قر ۇلتتىق اكادەميالىق كىتاپحاناسىندا كۇيشى, كينودراماتۋرگ, جازۋشى, ءمادەنيەتتانۋشى, سان ونەردى ءبىر بويىنا توعىستىرعان تالاسبەك اسەمقۇلوۆتىڭ «ءتالتۇس» اتتى CD البومىنىڭ تۇساۋكەسەرى ءوتتى. شاراعا مارقۇممەن كەزىندە دوس, سىيلاس بولعان ادامدار مەن ونەردەگى ءىزباسارلارى جينالدى.
باس-اياعى 73 كۇي ەنگەن جيناققا سوناۋ عاسىرلار قويناۋىنان وسى زامانعا جەتكەن كەتبۇعانىڭ, قودان تايشىنىڭ, سونداي-اق, بايجىگىتتىڭ, كۇي ءتاڭىرىسى – ءتاتتىمبەتتىڭ, قاسابايدىڭ, قىزىلمويىن قۋاندىقتىڭ, اقاي قاجىنىڭ, اققىزدىڭ, ءجۇنىسباي ستامباەۆتىڭ كۇيلەرى جانە تالاسبەك اسەمقۇلوۆتىڭ ءوزى شىعارعان 8 كۇيى توپتاستىرىلعان. اتالعان تۇلعالار مۇرالارىنىڭ ناسيحاتتالۋىنا البوم اۆتورى كەزىندە ازدى-كوپتى ۇلەسىن قوستى. ماسەلەن, تاتتىمبەت كۇيلەرىنىڭ پاريجدە جارىق كورۋىنە ەڭبەك ءسىڭىردى. فرانتسۋز زەرتتەۋشىلەرىنە تاتتىمبەت كۇيلەرىنىڭ مۋزىكالىق جانە دومبىرا قاعىسىنداعى ەرەكشەلىكتەرىن ءتۇسىندىرىپ بەردى. وسى سۇحباتتى ساۋلە جانە گساۆە اللەستەرلەر تاسپاعا تۇسىرگەن ەكەن. تۇساۋكەسەر باسىندا بۇل سۇحباتتىڭ ءۇزىندىسىن كورىپ, كۇيشىنىڭ اياۋلى بەينەسىمەن قاۋىشتىق.
تالاسبەك اسەمقۇلوۆتىڭ ءوزىنىڭ الدىنا قويعان تالاي جوسپارلارى بار ەدى. وتىز سەگىز ستسەناري جازام دەپ ءجۇرىپ, وننان استامىن عانا جازىپ كەتتى. سونداي-اق, «ءتالتۇس» رومانىنىڭ ەكىنشى تومىنا كىرىسپەكشى بولعان. «تاتتىمبەت سەرى» رومانىن اياقتاي المادى. قوجا احمەت ءياسساۋيدىڭ «ديۋاني حيكمەت» ەڭبەگى مەن گابريەل گارسيا ماركەستىڭ «ءجۇز جىلدىق جالعىزدىق» رومانىن دا تالداماقشى ەدى. قازاقتارعا الەم ادەبيەتىن قالاي وقۋدىڭ ۇلگىسىن كورسەتۋدى دە ارماندادى. وسىنىڭ بارىنە كۇيبەڭ تىرلىك موينىن بۇرعىزبادى.
الايدا, دارىندى جاستارعا جاناشىرلىق تانىتىپ, ءبىراز ونەرپازداردى تاربيەلەپ كەتتى. حالقىمىز اكە تۇرىپ, ۇلدىڭ سويلەگەنىن قۇپ كورمەيدى. سول سياقتى تالاسبەكتىڭ شاكىرتتەرىنىڭ ءبىرى, بۇل كۇندەرى تالانتتى كۇيشى رەتىندە تانىلعان سارسەنعالي جۇزباەۆ تالاسبەكتىڭ الدىندا كۇي تارتپايدى ەكەن. تالاسبەك ونىڭ كۇيىن تىڭداۋ ءۇشىن دوستارىنا سارسەنعاليعا كۇي تارتقىزىپ, ءوزى تىعىلىپ تۇرىپ تىڭدايدى ەكەن. تۇساۋكەسەردە وسىنداي اسەرلى ەستەلىكتەر ايتىلدى. سارسەنعالي جۇزباەۆ, قايرات ايتباەۆ, رۇستەم نۇركەنوۆ, ايتولقىن توقتاعان, اقجۋسان يمانعىزىقىزى كۇي شەرتتى.
سD البومىنىڭ جارىق كورۋىنە دەمەۋشىلىك كورسەتكەن جاردەم قۇرمانعازيەۆ, تاريحشى عالىم بۇركىتباي اياعان, فولكلورتانۋشى اقەدىل تويشانۇلى, استاناداعى م.گوركي اتىنداعى مەملەكەتتىك اكادەميالىق ورىس دراما تەاترىنىڭ ديرەكتورى ەركىن قاسەنوۆ, قوبىزشى راۋشان ورازباەۆا تالاسبەك اسەمقۇلوۆ تۋرالى پاراساتتى ءسوز قوزعادى. تالاسبەك باستاپقىدا مەديتسينالىق ينستيتۋتتا وقىعان. الايدا, بويىنداعى ونەرى جەڭىپ, كەيىننەن اباي اتىنداعى پەداگوگيكالىق ينستيتۋتتىڭ فيلولوگيا فاكۋلتەتىن ءبىتىردى. ونەر جولىندا ءجۇرىپ, ارتىندا مول مۇرا قالدىردى. قازىردە توم-توم بولاتىن قولجازبالارى مەن جيناعان كۇيلەرى جيناقتالىپ قالدى. تۇلعانىڭ جارى زيرا ناۋرىزباەۆا سولاردى بىرتە-بىرتە جارىققا شىعارماق. سونىڭ العاشقى قارلىعاشى – «ءتالتۇس» سD البومى. جينالعاندار سونىڭ تۇساۋكەسەرىندە مارقايىپ, قولداۋ بولسا وزگە دە ەڭبەكتەرىنىڭ تانىستىرىلىمىندا جولىعايىق دەگەن ويمەن تارقاستى.
امانعالي قالجانوۆ