كەشە استاناداعى ورتالىق بازار عيماراتىندا قالالىق جۇمىسپەن قامتۋ ورتالىعى بوس جۇمىس ورىندار جارمەڭكەسىن وتكىزدى. يگىلىكتى شاراعا ەلورداداعى 20-دان استام جۇمىس بەرۋشى قاتىسىپ, 800-گە جۋىق قىزمەت ءتۇرى ۇسىنىلدى.
اتالمىش شارا وسىمەن ەكىنشى مارتە ءوتىپ وتىر. العاشقىسى مۇمكىندىگى شەكتەۋلى ازاماتتارعا ارنالسا, ەكىنشىسى ەكى قولعا ءبىر كۇرەك تابا الماي بوس جۇرگەن ادامدار ءۇشىن ۇيىمداستىرىلدى. ناتيجەسى دە جامان ەمەس. ءاسىرەسە, «جۇمىسپەن قامتۋ-2020 جول كارتاسى» باعدارلاماسى بويىنشا ورتالىق قىزمەتكەرلەرىنەن قايتا وقىتۋ مەن جاڭا ماماندىق الۋدىڭ ءمۇمكىندىكتەرى تۋرالى كەڭەس الىپ جاتقانداردىڭ قاراسى كوپ. ءبىز شەتكەرىلەپ تۇرعان ورىمدەي جاس جىگىتتى سوزگە تارتتىق. اتى-ءجونى – تابىستى داۋرەن, شىعىس قازاقستاننىڭ تۋماسى.
– بۇگىن ورتالىق بازاردا وسىنداي بوس جۇمىس ورىندار جارمەڭكەسى وتەتىنىن ەستىپ, الىپ-ۇشىپ كەلدىم. ءوزىم ەلورداداعى قازاق تەحنولوگيا جانە بيزنەس ۋنيۆەرسيتەتىن مۇناي جانە گاز سالاسىنىڭ ماماندىعى بويىنشا ءتامامدادىم. جاڭا ءوز سالاما جاقىنداۋ ءۇش مەكەمەگە قۇجاتتارىمدى تاپسىردىم. ەندى, ءبىر ءساتى بولار, – دەيدى ول.
انىعىندا, جارمەڭكەگە جۇمىس ىزدەپ كەلگەندەردىڭ دەنى – جاستار. بۇل تۇسىنىكتى دە. قازىرگى ۋاقىتتا جوعارى وقۋ ورنىن اياقتاپ, قولعا ديپلوم تيگەننەن كەيىن وعان لايىق جۇمىس تابۋ دا وڭاي ەمەس.
– ءبىز وسى جارمەڭكەنى وتكىزۋ ءۇشىن ورتالىق بازاردى ادەيى تاڭداپ الدىق. بۇل جەردە ءوز بەتىنشە جۇمىس ىستەيتىن ادامداردى ەڭبەكپەن قامتۋدى ماقسات ەتىپ وتىرمىز. جارمەڭكە باستالعاننان بەرگى ءبىر ساعات ىشىندە 60-تان استام ازامات كەلىپ, ىڭعايلى جۇمىس ورىندارىنا تىلەكتەرىن ءبىلدىردى. الداعى تاڭدا دا وسىنداي 10 جارمەڭكە وتكىزىلمەك. اسىرەسە, جاستارعا ۇلكەن قولداۋ بار. ماسەلەن, «جۇمىسپەن قامتۋ -2020 جول كارتاسى» باعدارلاماسى اياسىندا «جاستار پراكتيكاسى» باعىتى بويىنشا مەملەكەتتىك جانە جەكە مەنشىك مەكەمەلەرگە بارعان جاس ماماندار التى اي تاجىريبەدەن ءوتىپ, ولارعا 46 مىڭ تەڭگە كولەمىندە ەڭبەكاقى تولەنەدى, – دەيدى جۇمىسپەن قامتۋ ورتالىعىنىڭ ءباسپاسوز حاتشىسى اياجان قويشىقاراقىزى.
