋى ءتيىس. بىراق ءىس جۇزىندە ونداي جوق. وسىندا تۇرعانىما 20 جىل بولدى, قۇم اۋىسقانىن كورگەن جوقپىن. زاڭدا كورسەتىلگەن ەكەن, تالاپتى كۇشەيتۋ كەرەك. بولماسا, مۇلدەم الىپ تاستاڭىزدار!» دەپ, قوعامدىق كەڭەس مۇشەسى ۆلاديسلاۆ سەرگەەۆ ءوز ۇسىنىسىن ءبىلدىردى.
تەك سەرگەەۆ قانا ەمەس سولتامبەكوۆ ۇسىنعان قۇجاتتان ۇيلەسپەيتىن تۇسى كوپ ەكەنىن ايتىپ ناقتى سۇراقتار قويىپ جاتتى.
قوعامدىق كەڭەستە, سونىمەن قاتار, ەسكيزدىك جوبالار, مادەنيەت جانە سپورت سالاسىنداعى مەملەكەتتىك قىزمەت رەگلامەنتى تۋرالى ەرەجەلەر قارالدى.
بۇركىت نۇراسىل
